စစ်ကောင်စီဘက်က ပြည်သူကို ထိခိုက်စေရန်လုပ်ဆောင်မှုများရှိနေဟုအသိပေး
စစ်ကောင်စီဘက်က ပြည်သူကို ထိခိုက်စေရန်လုပ်ဆောင်မှုများရှိနေဟုအသိပေးရန်ကုန်မြို့ ပန်းဆိုးတန်းမှ ဒလမြို့သို့ ကူးနေသည့် ချယ်ရီကူးတို့သင်္ဘောပေါ်၌ ယနေ့ည ၇နာရီခန့်က ဖြစ်ခဲ့သည့် ဗုံးဖောက်ခွဲမှုအား လုပ်ဆောင်ခဲ့သည့် ပုဂ္ဂိုလ်များနှင့် အဖွဲ့အစည်းများအား ပြင်းထန်စွာရှုတ်ချကြောင်း ဒလမြို့နယ် ပြည်သူ့ကာကွယ်ရေးတပ်(PDF)နှင့် မဟာမိတ်အင်အားစုများက ပူးတွဲထုတ်ပြန်သည်။
ယနေ့ ဖြစ်ပွားခဲ့သည့် ကူးတို့သင်္ဘောပေါ်ပေါက်ကွဲမှု ကြောင့် ပြည်သူအချို့ ထိခိုက်မှုရှိခဲ့ရာ လွန်စွာ စိတ်မကောင်းဖြစ်ရကြောင်း၊ ယင်းလုပ်ရပ်အား ကျူးလွန်သူများ တာဝန်ခံရမည်ဖြစ်ကြောင်း ဖော်ပြသည်။
ဒလ PDF နှင့် တော်လှန်ရေးအင်အားစုများ အနေဖြင့် ပြည်သူ့ဘက်တော်သားများပီပီ ယခုကဲ့သို့ ပြည်သူ၏ ရုပ်ပိုင်း၊ စိတ်ပိုင်းဆိုင်ရာ ထိခိုက်မှုများကို လုံး၀ ပြုလုပ်မည်မဟုတ်ကြောင်း အသိပေးခဲ့ပြီး ယင်းကဲ့သို့ ဖြစ်ရပ်များ ဆက်လက်ဖြစ်ပါက မသက်ဆိုင်ကြောင်း တော်လှန်ရေးအင်အားစုများက ထုတ်ပြန်သည်။
လတ်တလော အခြေအနေများအရ စစ်ကောင်စီနှင့် ဒလန်များက တော်လှန်ရေးအင်အားစုများအယောင်ဆောင်၍ ပြည်သူများကို ဖုန်းဖြင့် ခြိမ်းခြောက်ခြင်း၊ ကာယကံမြောက် ငွေညစ်ခြင်း၊ ပြည်သူများ ထိခိုက်နိုင်သည့် နေရာများ၌ ဖောက်ခွဲ ဖျက်ဆီးမှုများ ပြုလုပ်လာသည်ကို တွေ့ရသည်ဟု အသိပေးထားသည်။
Public Service Announcement
ဒလ PDFအနေဖြင့် တော်လှန်ရေး မဟာမိတ် အင်အားစုများ Local PDFများအပြင် မြို့နယ် ဌာနဆိုင်ရာများမှ ဖရဲသီးအချို့တို့ ပူးပေါင်းပြီး စစ်ကောင်စီနှင့် ထောက်တိုင်များကို အကြိမ်ပေါင်းများစွာ တိုက်ခိုက်ခဲ့ကြောင်း၊ ထိုသို့ တော်လှန်ရေးလုပ်ငန်းများ ဆောင်ရွက်ခဲ့သော်လည်း မြို့တွင်း အခြေအနေများကြောင့် မြို့သူ၊မြို့သားများ၏ အန္တရာယ်ကင်းရေးအပြင် စိတ်ပိုင်းဆိုင်ရာ လုံခြုံရေးကို ရှေးရှုကာထုတ်ဖော်မှုများ မလုပ်ခဲ့ကြောင်း ဒလ PDFက ထုတ်ပြန်သည်။
ယနေ့ ဖြစ်ခဲ့သည့် ပန်းဆိုးတန်း – ဒလ ကူးတို့သင်္ဘောပေါ် ပေါက်ကွဲမှု ကြောင့် ပြည်သူ ၁၇ ဦးထိခိုက်ဒဏ်ရာရရှိခဲ့သည်ဟု စုံစမ်းသိရှိရသည်။
ပြည်သူများ ထိခိုက်ဒဏ်ရာရစေသည့် ယင်းလုပ်ရပ်မှာ စစ်ကောင်စီနှင့် ပျူစောထီးများသာ လုပ်ဆောင်ခြင်းဖြစ်နိုင်ကြောင်း ဒလမြို့ခံတစ်ဦးက ပြောကြားသည်။
