▪︎ဖားကန့်တွင်စစ်ကောင်စီက တော်လှန်ရေးအင်အားစုနှင့်ပြည်သူများကိုဆက်တိုက်ဖမ်းဆီးနေ၍ KIA ကစစ်တပ်အားအရှိန်မြှင့်တိုက်ခိုက်ပေးရန်ဒေသခံများတောင်းဆို
ဖားကန့်တွင်KIAတပ်ရင်း(၆) ဒုတိုက်နယ်မှူးတန်ဆန်း၏ နေအိမ်ကို ယနေ့(မတ်လ ၁၅ရက်) နံနက် ဝေလီဝေလင်းအချိန်တွင် စစ်ကောင်စီတပ်က ဝင်ရောက်စီးနင်းခဲ့ရာ နေအိမ်ရှိပြည်သူငါးဦးကို ဖမ်းဆီးသွားကြောင်းသတင်းရရှိသည်။
ကချင်လွတ်လပ်ရေးတပ်မတော် (KIA) တပ်ရင်း(၆) ဒုတိယတိုက်နယ်မှူးတန်ဆန်း၏ နေအိမ်ဟုဆိုသောဖားကန့်မြို့၊ မှော်မောင်းလျန်ရပ်ကွက်မှနေအိမ်တစ်လုံးကိုစစ်တပ်က ယနေ့ နံနက် ၅နာရီ ၂၀ မိနစ်တွင်အင်အားအများအပြားဖြင့် ဝင်စီးနင်းခဲ့ခြင်းဟု မှော်မောင်းလျန်ဒေသခံများကပြောသည်။
” ဒုတိယတိုက်နယ်မှုး တန်ဆန်းလွတ်မြောက်သွားပါတယ်။ အဲ့ဒီအိမ်ထံကကချင်တိုင်းရင်းသားငါးဦးကိုရိုက်နှက်ဖမ်းဆီးသွားတယ်။ အိမ်ထဲက ကွန်ပြူတာတွေရော ကားတွေပါ သိမ်းသွားတယ်”ဟုဒေသခံတစ်ဦးကပြောသည်။
ဖမ်းဆီးခံရသူများမှာ ကိုဒွဲဂျာ၊ကိုလအောင်၊ နော်လီ၊ဂွမ်ထန်နော်အောင်၊ဆွတ်လွတ်နော်လတ်တို့ဖြစ်ကြောင်း People’s Spring သတင်းဌာနက စုံစမ်းသိရှိရသည်။
Public Service Announcement
ဖားကန့်တွင် မတ်လ ၁၁ရက်နေ့ကလည်း ကချင်ရိုးရာယဉ်ကျေးမှုရုံးကို စစ်ကောင်စီက ဝင်ရောက်စီးနင်းပြီးနောက် KIOအရာရှိအချို့အပါအဝင် ရုံးအတွင်းရှိနေသူဆယ်ဦးထက်မနည်းကိုဖမ်းဆီးခေါ်ဆောင်သွားခဲ့သည်။
ဖားကန့်တွင်စစ်ကောင်စီတပ် ဖမ်းဆီးမှုများဆက်တိုက်ပြုပြုလုပ်နေပြီး KIAမှတာဝန်ရှိသူများအနေဖြင့် မြေပြင်အခြေအနေကို ပိုမိုလေ့လာပြီး စစ်တပ်ကို အရှိန်မြှင့်တိုက်ခိုက်ပေးရန် ဒေသခံပြည်သူများကတောင်းဆိုသည်။
“KIA အနေနဲ့ အရှိန်မြှင့်ပြီး တိုက်ပွဲဖော်ဆောင်ဖို့လိုပြီ။ အဲ့လိုမလုပ်ရင်တော့ မြေပြင်မှာအကုန်အဖမ်းခံရတော့မယ်” ဟုဖားကန့်ဒေသခံတစ်ဦးကပြောသည်။
စစ်ကောင်စီတပ်သည်ပြီးခဲ့သည့် ဖေဖော်ဝါရီ ၁ရက်မှ ဖေဖော်ဝါ ၁၅ရက်အတွင်း တော်လှန်ရေးအင်အားစုများအပါအဝင် အရပ်သား နှစ်ရာထက်မနည်းကို ဖမ်းဆီးခဲ့သည်ဟု ဒေသတွင်း သတင်းရင်းမြစ်များထံမှ သိရသည်။ ဖမ်းဆီးခံရသူအများစု ပြန်လွတ်လာသော်လည်း အချို့သည် အဆက်အသွယ်ပြတ်တောက်နေသည်။ဖားကန့်မြို့နယ်တွင်စစ်ကောင်စီက ယခုရက်ပိုင်း ဖမ်းဆီးသွားသူများတွင် စစ်ကိုင်းတိုင်း တန့်ဆည်မြို့ အမျိုးသားဒီမိုကရေစီအဖွဲ့ချုပ်ပါတီမှ ဒေါ်မာမာအေးလည်းပါဝင်ခဲ့သည်။
