မကွေးတိုင်း၊ မြိုင်မြို့နယ်တွင် စစ်ကောင်စီရိက္ခာတင်ယာဥ်တန်းနှင့် ကင်းပုန်းများအား ဒရုန်းများ၊ ပီပါမိုင်းများဖြင့် တိုက်ခိုက်ခဲ့ရာ စစ်အုပ်စုအထိနာပြီး စစ်ကူခေါ်နေရကြောင်း မြိုင်(ပကဖ) ခေါင်းဆောင် ကိုလက်ယျာက ပြောသည်။
ယနေ့ (မတ်လ ၄ ရက်)နံနက်အစောပိုင်းက ကန်နီပျူရွာသို့ ရိက္ခာပို့သည့် ယာဉ်တန်းအား ဒရုန်းဖြင့် ဗုံးနှစ်လုံးချ တိုက်ခိုက်ခဲ့ပြီး ထိခိုက်ဒဏ်ရာရရှိမှု စုံစမ်းနေကြောင်း မြိုင်(ပကဖ)ခေါင်းဆောင်က ပြောသည်။
နံနက် ၈ နာရီ ၄၅မိနစ်ခန့်ကလည်း မြိုင်မြို့အရှေ့မြောက်ဘက်အထွက် ပေါက်ပြင်းကျေးရွာအနီးတွင် စစ်ကောင်စီယာဥ်တန်းအတွက် တပ်၊ ရဲနှင့် ပျူများ ကင်းပုန်းဝတ်ရန်လာစဉ် မိုင်းပွိုင့် သုံးလုံးဖြင့် မိုင်းဆွဲတိုက်ခိုက်ခဲ့ရာ ရဲတစ်ဦး နေရာတွင် ပွဲချင်းပြီးသေဆုံးပြီး ကျန်စစ်ကောင်စီတပ်သားနှစ်ဦး ထိခိုက်ဒဏ်ရာရရှိသွားကြောင်း မြိုင်(ပကဖ)အဖွဲ့က ဆိုသည်။
မွန်းလွဲ ၂ နာရီ ၂၅မိနစ်တွင်လည်း သံပုရာခြံကျေးရွာအနီးတွင် စစ်ကောင်စီတပ်အား မိုင်း နှစ်လုံးဖြင့် တိုက်ခိုက်ရာ သုံးဦး အနက် နှစ်ဦးလဲကျသွားကြောင်း မြိုင်(ပကဖ)ခေါင်းဆောင် ကိုလက်ယျာက ပြောသည်။
Public Service Announcement
ထို့နောက် မွန်းလွဲ ၂ နာရီ ၃၇မိနစ်တွင်လည်း သံပုရာခြံကျေးရွာအနီးရှိ ပေပါမိုင်းအနီးတွင် စစ်ကောင်စီတပ်နှင့်ပျူ ၈ ဦး တွေ့ရှိ၍ မိုင်းဆွဲလိုက်ရာ ၆ ဦး လဲကျသေဆုံးသွားပြီး နှစ်ဦးပြင်းထန်ဒဏ်ရာရရှိကြောင်း ပကဖအဖွဲ့က ဆိုသည်။
” ၁၁ကောင်သေတယ်လို့ကြားတယ်။ မြိုင်(အထက) – ၂ထဲကနေ ပြန်နောက်ဆုတ်နေပြီး ကား၅ စီးကျန်သေးတယ်။ အကူတွေတောင်းထားတယ်ကြားတယ်။ ရုတ်ရုတ်ရုတ်ရုတ်ဖြစ်နေတယ်။ ခံရတဲ့ကောင်ကများသွားတော့။”ဟု မြိုင်(ပကဖ) ခေါင်းဆောင် ကိုလက်ယျာက ပြောသည်။
စစ်ကောင်စီအုပ်စုအား ဆက်လက်တိုက်ခိုက်ရန် ပြင်ဆင်ထားဆဲဖြစ်ပြီး မြိုင်မြို့မှ ကန်နီပျူကျေးရွာသို့ ရိက္ခာပို့ရန် အင်အား ၂၀၀ ကျော် အသုံးပြုထားသော စစ်ကြောင်းအား သေစေလိုစိတ်မရှိ၍ မိုင်းဖြင့်တိုက်ခိုက်နေခြင်းဖြစ်ကြောင်း၊ စစ်ကြောင်းအရှိန်မြင့်တင်လာပါက ပျူရွာများအား ပြင်းထန်စွာတိုက်ခိုက်သွားမည်ဖြစ်ကြောင်း မြိုင်ပကဖက သတိပေးသည်။
ယခုတိုက်ခိုက်မှုတွင် မြိုင်(ပကဖ)အဖွဲ့က ဗိုလ်လင်းမြွေသည် ဦးဆောင်တိုက်ခိုက်ခဲ့ခြင်းဖြစ်ပြီး ရဲဘော်များအထိအခိုက်မရှိဟု သိရသည်။
အဆိုပါတပ်သည် ပြည်၊ ပဲခူး အစရှိသည့်ဒေသများမှတပ်များဖြစ်နိုင်ပြီး ယမန်နေ့က ကိုင်းတောမဘက်မှ ၂၀၀ ကျော်ဝင်လာခြင်းဖြစ်ကြောင်း မြိုင်(ပကဖ)ခေါင်းဆောင် ကိုလက်ယျာက ပြောသည်။
