စစ်ကိုင်းတိုင်း၊ ရေဦးမြို့နယ်တွင် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လက်နက်ကြီးဖြင့် ပစ်ခတ်ခဲ့၍ အမျိုးသမီးနှစ်ဦးသေဆုံးခဲ့ပြီး တိရိစ္ဆာန်နှင့် လူနေအိမ်များပါ ပျက်စီးဆုံးရှုံးခဲ့ကြောင်း သတင်းရရှိသည်။
ယမန်နေ့ (ဖေဖော်ဝါရီလ ၈ ရက်) ညပိုင်းက စစ်ကောင်စီတပ်၏ ရမ်းသမ်းပစ်ခတ်မှုကြောင့် ရေဦးမြို့နယ်၊ မုံတိုင်ပင်အုပ်စု၊ ဇီးကန်ရွာတွင် လက်နက်ကြီးကျရောက်ပေါက်ကွဲရာ အမျိုးသမီးနှစ်ဦးသေဆုံးပြီး နှစ်ဦးဒဏ်ရာရရှိခဲ့ကြောင်း၊ ထို့အပြင် နွားခြောက်ကောင်သေဆုံးပြီး လူနေအိမ်အချို့လည်း ပျက်စီးဆုံးရှုံးခဲ့ကြောင်း ပကဖ(ရေဦး)က သတင်းထုတ်ပြန်သည်။
“ ရေဦး၊ ကြာပန်းညိုရွာဘက်ကနေ လက်နက်ကြီးနဲ့ ထုတာလို့ကြားတယ်။ ရွာအပြင်ဘက်မှာလည်း လက်နက်ကြီးတစ်လုံး ထပ်ကျပြီး ပေါက်ကွဲခဲ့တယ်လို့ သိရတယ်။” ဟု ဒေသခံတစ်ဦးက ပြောသည်။
ဖြစ်စဥ်နှင့်ပတ်သက်၍ ရေဦး (ပကဖ)အဖွဲ့ထံ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။
ယမန်နေ့ မွန်းလွဲပိုင်းက ရေဦးမြို့ပေါ်မှထွက်လာသော စစ်ကောင်စီတပ်ကို တော်လှန်ရေးအင်အားစုများက ဒရုန်းဖြင့်တိုက်ခိုက်ခဲ့သေးသည်။
