ရှမ်းပြည်နယ်မြောက်ပိုင်း သိန္နီဒေသ၌ ယမန်နေ့က တိုက်ပွဲဖြစ်ပွားခဲ့ရာ စစ်ကောင်စီတပ်မှသေဆုံးထိခိုက်ရှိခဲ့ကြောင်း ကိုးကန့်တပ်မတော်(MNDAA)က သတင်းထုတ်ပြန်သည်။
ဒီဇင်ဘာ ၈ ရက် နံနက်က စစ်ကောင်စီတပ်မှ အင်အား ၁၀၀ခန့်ရှိ စစ်ကြောင်းသည် လားရှို- ကွမ်းလုံလမ်းကြောင်းရှိ မြန်မာအမျိုးသား ဒီမိုကရက်တစ်မဟာမိတ်တပ်မတော်(MNDAA) တပ်မဟာ (၂၁၁)၏ တပ်ရင်းအချို့ထံ ချဉ်းကပ်လာ၍ တိုက်ပွဲဖြစ်ခဲ့သည်ဟု ဆိုသည်။
မူပန်ခရိုင်(သိန္နီဒေသ၌) နေ့လည်ပိုင်းအထိတိုက်ပွဲဖြစ်ပွားခဲ့ရာ စစ်ကောင်စီတပ်မှ အနည်းဆုံး သုံးဦး သေဆုံးထိခိုက်ခဲ့ပြီး MNDAA ရဲဘော် နှစ်ဦး ဒဏ်ရာရခဲ့ကြောင်း အသိပေးထားသည်။
စစ်ကောင်စီတပ်နှင့် MNDAAတို့သည် နိုဝင်ဘာလကုန်ပိုင်းကလည်း MNDAA တပ်စွဲရာ ချင်းရွှေဟော်ဒေသ၌ တိုက်ပွဲဖြစ်ပွားခဲ့ရာ စစ်ကောင်စီတပ်က သေဆုံးထိခိုက်မှုများခဲ့သည်။ ချင်းရွှေဟော်ဒေသသို့ စစ်ကောင်စီတပ်က ထိုးစစ်ဆင်လာ၍ တိုက်ပွဲဖြစ်ပွားခဲ့ခြင်းဖြစ်ပြီး စစ်ကောင်စီထိုးစစ်ရပ်ထား၍ လတ်တလောတွင် တိုက်ပွဲငြိမ်နေကြောင်း ကိုးကန့်သတင်းရင်းမြစ်က ပြောကြားထားသည်။ ယင်းတိုက်ပွဲကြောင့် လောက်ကိုင်ရှိ အရပ်သားများလည်း ထွက်ပြေးတိမ်းရှောင်မှုများ ရှိခဲ့သည်။
Public Service Announcement
