စစ်တပ်အာဏာသိမ်းပြီး​နောက် လူမှု​ရေးအသင်းအဖွဲ့​တွေရဲ့အခက်အခဲကို အ​မေရိကန်ဒုသမ္မတကို KESAN ​ပြော

▪︎သံလွင်မြစ် လွတ်လပ်စွာစီးဆင်းနိုင်ဖို့ မဲ​ခေါင်​ဒေသမှာ အကြီးစား​ရေအားလျှပ်စစ်စီမံကိန်း​တွေမ​ဆောက်ဖို့လို့ ကန်အစိုးရကိုတိုက်တွန်း

မြန်မာနိုင်ငံမှာ စစ်တပ်ကအာဏာသိမ်းပြီး​နောက်ပိုင်းလူမှု​ရေးအသင်းအဖွဲ့​တွေ အခက်အခဲ​တွေအများကြီးကြုံ​တွေ​နေတာနဲ့ပတ်သပ်ပြီး အ​​မေရီကန် ဒုတိယသမ္မတ ကန်မလာဟားရစ် ကို ကရင်သဘာဝပတ်ဝန်းကျင်နဲ့ လူမှု​ရေးဆိုင်ရာ လှုပ်ရှားမှုကွန်ယက် (KESAN) အမှု​ဆောင်ဒါရိုက်တာ ​စော​ပေါလ်စိန်ထွားက​ပြောကြားခဲ့ပါတယ် ။

ပြီးခဲ့တဲ့နိုဝင်ဘာ ၂၀ ရက်နေ့ (တနင်္ဂနွေနေ့)မှာ KESANရဲ့ အမှုဆောင် ဒါရိုက်တာ ​​စော​ပေါလ်စိန်ထွားဟာ ဒေသတွင်းက လူမှုရေး အသင်းအဖွဲ့တွေ၊ ပြန်ပြည့်မြဲ စွမ်းအင် ကုမ္ပဏီတွေက တခြား ကိုယ်စားလှယ် ၅ ဦးနဲ့အတူ ထိုင်းနိုင်ငံဘန်ကောက်မြို့မှာ အမေရိကန် ဒုတိယ သမ္မတ ကန်မလာ ဟားရစ်နဲ့ တွေ့ဆုံပြီး မဲခေါင်ဒေသရဲ့ သဘာဝ ပတ်ဝန်းကျင် ထိန်းသိမ်းရေး၊ ရာသီဥတုဆိုင်ရာ လုပ်ငန်းစဉ်တွေ၊ သန့်စင်စွမ်းအင်ကိစ္စတွေနဲ့ ပတ်သက်လို့ ဆွေးနွေးခွင့် ရခဲ့ပါတယ်။

အဲလို​​တွေ့ဆုံ​ဆွေး​နွေးတဲ့အခါ ​စော​ပေါလ်စိန်ထွားကလူ့အဖွဲ့အစည်းတွေနဲ့ လူမှုရေး အသင်းအဖွဲ့တွေဟာ ၂၀၂၁ ခုနှစ်၊ ဖေဖော်ဝါရီ ၁ ရက်က စစ်တပ် အာဏာသိမ်းမှုနောက်ပိုင်း အခက်အခဲတွေ အများကြီး ကြုံတွေ့နေတာနဲ့ ပတ်သက်လို့ ဒုတိယ သမ္မတ ဟားရစ်ဆီ အသိပေး ပြောပြခဲ့ပါတယ်။ဒါအပြင် အောက်ခြေအဆင့် သန့်စင်စွမ်းအင် လုပ်ငန်းစဉ်တွေကို ငဲ့ညှာပေးတဲ့ အနေနဲ့ ဘိုင်ဒန်-ဟားရစ် အစိုးရက မဲခေါင်ဒေသမှာ အကြီးစား ရေအားလျှပ်စစ် ဆည်ကြီးတွေ တည်ဆောက်မှုကနေ ရှောင်ရှားပေးဖို့လည်း သူက​တောင်းဆိုခဲ့ပါတယ်။

ဒါမှသာ သံလွင်မြစ်ဟာ လွတ်လွတ်လပ်လပ်နဲ့ ဆက်လက် စီးဆင်းနိုင်မယ်လို့ ရှင်းပြခဲ့ပါတယ်။ ဒုတိယ သမ္မတ ဟားရစ်က ​စော​​ပေါလ်စိန်ထွားဆီက သတင်းစကားကို အသိအမှတ် ပြုခဲ့ပြီး ရာသီဥတုဆိုင်ရာ ရေရှည်တည်မြဲတဲ့ ဖြေရှင်းမှုတွေကို ဖော်ဆောင်ဖို့အတွက် ဒေသခံတွေရဲ့ အသံတွေကို နားစွင့်ဖို့ အရေးကြီးကြောင်း ပြောခဲ့ပါတယ်။

Public Service Announcement