ကရင်အမျိုးသားအစည်းအရုံး(KNU) ဒူးပလာယာခရိုင် တပ်မဟာ(၆)နယ်မြေ၌ တစ်ပတ်အတွင်း တိုက်ပွဲ (၁၁)ကြိမ်ထက်မနည်းဖြစ်ခဲ့ပြီး စစ်ကောင်စီတပ်မှ ၅၆ဦးထက်မနည်းသေဆုံးကာ ၄၀ကျော် ဒဏ်ရာရခဲ့ကြောင်း ဒူးပလာယာခရိုင်က ယနေ့ သတင်းထုတ်ပြန်သည်။
KNUဦးဆောင်သည့် ပူးပေါင်းတပ်ဖွဲ့နှင့် စစ်ကောင်စီတပ်တို့သည် ဒီဇင်ဘာ ၁၆ရက်ကစပြီး ကော့ကရိတ်ဒေသ၌ တိုက်ပွဲဖြစ်ပွားခဲ့ရာ ဒီဇင်ဘာ ၂၂ ရက်မှ ၂၈ရက်အတွင်း တိုက်ပွဲဖြစ်ပွားခဲ့မှုများကို ဖော်ပြခဲ့ခြင်းဖြစ်သည်။ ကော့ကရိတ်တိုက်ပွဲ၌ ပူးပေါင်းတပ်ဘက်က ကျဆုံးထိခိုက်မှု အချို့ရှိသော်လည်း ယနေ့ သတင်းထုတ်ပြန်ချက်၌ ဖော်ပြမထားပေ။
တိုက်ပွဲကာလအတွင်း စစ်ကောင်စီတပ်၏ လက်နက်ကြီးပစ်ခတ်မှုကြောင့် အရပ်သားသေဆုံးထိခိုက်မှုနှင့် အိုးအိမ်ပျက်စီးမှုများရှိခဲ့ကြောင်း ဖော်ပြသည်။
ဒီဇင်ဘာ၂၄ ရက် ညပိုင်းတွင် စစ်ကောင်စီတပ်၏ လက်နက်ကြီးကြောင့် အရပ်သားတစ်ဦး ဒဏ်ရာရခဲ့ပြီး ဒီဇင်ဘာ ၂၅ရက်တွင်လည်း စစ်ကောင်စီတပ်၏ လက်နက်ကြီးပစ်ခတ်မှုကြောင့် ရွှေကြပ်မင်း ဘုန်းကြီးကျောင်းမှ သံဃာတော် တစ်ပါး ပျံလွန်တော်မူခဲ့ပြီး သံဃာ သုံးပါးနှင့် အမျိုးသား တစ်ဦး ဒဏ်ရာရခဲ့သည်ဟု ထုတ်ပြန်ထားသည်။
Public Service Announcement
စစ်ကောင်စီတပ်သည် လေကြောင်းမှ ပစ်ခတ်တိုက်ခိုက်မှုများ လုပ်ဆောင်ခဲ့ကြောင်းလည်း ဖော်ပြထားသည်။ဒီဇင်ဘာ ၂၇ရက်တွင် ကော့နွဲ့ရွာ တံတားနှင့် ရွာသစ်ကုန်းကျေးရွာ တဝိုက်သို့ လေကြောင်း တိုက်ခိုက်မှုပြုလုပ်ခဲ့ပြီး ဒီဇင်ဘာ ၂၈ရက်တွင်လည်း ရွာသစ်ကုန်းဒေသအား ပေါင် ၅၀၀ဗုံးများ အသုံးပြုတိုက်ခိုက်ခဲ့ကြောင်း အသိပေးထားသည်။
ကော့ကရိတ်ဒေသ တိုက်ပွဲများကြောင့် ဒေသခံများလည်း စစ်ဘေးတိမ်းရှောင်နေရပြီး လူဦးရေ ထောင်ချီရှိနေကာ အရေးပေါ်အကူအညီများ လိုအပ်လျက်ရှိသည်ဟု ဒေသခံက ပြောသည်။
