'/%3E%3C/svg%3E){kind=small}
▪︎စစ်ကောင်စီ၏ တရားမဝင်ရွေးကောက်ပွဲဖြစ်မြောက်အောင်လိုက်ပါဆောင်ရွက်နေသူများကိုဆက်လက်အရေးယူမည်
စစ်ကိုင်းတိုင်းမြောင်မြို့နယ်တွင်မဲစာရင်းလာရောက်ကောက်ယူသော အထွေထွေအုပ်ချုပ်ရေးဦးစီးဌာန ဝန်ထမ်း (၄) ဦးကို ဖမ်းဆီးရမိခဲ့ကြောင်းအမျိုးသားညီညွတ်ရေးအစိုးရ(NUG) ပြည်ထဲရေးနှင့် လူဝင်မှု ကြီးကြပ်ရေးဝန်ကြီးဌာနက ယနေ့ည ထုတ်ပြန်သည်။
ဇန်နဝါရီလ(၁၄)ရက်နေ့ကအကြမ်းဖက်စစ်ကောင်စီလက်အောက်ခံ အထွေထွေအုပ်ချုပ်ရေးဦးစီးဌာန မှ အမျိုးသမီးဝန်ထမ်း(၃)ဦး၊ အမျိုးသားဝန်ထမ်း(၁)ဦး၊ စုစုပေါင်း (၄)ဦးသည် စစ်ကောင်စီကျင်းပပြုလုပ်မည့် အတုအယောင်ရွေးကောက်ပွဲအတွက် မဲစာရင်းကိစ္စဖြင့်လာရောက်ရာ စစ်ကိုင်းခရိုင် တပ်ရင်း(၅ ) MRA (Myaung Revolutoin Army) က ဖမ်းဆီးခဲ့ခြင်းဖြစ်သည်ဟု ဖော်ပြထားသည်။
အဆိုပါ ထွေအုပ်ဝန်ထမ်း (၄) ဦးအား စစ်ကိုင်းခရိုင်ပြည်သူ့အုပ်ချုပ်ရေးအဖွဲ့မှ အကြမ်းဖက်တိုက်ဖျက်ရေးဥပဒေနှင့် အညီ အပြစ်ပေးအရေးယူနိုင်ရေးအတွက် စီစဉ်ဆောင်ရွက်လျက်ရှိကြောင်း အသိပေးသည်။
“NUGက ပြည်ထောင်စုသမ္မတ မြန်မာနိုင်ငံရဲ့ တရားဝင်အစိုးရဖြစ်တယ်။ အဲဒီတော့ NUGက ရှင်းရှင်းလေးပဲဒီ အကြမ်းဖက်စစ်ကောင်စီလုပ်နေတဲ့တရားမဝင်အတုအယောင် ရွေးကောက်ပွဲနဲ့ ပတ်သက်ပြီး NUGက အစိုးရ တစ်ရပ်အနေနဲ့ပဲစဉ်းစားပြီး လုပ်ကိုင်မှာ ဖြစ်တယ်။ အဲဒီ အတွက်ကြောင့် အကြမ်းဖက် စစ်ကောင်စီ လုပ်တဲ့ တရားမဝင် အတုအယောင်ရွေးကောက်ပွဲမှာ ပြည်သူလူထုကိုတော့ ကျနော်တို့ကမေတ္တာရပ်ခံတဲ့ သဘောပဲရှိတယ်။ ဒါပေမဲ့ ပူးပေါင်းဆောင်ရွက်နေတဲ့သူတွေ အဲဒါတွေ အကုန်လုံးကို ကျနော်တို့က အခုလိုမျိုးပဲ ဖမ်းဆီးမယ်။ ဥပဒေအရ တရားစွဲမယ်။ ပြီးရင်တော့ အရေးယူဆောင်ရွက်မှာ ဖြစ်ပါတယ်” ဟု ပြည်ထောင်စု ဝန်ကြီးချုပ်ရုံးပြောရေးဆိုခွင့်ရှိသူ ဦးနေဘုန်းလတ်ကပြောကြားသည်။
Public Service Announcement
