မကွေးတိုင်း၊ ချောက်မြို့နယ်ရှိ အဓမ္မငွေတောင်းခံနေသော မြို့နယ်စည်ပင်ရုံးနှင့် လျှပ်စစ်ရုံးအား မဟာမိတ်အဖွဲ့များနှင့် ပူးပေါင်းပြီး အဖွဲ့ခွဲကာ တစ်ချိန်တည်း ပစ်ခတ်သတိပေးခဲ့ကြောင်း ချောက်မြို့နယ် ပြောက်ကျားတပ်ဖွဲ့ Chauk Guerilla Force၏ ဒုခေါင်းဆောင် ဗိုလ်ပေတက ပြောသည်။
ဇန်နဝါရီ ၅ရက် ညနေ ၆နာရီခန့်က ချောက်မြို့နယ်မြို့တွင်း၌ ရှိသည့် စည်ပင်ရုံးအား လက်ပစ်ဗုံး ပစ်သွင်းခဲ့ပြီး ချို့ယွင်းမှုဖြစ်၍ မကွဲသောကြောင့် ရုံးမှန်များအား ငါးချက်ပစ်ခတ်ကာ သတိပေးခဲ့ကြောင်း၊ မြို့အထွက်ရှိ လျှပ်စစ်ရုံးကိုလည်း သုံးချက်ပစ်၍ သတိပေးခဲ့ကြောင်း Chauk Guerilla Force၏ ဒုခေါင်းဆောင် ဗိုလ်ပေတက ပြောသည်။
ထိုသို့ပစ်ခတ်မှုကြောင့် စည်ပင်ရုံးမှန်အချို့ကွဲအက်သွားပြီး အခြားထိခိုက်မှုစုံစမ်းနေသည်ဟု ဗိုလ်ပေတက ပြောသည်။
ချောက်စည်ပင်သည် အခွန်အခ အဆမတန် ကောက်ခံခြင်း၊ ရေမီတာအခွန်အခများကို နည်းမျိုးစုံဖြင့် လိမ်လည်ကာ ဒဏ်ကြေးများ အဆမတန်ရိုက်၍ ကောက်ခံနေသည်ဟု ဆိုသည်။
Public Service Announcement
မြို့နယ်လျှပ်စစ်ရုံးသည်လည်း မီတာခများအတင်းအကျပ်ကောက်ခံခြင်း၊ မပေးဆောင်နိုင်သေးသော အိမ်များရှိ မီတာများအား ဖြုတ်ရန်ခြိမ်းခြောက် ခြင်းတို့ ပြုလုပ်နေကြောင်း ပြည်သူများက တိုင်ကြားလာ၍ နှစ်ရုံးလုံးအား သတိပေး ပစ်ခတ်ခဲ့ခြင်း ဖြစ်ကြောင်း ဒုခေါင်းဆောင် ဗိုလ်ပေတက ပြောသည်။
“ဘာကြောင့် လုပ်ရသလဲဆိုတော့ အခွန်ဘဏ္ဍာ အများဆုံးကောက်ခံရတဲ့ ငှာန နှစ်ခုဖြစ်တာရယ် ပြည်သူတွေကိုနည်းမျိုးစုံနဲ့ စိတ်ဆင်းရဲ ကိုယ်ဆင်းရဲ ဖြစ်နေအောင် လုပ်နေတာရယ်။ အခွန်အခတွေကိုလည်း မလိမ့်တပတ်လုပ်ပြီး ပိုတောင်း ဒဏ်ကြေးတွေ လျှောက်ရိုက် ရေဘုံပိုင်တွေဖြတ်သိမ်း လျှပ်စစ်မီတာတွေကို အကြေမဆောင်နိုင်ရင် ဖျတ်သိမ်းမယ်လို့ ငြိမ်းခြောက်နေတာတွေကြောင့် ပြည်သူလူထုက ကျွန်တော်တို့ C.G.F ကို လာရောက်တိုင်ကြားတာတွေရှိလို့ နောက်နောင် ဆက်လက်ဒုက္ခမပေးနိုင်စေရန်သတိပေးပစ်ခတ်ခဲ့ခြင်းဖြစ်ပါတယ်။”ဟု ဗိုလ်ပေတက ပြောသည်။
ပြည်သူကိုဆက်လက်ဒုက္ခပေးနေပါကလုံးဝ ငဲ့ညှာတော့မည်မဟုတ်ကြောင်း ချောက်မြို့နယ် ပြောက်ကျားတပ်ဖွဲ့ CGFက သတိပေးသည်။
အဆိုပါ စစ်ဆင်ရေးကို (C-G-F)ချောက်မြို့နယ် ပြောက်ကျားတပ်ဖွဲ့နှင့် မဟာမိတ်များဖြစ်သော King fighter KF (People defense force) (မြိုင်)၊ ( Hunter Dragon Group )၊ ရေနံချောင်းဖေကံကောင်း၊ Nway Oo FM(online ထောက်ပို့) တို့နှင့်ပူးပေါင်းကာ ဆောင်ရွက်ခဲ့ကြောင်း အသိပေးထားသည်။
