ဆွစ်ဇာလန် အစားအသောက်ထုတ်လုပ်ရေးကုမ္ပဏီ Nestle သည် မြန်မာနိုင်ငံတွင် ထုတ်လုပ်မှုအားလုံးကို ရပ်ဆိုင်းပြီးနိုင်ငံအတွင်းမှာ ထွက်ခွာတော့မည်ဖြစ်ကြောင်း ဖေဖော်ဝါရီ ၂၇ ရက်ကကုမ္ပဏီပြောရေးဆိုခွင့်ရှိသူကပြောကြားလိုက်သည်။
လက်ရှိ စီးပွားရေးအခြေအနေကြောင့်စီးပွားရေးအချက်အချာကျသောရန်ကုန်ရှိစက်ရုံနှင့် ရုံးချုပ်တို့တွင်လုပ်ငန်းလည်ပတ်မှု ရပ်ဆိုင်းသွားမည်ဖြစ်ကြောင်း ပြောရေးဆိုခွင့်ရှိသူတစ်ဦးက AFP သို့ ပြောကြားခဲ့သည်။
Nestle သည် မြန်မာနိုင်ငံတွင် Nescafe အသင့်ဖျော်ကော်ဖီ၊ Maggi ခေါက်ဆွဲနှင့် Milo ချောကလက်မဲလ်ဖျော်ရည်များကို ထုတ်လုပ်ရောင်းချနေခြင်းဖြစ်သည်။
မည်သည့်အချိန်တွင်ထွက်ခွာမည်ဖြစ်ကြောင်းကိုမူ ၎င်းကထုတ်ဖော်ပြောကြားခဲ့ခြင်းမရှိပေ။
Public Service Announcement
မြန်မာနိုင်ငံတွင်ထုတ်လုပ်မှုရပ်ဆိုင်းခဲ့သော်လည်းထိုင်း၊မလေးရှားနှင့်ဖိလစ်ပိုင်နိုင်ငံတို့မှထုတ်လုပ်သည့် Nestle ထုတ်ကုန်များကို မြန်မာကုမ္ပဏီတစ်ခုက ဖြန့်ဖြူးပေးမည်ဖြစ်ကြောင်းပြောရေးဆိုခွင့်ရှိသူကပြောကြားခဲ့သည်။
“ဒီဆုံးဖြတ်ချက်ကြောင့်ထိခိုက်တဲ့လူတိုင်းကိုကူညီပံ့ပိုးပေးဖို့ ကျွန်တော်တို့ တတ်နိုင်သမျှ စွမ်းဆောင်သွားမှာပါ” ဟု အဆိုပါပြောရေးဆိုခွင့်ရှိသူကပြောသည်။ သို့သော်လည်း ဝန်ထမ်းအရေအတွက်ကို ထည့်သွင်းပြောကြားခဲ့ခြင်းမရှိပေ။
နိုင်ငံတော်အာဏာကိုစစ်တပ်ကအဓမ္မသိမ်းယူပြီးနောက် မြန်မာနိုင်ငံအတွင်းမှ နိုင်ငံခြားကုမ္ပဏီများဆက်တိုက်ထွက်ခွာနေသည်။
ထိုသို့နိုင်ငံခြားကုမ္ပဏီများထွက်ခွာသွားခြင်းမှာဆယ်စုနှစ် တစ်စုစာပြုပြင်ပြောင်းလဲခဲ့သည့်ဒီမိုကရေစီပြောင်းလဲမှုများပြန်လည်ဆုံးရှုံးသွားခြင်းဖြစ်သည်ဟုစီးပွားရေးအတိုင်ပင်ခံကုမ္ပဏီတစ်ခုမှဒါရိုက်တာတစ်ဦးကပြောသည်။
“စစ်ဗိုလ်ချုပ်တွေရဲ့ အတ္တကြောင့်ဖြစ်လာတဲ့နိုင်ငံရေးအကြပ်အတည်းကြောင့် တိုင်းပြည်လည်း ထိခိုက်နစ်နာမှုတွေအရမ်းများနေပါပြီ။ ဒီလိုဖြစ်ရပ်တွေက တိုင်းပြည်အတွက် ပြန်လည်ကုစားဖို့အချိန်တော်တော်ယူရဦးမှာ”ဟု ၎င်းကဆိုသည်။
စစ်တပ်အာဏာသိမ်းပြီးနောက် နော်ဝေး တယ်လီကွန်းကုမ္ပဏီ Telenor၊ အမေရိကန်ရေနံကုမ္ပဏီစွမ်းအင်ကုမ္ပဏီ Chevron ၊ ပြင်သစ်ရေနံကုမ္ပဏီ Total၊ ဩစတြေးလျရေနံကုမ္ပဏီ Woodside စသည့် ကမ္ဘာကျော်ကုမ္ပဏီများ ပြည်တွင်းမှထွက်ခွာခဲ့သည်။
