ပြည်သူအချို့ကိုလည်း လူသားဒိုင်းအဖြစ် စစ်ကြောင်းတလျှောက် ဖမ်းဆီးခေါ်ဆောင်သွားဟုဆို
စစ်ကိုင်းတိုင်း၊ ရေဦးမြို့နယ်အနောက်ခြမ်းတွင် စစ်ကောင်စီတပ် စစ်ကြောင်းကြောင့် ကျေးရွာပေါင်း ၁၄ ရွာထက်မနည်း ထွက်ပြေးတိမ်းရှောင်နေရပြီး ပြည်သူအချို့ကိုလည်း လူသားဒိုင်းအဖြစ် ဖမ်းဆီးခေါ်ဆောင်သွားကြောင်း ဒေသတွင်း သတင်းရင်းမြစ်များက ပြောသည်။
စစ်ကောင်စီတပ်သည် ဇန်နဝါရီ ဒုတိယအပတ်တွင် ဒီပဲယင်းနယ်မှတဆင့် ရေဦးမြို့နယ်ဘက်သို့ ကူးသန်းလာရာ လက်နက်ကြီးများဖြင့်ပစ်ခတ်ဝင်ရောက်လာပြီး မီးရှို့ဖျက်ဆီးမှုများ ပြုလုပ်ခဲ့သည်။
စစ်ကောင်စီတပ်က စစ်ကြောင်းနှစ်ကြောင်းခွဲကာ စစ်ကြောင်းထိုးခဲ့၍ ယမန်နေ့ညပိုင်းအထိ ရေဦးနယ်အနောက်ခြမ်းရှိ ခြုံရွာ၊ကျီကုန်း၊ ဇီးကုန်း၊ မစိုးရိမ်၊ ရွာမိဿာ၊ ပေါက်တော၊ မုတ်စီ၊ အောင်သာ၊ မူးဆုံ၊ ငွတ်တုံ၊ နှောကုန်း၊ ကုန်းသာ၊ ရွာသစ်၊ ချမ်းသာ စသည့် ကျေးရွာပေါင်း ၁၄ ရွာထက်မနည်း ပြည်သူထောင်ချီ ထွက်ပြေးတိမ်းရှောင်နေရကြောင်း ရေဦးမြို့နယ် စစ်ရှောင်ပြည်သူ ထောက်ပံ့ရေးအဖွဲ့က ပြောသည်။
စစ်ကောင်စီတပ်သည် ယနေ့ (ဇန်နဝါရီလ ၁၄ ရက်) နံနက်ပိုင်းတွင် စစ်ကြောင်းနှစ်ခုပေါင်းသွားခဲ့သည်။
နံနက် ၁၁ နာရီခွဲဝန်းကျင်တွင် ကုန်းသာ၊ ရွာသစ်သို့ လက်နက်ကြီး လက်နက်ငယ်များ ဆက်တိုက် ပစ်ခတ်ကာဝင်ရောက်နေပြီး ကုန်းသာမြောက်ပိုင်း၌ မီးရှို့နေပြီဖြစ်ကြောင်း ဒေသခံများက ပြောသည်။
“စစ်ကြောင်း ၂ခုပေါင်း လူသားဒိုင်းများ အပါအဝင်အင်အား ၂၀၀ နီးပါးခန့်ရှိပါတယ်။”ဟု ရေဦးမြို့နယ် စစ်ရှောင်ပြည်သူ ထောက်ပံ့ရေးအဖွဲ့က ပြောသည်။
စစ်ကောင်စီတပ်သည် ဇန်နဝါရီ ၁၁ရက်တွင် ရေဦးနယ်၊လျှော်ဖြူရွာအား မီးရှို့ဖျက်ဆီးခဲ့ပြီး နေအိမ်(၈၅)လုံးခန့် မီးလောင်ပျက်ဆီးခဲ့သည်။
ယမန်နေ့ (ဇန်နဝါရီ ၁၃ရက်) မွန်းလွဲပိုင်းတွင် ဒီပဲယင်းစခန်းက ထွက်လာသော စစ်ကြောင်းသည် ရေဦး – ဒီပဲယင်း ကားလမ်းမဘေး ညောင်လှ၊ မူးဆုံဘက်သို့ ရောက်ရှိလာပြီး ကားလမ်းဘေးရှိနေအိမ်များ စျေးဆိုင်ခန်းများကို မီးရှို့ဖျက်ဆီးခဲ့သည်။