ကားမောင်းသည့်ထွေအုပ်ဝန်ထမ်းအမျိုးသားတစ်ဦးနှင့်အမျိုးသမီးနှစ်ဦးကို နံနက် ၁၀ နာရီခန့်က ဖမ်းမိခဲ့ပြီး၎င်းတို့၏ ထွက်ဆိုချက်အရ နောက်ထပ်တစ်ဦးကို ထပ်မံဖမ်းဆီးခဲ့ခြင်းဖြစ်သည်ဟု မြောင်မြို့နယ်မှ ပြည်သူ့ကာကွယ်ရေးတပ်ဖွဲ့ဝင်တစ်ဦးကလည်းပြောသည်။
စစ်ကောင်စီအနေဖြင့် ဇန်နဝါရီ ၇ရက်ကစ၍ ဒေသအသီးသီးတွင် လူဦးရေစာရင်းကောက်ယူလျက်ရှိသည်။ စစ်ကောင်စီက ၂၀၀၈ ဖွဲ့စည်းပုံအခြေခံဥပဒေကို အသက်သွင်းရန်နှင့် ၎င်းတို့ အာဏာဆက်လက် ရယူနိုင်ရေးအတွက် ရည်ရွယ်ပြီး ဆောင်ရွက်မည့် အတုအယောင်ရွေးကောက်ပွဲအတွက် လူဦးရေစာရင်း ကောက်ယူမှုကို ပြည်သူများ ပူးပေါင်းပါဝင်ခြင်းပြုရန် တော်လှန်ရေးအင်အားစုများက တိုက်တွန်းထားသည်။ စစ်ကောင်စီ၏ ရွေးကောက်ပွဲ ဖြစ်မြောက်ရေး အားပေးအားမြောက်ပါဝင်နေသူများကို အရေးယူမည်ဖြစ်ကြောင်းလည်း သက်ဆိုင်ရာဒေသရှိ ပြည်သူ့ကာကွယ်ရေးတပ်ဖွဲ့များ၊ ပြည်သူ့အုပ်ချုပ်ရေးအဖွဲ့များက အသိပေးထားသည်။
“MOHAIရဲ့ ထုတ်ပြန်ချက်ထဲမှာလည်း နှစ်ချက်ပါတယ်။ ပြည်သူလူထုကတော့ အကြမ်းဖက်စစ်ကောင်စီက အတင်းဖိအားပေးပြီး လုပ်ကိုင်ဆောင်ရွက်တဲ့ကိစ္စတွေအပေါ်မှာ မပူးပေါင်းဖို့ ဆိုတာမျိုးကျနော်တို့က မေတ္တာရပ်ခံထားတာရှိပါတယ်။ ပြည်သူကတော့ အတင်းအကြပ် လုပ်ခိုင်းတဲ့အခါမှာ ဘယ်လိုမှ မလွှဲမရှောင်သာဘဲနဲ့ စာရင်းပေးရတာတွေရှိနိုင်ပါတယ်။ ဒါပေမဲ့လည်း ဒီအကြမ်းဖက် စစ်ကောင်စီရဲ့ အလိုတူ အလိုပါ ပေါ့ ဒီလိုမျိုး မဲစာရင်းကောက်တဲ့ ကိစ္စ၊နောက်ပြီး တရားမဝင် တဲ့ အတုအယောင် ရွေးကောက်ပွဲဖြစ်မြောက်အောင် လိုက်ပါ ဆောင်ရွက်နေတဲ့ အုပ်ချုပ်ရေးမှူးတွေ သူတို့နဲ့အတူတကွ ပူးပေါင်း နေတဲ့သူတွေ အဲဒီလူတွေ အကုန်လုံးက ဥပဒေ ချိုးဖောက်တဲ့ သူတွေဖြစ်တဲ့အတွက် အဲဒီလူတွေကိုတော့ မဖြစ်မနေ ဖမ်းဆီးပြီးတော့ အရေးယူဆောင်ရွက်မှာ ဖြစ်ပါတယ်” ဟုဦးနေဘုန်းလတ်ကဆက် ပြောသည်။
