စစ်ကိုင်းတိုင်း၊ အရာတော်မြို့နယ်၊ နောင်ကြီးအိုင် ကျေးရွာတွင် အထိုင်ချထားသော စစ်ကောင်စီစခန်းအား လက်နက်ကြီးဖြင့် ပစ်ခတ်တိုက်ခိုက်ခဲ့ကြောင်း လျှပ်စီးမိုးကြိုးမုန်တိုင်းတပ်ဖွဲ့က ထုတ်ပြန်သည်။
ယမန်နေ့(ဒီဇင်ဘာ ၃၁ ရက်)နံနက် ၆ နာရီခန့်က နောင်ကြီးအိုင်ကျေးရွာတွင် အထိုင်ချနေထိုင်လျက်ရှိသော စစ်သားနှင့်ရဲများ၏ စခန်းအား(၄၀) မမ ဖြင့် သွားရောက်ပစ်ခတ်တိုက်ခိုက်ခဲ့ခြင်းဖြစ်ကြောင်း လျှပ်စီးမိုးကြိုးမုန်တိုင်းတပ်ဖွဲ့က အသိပေးသည်။
အဆိုပါ စစ်ကောင်စီတပ်သားနှင့်ရဲများသည် ပြည်သူများ၏ အဖိုးတန်ပစ္စည်းများကို ခိုးယူရောင်းချခြင်း၊ ပြည်သူ့နေအိမ်များအား မီးရှို့ဖျက်ဆီးခြင်းများ ပြုလုပ်နေကြောင်း၊ ဒီဇင်ဘာ ၂၃ရက် က အရာတော်တပ်မှ ထွက်လာသော ၅၀ခန့်ဖြင့် အင်အားထပ်တိုးထားပြီးအောင်သုခကျေးရွာရှိ နေအိမ်များကိုလည်းမီးရှို့ဖျက်ဆီးခဲ့ကြောင်း လျှပ်စီးမိုးကြိုးမုန်တိုင်းတပ်ဖွဲ့၏ ထုတ်ပြန်ချက်တွင် ဖော်ပြသည်။
စစ်ကောင်စီဘက်ကလည်း လက်နက်ကြီးဖြင့် ပြန်လည်ပစ်ခတ်ခဲ့ပြီး ရဲဘော်များ အထိခိုက်မရှိဆုတ်ခွာနိုင်ခဲ့သည်ဟု ဆိုသည်။
Public Service Announcement
အဆိုပါ စစ်ဆင်ရေးအား လျှပ်စီးမိုးကြိုး မုန်တိုင်း တပ်ဖွဲ့နှင့် ပကဖ ရဲဘော်များက ပူးပေါင်းတိုက်ခိုက်ခဲ့ပြီး စစ်အုပ်စုထိခိုက်မှု အတိအကျမသ်ိရသေးကြောင်း အသိပေးထားသည်။
ဖြစ်စဥ်နှင့်ပတ်သက်၍ လျှပ်စီးမိုးကြိုးမုန်တိုင်းတပ်ဖွဲ့ထံ ဆက်သွယ်မေးမြန်းထားပြီး ပြန်လည် ဖြေကြားခြင်း မရှိသေးပေ။
