ချင်းပြည်နယ် ပလက်၀မြို့နယ်နှင့် မတူပီမြို့နယ် အစပ်ရှိ စစ်ကောင်စီတပ်၏ ဂိတ်စခန်းကို ယမန်နေ့နံနက်က တိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်ရှိခဲ့ကြောင်း ပလက်၀ ချင်းကာကွယ်ရေးတပ်(CDF)က သတင်းထုတ်ပြန်သည်။
ဒီဇင်ဘာ ၁၆ရက် နံနက်ပိုင်းက စစ်ကောင်စီ၏ ဘွေလီဂိတ်စခန်းအား CDFက ဝင်ရောက် ပစ်ခတ်ခဲ့ရာ ၁၅မိနစ်ကြာ အပြန်အလှန်ပစ်ခတ်မှု ရှိခဲ့သည်ဟု ဖော်ပြထားသည်။
“ အရင်တုန်းကတည်းက အာဏာမသိမ်းခင်ကတည်းက ခိုင်ခိုင်မာမာရှိပြီးသားစခန်းဖြစ်ပါတယ်။ အဲဒီ စခန်းရှိတဲ့နေရာက မတူပီမြို့နယ်နဲ့ ပလက်၀ မြို့နယ်ကြားပေါ့။ ဒီကြားမှာရှိတဲ့ စခန်းက အာဏာသိမ်းတဲ့နောက်ပိုင်းမှာ ပြန်ပြီးတော့မှ အင်အား ပြန်တည်ဆောက်ပြီးမှ ခိုင်ခိုင်မာမာ ထပ်ပြီး တည်ဆောက်ထားတဲ့ စခန်းပေါ့။ အဲဒီစခန်းက လွန်ခဲ့တဲ့ ၅ရက်လောက်မှာ ကျွန်တော်တို့ရဲဘော်တွေကို ချောင်းမြောင်းပစ်တာတွေရှိတယ်။ ပစ်ခတ်တော့ ကျွန်တော်တို့ဘက်က တစ်ယောက်ကျတယ်။ အဲဒီနောက်ပိုင်း မနေ့က မနက်မှာ စခန်းရဲ့အောက်မှာ ထိုးထားတဲ့ဂိတ်စခန်းကို ကျနော်တို့ ဘက်က သွားရောက်ပစ်ခတ်တာ”ဟု ပလက်၀ CDF တာဝန်ရှိသူ တစ်ဦးက ပြောသည်။
အပြန်အလှန် ပစ်ခတ်မှုအတွင်း စစ်ကောင်စီတပ်မှ နှစ်ဦးသေဆုံးပြီး ငါးဦးထက်မနည်း ထိခိုက်ဒဏ်ရာရခဲ့ကြောင်း ပလက်၀ CDFက ထုတ်ပြန်သည်။
Public Service Announcement
စစ်ကောင်စီမှ လက်နက်ကြီးများ ရမ်းသမ်းပစ်ခတ်ခဲ့ရာ CDF ရဲဘော်များ ထိခိုက်မှုမရှိကြောင်း၊ ထိုသို့လက်နက်ကြီးများ ရမ်းပစ်၍ ဂိတ်အနီးရှိ ဘွေလီကျေးရွာ နှင့် တွီဆော့ကုန်းကျေးရွာနေ ပြည်သူများ ဘေးလွတ်ရာသို့ ထွက်ပြေးတိမ်းရှောင်ခဲ့ရကြောင်း အသိပေးဖော်ပြထားသည်။
(ပလက်ဝ CDF မှ ရဲဘော်များအား တွေ့ရစဉ်)
