အာဏာသိမ်းစစ်ကောင်စီက ပြင်ဆင်နေသည့် အတုအယောင်ရွေးကောက်ပွဲနီးလာသည်နှင့်အမျှ မြို့ပြစစ်ရေးလှုပ်ရှားမှုများ ပိုများလာနိုင်သောကြောင့် ပြည်သူများအနေဖြင့် သတိပြု သွားလာနေထိုင်ကြရန် ရန်ကုန်မြို့အခြေစိုက် Yangon People’s Defense Force – YPDF (Urban Guerrilla)က အသိပေးလိုက်သည်။
တရားမဝင် ရွေးကောက်ပွဲနှင့်စပ်လျဥ်းပြီး စစ်ကောင်စီက ရန်ကုန်မြို့ ရပ်ကွက်၊ ကျေးရွာအနှံ့ လူဦးရေသန်းခေါင် စာရင်းများ ကောက်ယူလျှက်ရှိရာ ယခင်ကကဲ့သို့ ပုံမှန်တိုက်ခိုက်မှုမျိုးမဟုတ်တော့ဘဲ UGများနှင့် ထိပ်တိုက်တွေ့လာတော့မည်ဟု ဆိုသည်။
“သမရိုးကျတိုက်တဲ့ အချိန်၊ နေရာအပြင် အခုက ရပ် ကွက်တွေထဲမှာပါ ဖြစ်နိုင်ခြေများလို့ အသိပေးရခြင်းဖြစ်ပါတယ်ဗျ”ဟု YPDFမှ တော်လှန်ရေးရဲဘော်တစ်ဦးက ပြောသည်။
လက်ရှိတွင် စစ်ကောင်စီက စီစဥ်နေသည့် ရွေးကောက်ပွဲအား ဆန့်ကျင်သည့်အနေဖြင့် ရန်ကုန်၊ မန္တလေးစသည့် မြို့ကြီးများသာမက နိုင်ငံအဝန်းတွင် လူဦးရေသန်းခေါင် စာရင်းကောက်ယူနေသည့်အပေါ် တော်လှန်ရေးအင်အားစုများက ပစ်မှတ်ထားတိုက်ခိုက်လျှက်ရှိသည်။
Public Service Announcement
“အခု လူဦးရေစားရင်းအကြောင်းပြ အိမ်တိုင်းဝင် ရှာ၊ လူငယ်တွေ့တာနဲ့ရစ်နေပုံနဲ့ဆို ထိပ်တိုက်တွေ့ကြတော့မယ့်အနေအထားပါ”ဟု YPDFမှ တော်လှန်ရေးရဲဘော်က သုံးသပ်သည်။
ထို့ကြောင့် ပြည်သူများအနေဖြင့် လုံးဝအားလျှော့ စိတ်ပျက်မသွားဘဲ နွေဦးတော်လှန်ရေးကြီးတွင် တတ်နိုင်သည့်ဘက်မှ ပါဝင်ကူညီကြရန်နှင့် အာဏာသိမ်း အကြမ်းဖက်စစ်ကောင်စီအား ရရာနည်းဖြင့် ဆန့်ကျင်တော်လှန်ကြရန် တော်လှန်ရေးအင်အားစုများက တိုက်တွန်းထားသည်။
