ဒီမိုကရေစီကိုသွေဖီသည့်မျိုးနွယ်စု အခြေပြု အုပ်ချုပ်ရေးစနစ်ဖော်ဆောင်ရန်ကြိုးပမ်းမှု ရှောင်ရှားရန် ချင်းတပ် CNO/CNDF တိုက်တွန်း

ဒီမိုကရေစီစနစ်ကို သွေဖီနေသည့် မျိုးနွယ်စု အခြေပြုအုပ်ချုပ်ရေးစနစ်ဖော်ဆောင်ရန် ကြိုးပမ်းမှုကို ရှောင်ရှားရင်း ချင်းအမျိုးသားပြန်လည် တည်ဆောက်ရေးကို မျှော်တွေးရန် ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးအဖွဲ့ချုပ် (CNO/CNDF)က ချင်းအမျိုးသားနေ့သို့ သဝဏ်လွှာပေးပို့သည်။

ဖေဖော်ဝါရီ ၂၀ရက်တွင် ကျရောက်မည့် ချင်းအမျိုးသားနေ့သည် (၇၅)နှစ်မြောက်ဖြစ်ပြီးအနှစ်သာရပြည့်၀သော ချင်းအမျိုးသားနေ့ကို အဓိပ္ပါယ်ရှိစွာ ကျင်းပနိုင်ပါစေဟု CNO/CNDF သဝဏ်လွှာ၌ ပါရှိသည်။

နွေဦးတော်လှန်ရေးနှင့်အတူ ပေါ်ပေါက်လာသော ချင်းအမျိုးသားလက်နက်ကိုင်တော်လှန်ရေး လှုပ်ရှားမှုတွင် နယ်မြေဒေသအလိုက် မျိုးနွယ်စုများကို အခြေခံသော အုပ်ချုပ်ရေးစနစ် ပြန်လည်အသက်သွင်းရန် အားထုတ်ကြိုးပမ်းနေမှုများကို ဝမ်းနည်းဖွယ်ရာ တွေ့မြင်လာရကြောင်း ဖော်ပြထားသည်။

မျိုးနွယ်စုအလိုက် မိမိတို့၏ ဘာသာစကား ၊ စာပေ၊ ယဉ်ကျေးမှုများ ထိန်းသိမ်းစောင့်ရှောက်ရမည်မှာ သမိုင်းပေးတာဝန်ဖြစ်သော်လည်း ထိုသမိုင်းပေးတာဝန်ကို ထမ်းဆောင်ရန်အကြောင်းပြ၍ ခေတ်နောက်ပြန်ဆွဲသော ပဒေသရာဇ် အုပ်ချုပ်ရေးစနစ်ဆန်သည့် မျိုးနွယ်စု အခြေပြုအုပ်ချုပ်ရေးစနစ်ကို အသက်သွင်းရန် ကြိုးပမ်းနေမှုများသည် ချင်းအမျိုးသားနေ့၏ အနှစ်သာရနှင့် သွေဖီနေသည်ဟုယူဆကြောင်း CNO/CNDF သဝဏ်လွှာ၌ ပါရှိသည်။

Public Service Announcement

၁၉၄၈ ဖေဖော်ဝါရီ ၂၀ရက်က ကျင်းပခဲ့သည့် ဖလမ်းမြို့ ချင်းလူထုညီလာခံ၌ နယ်ချဲ့ဆန့်ကျင်ရေး၊ အမျိုးသားလွတ်မြောက်ရေးလှုပ်ရှားမှု အပါအဝင် နယ်မြေဒေသအလိုက် မျိုးနွယ်စု အကြီးအကဲများ အုပ်ချုပ်သည့် တိုက်သူကြီးစနစ်အစား ဒီမိုကရေစီ အခြေခံသော ပြည်သူ့အုပ်ချုပ်မှု စနစ်ဖြင့် အစားထိုးကျင့်သုံးရန် ရွေးချယ်ဆုံးဖြတ်ခဲ့ရာ ထိုသို့ ဆုံးဖြတ်ခဲ့သည့်နေ့ကို ချင်းအမျိုးသားနေ့အဖြစ် သတ်မှတ် ခေါ်ဝေါ်ခဲ့ခြင်းဖြစ်သည်။