စစ်တပ်အာဏာသိမ်းပြီးနောက် မြန်မာကလေးငယ်များ ဗုံးခိုကျင်းများ၌ စာသင်ကြားရသည့် အခြေအနေရောက်ရှိနေပြီး စာသင်ကျောင်းများနှင့် ကလေးငယ်များသည် တိုက်ခိုက်မှုများ၏ ပစ်မှတ်လုံးဝမဖြစ်ရကြောင်း သံအမတ်ကြီးဦးကျော်မိုးထွန်းက ကုလသမဂ္ဂသို့ ပြောသည်။
ကုလသမဂ္ဂဌာနချုပ်တွင် ၂၀၂၃ ခုနှစ်အတွက် UNICEF Executive Board ၏ ပထမအကြိမ် ပုံမှန်အစည်းအဝေး (First Regular Session of the UNICEF Executive Board) ကို ယမန်နေ့က စတင်ကျင်းပရာ အထွေထွေမိန့်ခွန်းပြောကြားသည့်အစီအစဉ်တွင် မြန်မာအမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းက ပါဝင်မိန့်ခွန်းပြောကြားခဲ့ခြင်းဖြစ်သည်။
မြန်မာစစ်တပ်သည် ကလေးငယ်များနှင့် စာသင်ကျောင်းများအပေါ် ခွဲခြားခြင်းမရှိဘဲ တိုက်ခိုက်ရုံသာမက ကလေးငယ်များအတွက် လူသားချင်းစာနာထောက်ထားမှု အကူအညီများကိုလည်း ငြင်းဆန်လျက်ရှိကြောင်း သံအမတ်ကြီးက ထည့်သွင်းအစီရင်ခံသည်။
ထို့အပြင် စစ်တပ်က မကြာသေးမီကာလအတွင်း မြို့နယ် (၃၇) ခုကျော်တွင် Martial Law ထုတ်ပြန်ခဲ့ရာ လိုအပ်သူများထံ ထောက်ပံ့ကူညီမှုအစီအစဉ်များ ရောက်ရှိရေးမှာ ပိုမိုကန့်သတ်တားဆီး ခံရနိုင်ချေရှိပြီး စစ်တပ်အနေဖြင့် ရက်စက်ကြမ်းကြုတ်သော အကြမ်းဖက်လုပ်ရပ်များကို ပိုမိုဆက်လက်လုပ်ဆောင်နိုင်ဖွယ်ရှိသောကြောင့် ကလေးငယ်များအတွက် လူသားချင်းစာနာထောက်ထားမှု အကူအညီလိုအပ်ချက်မှာလည်း မြင့်တက်နေမည်သာဖြစ်ကြောင်း တင်ပြသည်။
Public Service Announcement
စစ်အာဏာရှင်အောက်တွင် မြန်မာကလေးငယ်များ၏ အနာဂတ်သည် မရေမရာရှိနေပြီး စစ်အာဏာရှင် ချုပ်ငြိမ်းမှသာ အဆိုပါမရေမရာမှုများကို ကာကွယ်ပေးနိုင်မည်ဖြစ်၍ ကုလသမဂ္ဂအဖွဲ့ဝင်နိုင်ငံများက ကြိုးပမ်းအားထုတ်များကို တက်နိုင်သည့်ဘက်မှ အားလုံးဝိုင်းဝန်းကူညီရန် သံအမတ်ကြီးက မေတ္တာရပ်ခံသည်။
