ပဲခူးတိုင်း၊ ဝေါမြို့နယ်ရှိ မြစ်ကျိုးနယ်မြေရဲစခန်းနှင့် စစ်ကောင်စီအုပ်ချုပ်ရေးမှူးရုံးတို့ကို KNLA၊ PDF ပူးပေါင်းတပ်က ဒရုန်းဖြင့် ဗုံးသီးချတိုက်ခိုက်ခဲ့ကြောင်း ဝေါမြို့နယ် ပြည်သူ့ကာကွယ်ရေးအဖွဲ့က ပြောသည်။
ယမန်နေ့(ဖေဖော်ဝါရီ ၂)ည ၇ နာရီ ၅၀မိနစ်ခန့်က ဝေါမြို့နယ် မြစ်ကျိုးကျေးရွာရှိ စစ်ကောင်စီလက်အောက်ခံ နယ်မြေရဲစခန်းအား KNLA၊ PDF ပူးပေါင်းတပ်များက ဒရုန်းဖြင့် ဗုံးသီးတစ်လုံးပစ်ချကာ ဖောက်ခွဲတိုက်ခိုက်ခဲ့ခြင်းဖြစ်သည်ဟု ဆိုသည်။
အဆိုပါတိုက်ခိုက်မှုကြောင့် မြစ်ကျိုးစခန်းရှိ စစ်ကောင်စီရဲများ စခန်းအပြင်သို့ ထွက်ပြေးသွားပြီး ထိခိုက်သေဆုံးမှုရှိ၊မရှိ ဆက်လက်စုံစမ်းဆဲဖြစ်ကြောင်း ဝေါ(ပ.က.ဖ)မှ တာဝန်ရှိသူတစ်ဦးက ပြောသည်။
အလားတူ ယမန်နေ့ည ၈ နာရီ ၅၅ မိနစ်ခန့်တွင် ဝေါမြို့နယ် လက်ပန်ကျေးရွာရှိ စစ်ကောင်စီတပ်များ တပ်စွဲထားသည့် အုပ်ချုပ်ရေးမှူးရုံးကို ဒရုန်းဖြင့် ဗုံးသီးတစ်လုံးပစ်ချ တိုက်ခိုက်ခဲ့သည်ဟု အထက်ပါတာဂန်ရှိသူက ဆို သည်။
ထို့နောက် တိုက်ခိုက်ခံရသည့်နေရာများသို့ စစ်ကောင်စီတပ်မှ တပ်ကူလွှတ်၍ လာရောက်နိုင် ခြေရှိသောလမ်းပိုင်း၌ မိုင်းပွိုင့်ဆင်၍ ဖောက်ခွဲတိုက်ခိုက်ရန်ပြင်ဆင်ခဲ့ရာ မိုင်းဆင်ရင်း မတော် တဆဖြစ်၍ တော်လှန်ရေးရဲဘော်တစ်ဦးကျဆုံးခဲ့ကြောင်း ဝေါ(ပ.က.ဖ)က အတည်ပြုသည်။
“ မြေပြင်က လာမယ့်လမ်းကြောင်းကို မိုင်းသွားထောင်တာ။ လက်ထဲမှာ မိုင်းကွဲသွားတာ” ဟု ဝေါ (ပ.က.ဖ)က ပြောသည်။
ထို့ကြောင့် အထက်ပါ စစ်ကောင်စီတပ်၏ စစ်ရေးပစ်မှတ်နေရာ နှစ်ခုအား KNLA၊ PDF ပူးပေါင်းတပ်များတိုက်ခိုက်မှုတွင် ရဲဘော်တစ်ဦး မိုင်းမတော်တဆဖြစ်ပြီး ကျဆုံးခဲ့သော်လည်း ကျန်ရဲဘော်များအထိ အခိုက်မရှိခဲ့ကြောင်း အသိပေးထားသည်။
