ရွေးကောက်ပွဲဖြစ်မြောက်စေရန် ပါဝင်သူများအား အရေးယူမည်ဟု သတိပေး
အကြမ်းဖက်စစ်ကောင်စီက ပြုလုပ်မည့် ရွေးကောက်ပွဲမှာ စစ်အာဏာရှင်သက်ဆိုးရှည်စေရန် ကြိုးပမ်းသော အတုအယောင်ဆောင်ရွက်မှုတစ်ခုသာဖြစ်ကြောင်း ကရင်နီအမျိုးသားများကာကွယ်ရေးတပ်(KNDF)က ယနေ့ အသိပေးထုတ်ပြန်သည်။
လူထုဆန္ဒမပါဝင်သော တရားမဝင် အတုအယောင် ရွေးကောက်ပွဲကို ကရင်နီပြည်နယ်အတွင်း ပြုလုပ်ခွင့်ပြုမည်မဟုတ်ဘဲ ရွေးကောက်ပွဲဆိုင်ရာလုပ်ငန်းစဥ် များကို တစ်ညီတစ်ညွတ်တည်း ဆန့်ကျင်တိုက်ဖျက်မည်ဟုလည်း သတိပေးသည်။
အဆိုပါ ထုတ်ပြန်ချက်ကို ကရင်နီတော်လှန်ရေး အင်အားစုများဖြစ်သော ဒီးမော့ဆိုမြို့နယ်ပြည်သူ့ကာကွယ်ရေး DMO PDF နှင့် KNDFတို့ ပူးတွဲ ကြေညာသည်။
“ အကြမ်းဖက်စစ်တပ်က သူ့စိတ်ကြိုက်လိုသလို ပြင်ဆင်ထားတဲ့ လမ်းစဥ်တစ်ခုက ဘယ်လိုမှ တရား ဖို့မဖြစ်နိုင်သလို ကျွန်တော်တို့ အနေနဲလည်း လုံးဝ ကန့်ကွက်တယ်။ပြီးတော့ ဒီတရားမဝင်ရွေးကောက်ပွဲ နဲ့ ပတ်သက်လာတဲ့ လုပ်ငန်းစဥ်မှန်သမျှ ကျွန်တော်တို့ အရေးယူဖို့ ဆုံးဖြတ်ထားတယ်” ဟု KNDF တာဝန်ရှိသူတစ်ဦးက လူထုနွေဦးသို့ ပြောသည်။
ထို့ကြောင့် စစ်ကောင်စီမှ ရွေးကောက်ပွဲ ပြင်ဆင် ရေးအတွက် တစ်အိမ်တက်၊ တစ်အိမ်ဆင်း လူဦးရေစာရင်းများကောက်ခံခြင်း၊ကြိုတင်မဲများ ကောက်ယူခြင်း၊စည်းရုံးဟောပြောခြင်း၊တာဝန်ပေး အပ်ခြင်း အစရှိသည့်လုပ်ဆောင်မှုများကို ငြင်းဆန်၍ မပူးပေါင်းရန် ဖော်ပြထားသည်။
အလားတူ တစ်သီးပုဂ္ဂလသော်လည်းကောင်း၊အစုအဖွဲ့ဖြင့်သော်လည်းကောင်း နိုင်ငံရေးပါတီဖွဲ့စည်း၍ ဝင်ရောက်ယှဥ်ပြိုင်ခြင်းလုံးဝ မပြုလုပ်ရန်၊ ကရင်နီပြည်နယ်တစ်ဝှမ်းလုံးတွင် ရွေးကောက်ပွဲနှင့်ဆိုင်သော လုပ်ငန်းစဥ်မှန်သမျှ ပိတ်ပင် ကာ ပူးပေါင်းဆောင်ရွက်ခြင်းမပြုရန် အသိပေးသည်။
စစ်ကောင်စီ၏ အတုအယောင် ရွေးကောက်ပွဲ ဖြစ်မြောက်ရေးကို ဆောင်ရွက်မှုများတွေ့ရှိပါက တော်လှန်ရေးအင်အားစုများက ကျင့်ဝတ်နည်းနာ များ နှင့်အညီထိရောက်စွာ အရေးယူဆောင်ရွက်သွားမည်ဟု KNDFက ထပ်မံ အသိပေးသည်။
၂၀၂၁ ဖေဖော်ဝါရီ ၁ရက်တွင် စစ်ကောင်စီက ၂၀၂၀ အထွေထွေရွေးကောက်ပွဲအတွင်း မဲမသမာမှုရှိသည်ဟုစွပ်စွဲကာ ပြည်သူလူထု၏ ဆန္ဒကို လေးစားလိုက်နာမှုမရှိဘဲ နိုင်ငံတော်အာဏာကို အတင်းအဓမ္မသိမ်းယူခဲ့ခြင်းဟု KNDF က သတ်မှတ်သည်။
