ချယ်ရီကူးတို့သင်္ဘော ဗုံးပေါက်ကွဲမှု ၎င်းတို့နှင့်လုံးဝ မသက်ဆိုင်ဟု NUG ထုတ်ပြန်

ကျူးလွန်သူများကို ဖော်ထုတ်အရေးယူနိုင်ရေး ပြည်သူလူထုနှင့် လက်တွဲလုပ်ဆောင်သွားမည်ဟု အသိပေး

ရန်ကုန် – ဒလ ကူးတို့သင်္ဘောပေါ် ဗုံးပေါက်ကွဲမှုတွင် ထိခိုက်ဒဏ်ရာရခဲ့သည့် အရပ်သား ပြည်သူလူထုအတွက် ဝမ်းနည်းကြေကွဲစိတ်ထိခိုက်ရပြီး အဆိုပါ အကြမ်းဖက်လုပ်ရပ်မှာ ၎င်းတို့နှင့်လုံးဝ(လုံးဝ) သက်ဆိုင်ခြင်းမရှိကြောင်း အမျိုးသားညီညွတ်ရေးအစိုးရ(NUG)က ယနေ့ ထုတ်ပြန်သည်။

ဒီဇင်ဘာ ၁၈ ရက်က ထိခိုက်ဒဏ်ရာရသူများအားလုံး အမြန်ဆုံး သက်သာရာရပါစေကြောင်း အမျိုးသားညီညွတ်ရေးအစိုးရက ဆုမွန်ကောင်းတောင်းနေသလို ဘေးဒဏ်သင့်ရသူများ၏ မိသားစုများနှင့် ထပ်တူရှိနေပါကြောင်းလည်း ဖော်ပြထားသည်။

အဆိုပါ အကြမ်းဖက်လုပ်ရပ်ကို အပြင်းထန်ဆုံး စကားလုံးများဖြင့် ပြစ်တင်ရှုတ်ချသည်နှင့် တချိန်တည်းမှာပင် အမှန်တကယ် ကျူးလွန်သူများကို ဖော်ထုတ်အရေးယူနိုင်ရေး ပြည်သူလူထုနှင့် လက်တွဲလုပ်ဆောင်သွားမည်ဟုလည်း ထပ်မံ အသိပေးထားသည်။

ထို့အပြင် အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာနအနေဖြင့် ပြည်သူ့ကာကွယ်ရေး တပ်မတော်သားများ လိုက်နာရမည့် စစ်သည်တော်ကျင့်ဝတ်များ ချမှတ်ထားပြီးစစ်ရေးဆိုင်ရာ ပစ်မှတ်သတ်မှတ်ချက်တွင်လဲ အရပ်သားပြည်သူများအား ခြိမ်းခြောက်ခြင်း၊ ပစ်မှတ်ထား တိုက်ခိုက်ခြင်း မပြုရဟု တရားဝင် ပြဌာန်းထားပြီးဖြစ်သည်ဟု ‌ပါရျိသည်။

Public Service Announcement

အရပ်သားလူထု ဘေးအန္တရာယ် ထိခိုက်စေနိုင်သည့် အခြေအနေရှိပါက အကြမ်းဖက်စစ်ကောင်စီကိုတိုက်ခိုက်ရေး စီစဉ်ထားသည့် လုပ်ငန်းများကိုပင် ပယ်ဖျက်ခဲ့ဖူးသည့်သာဓက အမြောက်အများရှိပြီးဖြစ်သည်ဟု အသိပေးထားသည်။

ထို့အပြင် စစ်အာဏာရှင်တို့သည် ယင်းတို့အာဏာ တည်မြဲရေးအတွက် ပြည်သူလူထု၏စိတ်သဏ္ဍာန်တွင် အကြောက်တရားနှင့် စိုးရိမ်ထိတ်လန့်မှုများ အဆက်မပြတ် ဖြစ်ပေါ်နေစေရေး နည်းလမ်းပေါင်းစုံဖြင့် လုပ်ကိုင်ဆောင်ရွက်ခဲ့သည့် အတိတ်ဖြစ်ရပ်များစွာ သာဓကအနေဖြင့် ရှိခဲ့ပြီးဟု ဆိုသည်။

ဆက်လက်လုပ်ဆောင်ရန်လဲ ဝန်မလေးကြောင်း လက်ရှိအကြမ်းဖက်စစ်အုပ်စုက သက်သေပြပြီး ဖြစ်၍ ပြည်သူလူထုအနေဖြင့် ယခုကဲ့သို့ ဝမ်းနည်းဖွယ်ဖြစ်ရပ်မျိုးကို ရှောင်ရှားနိုင်ရေး မပြတ်သောသတိဖြင့် နေထိုင်လုပ်ကိုင်ကြပါရန် တိုက်တွန်းထားသည်။

ဒီဇင်ဘာ ၁၈ရက် ညနေပိုင်းက ရန်ကုန်မြို့ရှိ ပန်းဆိုးတန်းမှ ဒလမြို့နယ်ဘက်သို့ ကူးသန်းပြေးဆွဲသည့် ချယ်ရီကူးတို့ သင်္ဘောပေါ်တွင် ဗုံးပေါက်ကွဲမှုဖြစ်ပွားပြီး ပြည်သူ ၁၇ဦး ထိထိုက်ဒဏ်ရာရခဲ့သည်။