မကွေးတိုင်း အောင်လံမြို့နယ် ကျွဲခေါင်းကျေးရွာဘက်သို့ စစ်ကောင်စီတပ်နှင့် ပျူစောထီးများ လာမည်ဟု သတင်းကြိုရသောကြောင့် ခြုံခိုတိုက်ခိုက်ခဲ့ရာ စစ်အုပ်စုမှ လေးဦးသေဆုံးပြီး အရာရှိတစ်ဦး အပြင်းအထန်ဒဏ်ရာရကြောင်း အောင်လံမြို့နယ် ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက ပြောသည်။
“၁၅ယောက် ကျွဲခေါင်းရွာကနေ အနောက်ဘက်ကို ထွက်လာတာ သတင်းရလို့ တိုက်တာပါ။တလုတ်ပင်ရွာက အုပ်ကြီးယောက်ဖရဲ့ ဆွမ်းသွပ်ကိုလာတာ။ အဲဒီကအပြန်မှာ စောင့်တိုက်တာပါ။” ဟု အထက်ပါတာဝန်ရှိသူက ပြောသည်။
အဆိုပါ စစ်ဆင်ရေးကို ဖေဖော်ဝါရီ ၈ရက် နေ့လည် ၁နာရီခန့်တွင် ပြည်သူ့ကာကွယ်ရေးအဖွဲ့ (အောင်လံမြို့)နှင့် သရက်ခရိုင် PDF တပ်ရင်း (၁)တို့၏ ပူးပေါင်းလုပ်ဆောင်ခဲ့ခြင်းဖြစ်ကြောင်း ၎င်းက ဆိုသည်။
“တိုက်ခိုက်မှုအတွင်း အကြမ်းဖက်စစ်ကောင်စီတပ်ဖွဲ့ဝင် လေးဦး ကျဆုံးခဲ့ပြီး စစ်ဗိုလ်တစ်ဦးလည်းပြင်းထန် ဒဏ်ရာရရှိခဲ့ပါသည်။ ကျွန်ုပ်တို့တပ်ဖွဲ့ဝင်များ အထိခိုက်၊ အကျဆုံးမရှိခဲ့ပါ။ ဘေးကင်းရာသို့ ပြန်လည်ရောက်ရှိနေပြီဖြစ်ကြောင်း အသိပေးအပ်ပါသည်။”ဟု အောင်လံမြို့နယ် ပြည်သူ့ကာကွယ်ရေးတပ်ဖွဲ့က သတင်းထုတ်ပြန်ထားသည်။
Public Service Announcement
စစ်အုပ်စုဘက်မှ ထိခိုက်သေဆုံးမှုနှင့်ပတ်သက်ပြီး လူထုနွေဦးက သီးခြားအတည်မပြုနိုင်သေးပေ။
