မကွေးတိုင်း ရေစကြိုမြို့ အ.ထ.က(၁)ကျောင်းအနီး မီးပွိုင့်ထောင့်တွင် လုံခြုံရေးယူနေသည့် စစ်ကောင်စီတပ်သားများအား မိုင်းတစ်လုံးဖြင့် ဖောက်ခွဲတိုက်ခိုက်ခဲ့ကြောင်း ရေစကြိုမြို့နယ် ပြည်သူ့ကာကွယ်ရေးတပ်ဖွဲ့(ပကဖ)က ပြောသည်။
ယနေ့(ဖေဖော်ဝါရီ ၁၄)နံနက် ၈ နာရီခွဲခန့်က ထ (၁)အနီး မီးပွိုင့်ထောင့်တွင်ရှိနေသော စစ်ကောင်စီတပ်သားလေးဦးကို ရေစကြိုမြို့နယ်(ပကဖ)ရဲဘော်များက မိုင်းတစ်လုံးဖြင့် ဖောက်ခွဲတိုက်ခိုက်ခဲ့ခြင်း ဖြစ်သည်။
“ကျောင်းနားမှာရှိနေတဲ့ စ..(စစ်ကောင်စီတပ်သား)တွေပေါ့ဗျာ။ လုံခြုံရေးတွေပေါ့။ တစ်ကယ်ကတော့ ကျွန်တော်တို့က ကျောင်းကို အဓိကထားတိုက်ခိုက်တာ မဟုတ်ဘူး။ မြင်သာအောင်လို့သာ ကျောင်းရှေ့နားလို့ ရေးလိုက်တာ။ တစ်ကယ်တမ်းက ကျောင်းရဲ့ဒီဘက်နားက မီးပွိုင့်မှာဗျ။ အဲဒီမှာလေးကောင်ကို ပွိုင့်ဆွဲလိုက်တာ”ဟု ရေစကြိုမြို့နယ်(ပကဖ)မှ တာဝန်ရှိသူက ပြောသည်။
အဆိုပါ မိုင်းဆွဲတိုက်ခိုက်မှုကြောင့် စက်ကောင်စီတပ် သားလေးဦးမိုင်းထိမှန်ကာ လဲကျသွားသည်ကို ပ.က.ဖ အဖွဲ့ဝင်ရဲဘော်များ မျက်မြင်တွေ့ခဲ့ရပြီး နောက်ဆက်တွဲသတင်းအရ ဒဏ်ရာရစစ်သားလေးဦးစလုံး ဆေးရုံသို့ရောက်သွားကြောင်း ၎င်းတာဝန်ရှိသူက ဆက်ပြောသည်။
Public Service Announcement
ယင်းတိုက်ခိုက်မှုတွင် ဖောက်ခွဲမှုထိချက်မှန်သောကြောင့် စစ်ကောင်စီတပ်သားများဘက်မှ ပြန်လည်ခုခံနိုင်ခြင်းမရှိဘဲ တော်လှန်ရေးရဲဘော်များ အောင်မြင်စွာဆုတ်ခွာနိုင်ခဲ့သည်ဟု ရေစကြိုမြို့နယ်(ပကဖ)က အသိပေးသည်။
ယမန်နေ့ (ဖေဖော်ဝါရီ ၁၃ ရက်)ကလည်း ရေစကြိုမြို့ အမှတ်(၄) ဖောင်တော်ဦးရပ်ကွက်ရှိ စစ်ကောင်စီတပ်၏ ငြိမ်းဇာနည်တပ်စခန်းငယ်တစ်ခုကို တော်လှန်ရေးပူး ပေါင်းတပ်ဖွဲ့များက စီးနင်းတိုက်ခိုက်ခဲ့ရာ စစ်ကောင်စီတပ်သား ၁၅ဦးခန့် သေဆုံးခဲ့သည်ဟု ဆိုသည်။
