▪︎သမ္မတ၊ဝန်ကြီးချုပ် နှင့်ဝန်ကြီးအချို့မြေပြင်၌ ရှိနေပြီး PDFများနှင့်တွေ့ဆုံခြင်း၊အားပေးခြင်းတို့ ပုံမှန်လုပ်နေ
▪︎နှစ်သစ်၌ စစ်ကောင်စီ၏ နိုင်ငံရေးလှည့်ကွက်သုံးမှုကြုံရနိုင်၍ ပြည်သူနှင့် တော်လှန်ရေးအင်အားစုများ တွေဝေခြင်းမရှိကြရန် တိုက်တွန်း
စစ်အာဏာရှင်ဖြုတ်ချရေးအတွက် လာမည့်နှစ်သစ်တွင် တော်လှန်ရေးအရှိန်မြှင့်ရန်ရှိကြောင်းအမျိုးသားညီညွတ်ရေးအစိုးရ ဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ပြောကြားသည်။
ပြည်ထောင်စုဝန်ကြီးချုပ် မန်းဝင်းခိုင်သန်းက ကရင်အမျိုးသားအစည်းအရုံး(KNU) တပ်မဟာ(၆)နယ်မြေ၌ ယမန်နေ့ ဒီဇင်ဘာ ၂၅ရက်တွင် ကျင်းပခဲ့သည့် ကော်ဘရာစစ်ကြောင်း၏ စစ်သင်တန်းဆင်းပွဲသို့ တက်ရောက်ကာ တောင်ပိုင်းစစ်ဒေသသို့ ပေးအပ်မည့် လက်နက် အလက် ၅၀ကို ကော်ဘရာဒုစစ်ကြောင်းမှူးထံ ပေးအပ်ခဲ့သည်။
အဆိုပါဆောင်ရွက်ချက်နှင့်ပတ်သက်ပြီးဝန်ကြီးချုပ်ရုံးပြောရေးဆိုခွင့်ရှိသူအား မေးမြန်းရာ တောင်ပိုင်းစစ်ဒေသသို့ လက်နက်များပေးအပ်ခြင်းသည်လည်းအစိုးရ၏တစ်နှစ်စီမံချက် ( စစ်အာဏာရှင် ဖြုတ်ချရေး ဘက်ပေါင်းစုံမှ ထိုးစစ်ဆင်မည့်တစ်နှစ်တာစီမံချက်) ၏အစိတ်အပိုင်းတစ်ခုဖြစ်ကြောင်းဖြေကြားသည်။ အစိုးရအနေဖြင့်ကာကွယ်ရေးဝန်ကြီးဌာန အောက်ရှိ PDF များကို တက်နိုင်သမျှ လက်နက်တပ်ဆင်ပေးရန် ကြိုးပမ်းလျက်ရှိကြောင်းလည်း ၎င်းက ဆက်ပြောသည်။
“လာမယ့်နှစ်သစ်မှာ NUG အနေနဲ့တိုင်းရင်းသားမဟာမိတ်တွေနဲ့ရောအခြားတော်လှန်ရေးအင်အားစုတွေနဲ့ရော ပူးပေါင်းပြီးတော့ တော်လှန်ရေးကို အရှိန်မြှင့်ဖို့ရှိမယ်ပေါ့နော်။ အခုဆိုရင်နိုင်ငံခြားရေးကဏ္ဍမှာဆိုရင်လည်းအများကြီး တိုးတက်ပြောင်းလဲမှုတွေရှိလာသလိုလာမယ့်နှစ်သစ်မှာ အခြားစစ်ရေးအရရော ဘဏ္ဍာရေးအရရောလှုပ်ရှားမှုတွေခပ်စိပ်စိပ်တွေ့လာရဖို့ရှိပါတယ်” ဟု ဦးနေဘုန်းလတ်ကပြောကြားသည်။
Public Service Announcement
လက်ရှိတွင် အမျိုးသားညီညွတ်ရေးအစိုးရခေါင်းဆောင်များသည် မြေပြင်၌ရှိနေပြီး ပြည်သူ့ကာကွယ်ရေးတပ်ဖွဲ့ဝင်များနှင့် ပုံမှန်တွေ့ဆုံလျက်ရှိသည်ဟုဆိုသည်။
“အမျိုးသားညီညွတ်ရေအစိုးရရဲ့သမ္မတကြီးရော၊ဝန်ကြီးချုပ်ရော အခြား ပြည်ထောင်စုဝန်ကြီးအချို့ဆိုရင်လည်း မြေပြင်မှာ ရှိနေပြီးတော့ ဒီလိုမျိုး အလျဉ်းသင့်သလို PDFတွေနဲ့ သွားရောက်တွေ့ဆုံတာတွေ၊ အားပေးစကားပြောတာမျိုးတွေ ဒါမျိုးတွေ ပုံမှန်လုပ်နေပါတယ်” ဟု ဦးနေဘုန်းလတ်က ပြောသည်။
တည်နေရာများအား သိရှိမည်စိုး၍ တွေ့ဆုံမှုတိုင်းအား သတင်းထုတ်ပြန်လို့မရ၍ သွားရောက်တွေ့ဆုံမှုတိုင်းအား သတင်းမထုတ်ပြန်ခဲ့ဟုလည်းဆက်ပြောသည်။
တော်လှန်ရေး အရှိန်မြှင့်မည့် အခြေအနေတွင် စစ်ကောင်စီတပ်ဘက်ကလည်း လှည့်ကွက်များအသုံးပြု တုန့်ပြန်လာနိုင်မှု အခြေအနေကိုလည်းဦးနေဘုန်းလတ်ကသတိပေးသည်။
“အဓိကတစ်ခုပြောချင်တာကလာမယ့်နှစ်သစ်ကျရင်အကြမ်းဖက် စစ်အုပ်စုဘက်ကလည်းတစုံတရာနိုင်ငံရေး လှည့်ကွက်သုံးတာမျိုးတွေ ကြုံရနိုင်ပါတယ်။ အဲဒီတော့ဒီလိုမျိုးလုပ်လာတဲ့အခါပြည်သူတွေအနေနဲ့တော်လှန်ရေးအင်အားစုတွေအနေနဲ့ရော တွေဝေသွားတာမျိုး တုံ့ဆိုင်းသွားတာမျိုး ဝေဝါးသွားတာမျိုးမရှိဘဲနဲ့ ပန်းတိုင်ကိုအရောက် စိတ်ပြတ်ပြတ်သားသားနဲ့ ဆက်လက် ချီတက်ကြဖို့လိုပါမယ်ဗျ” ဟု ဦးနေဘုန်းလတ်ကပြောသည်။
အမျိုးသားညီညွတ်ရေးအစိုးရအနေဖြင့်စစ်အာဏာရှင်ဖြုတ်ချရေး အဆုံးအဖြတ်တိုက်ပွဲကာလကိုတစ်နှစ်သတ်မှတ်ထားပြီး စစ်ရေး၊ နိုင်ငံရေး၊ သံတမန်ရေးအပါအဝင် ဘက်ပေါင်းစုံမှ ထိုးစစ်ဆင်သွားမည်ဖြစ်ကြောင်း ၂၀၂၂ ခုနှစ်အောက်တိုဘာ ၇ရက်တွင်ကြေညာထားသည်။
