မကွေးတိုင်း သရက်မြို့နယ်တွင် စစ်ကောင်စီတပ်က ထောင်ထားသည့်မိုင်းနင်းမိပြီး ပြည်သူသုံးဦးထိခိုက်ကာ တစ်ဦးမှာ ခြေကျင်းဝက်ပြတ်သွားကြောင်း ဒေသခံများက People’s Spring သတင်းဌာနသို့ ပြောသည်။
ယနေ့ (မတ်လ ၁၆ရက်) နံနက်အစောပိုင်းက သရက်မြို့နယ် သမန်းပြင်ကျေးရွာမှ ဒေသခံအမျိုးသားသုံးဦးသည် တောအတွင်း ထင်းခွေသွားစဥ် စစ်ကောင်စီတပ်က ထောင်ထားသည့်မိုင်းနင်းမိကာ ထိခိုက်ဒဏ်ရာရခဲ့ခြင်း ဖြစ်သည်။
“တွင်းလည်ရွာ အရှေ့ဘက် ကပစ (၁၂) သိမ်းထားတဲ့ နေရာမှာ မိုင်းနင်းမိတာပါ။ နင်းမိသူနာမည်က ကိုသန်းစိန်။ စားဝတ်နေရေး ခက်ခဲသူဖြစ်ပြီး ဝါးခုတ်၊ ဖျာယက်ပြီး စားသောက်ရသူပါ” ဟု ဒေသခံတစ်ဦးက ပြောသည်။
စစ်ကောင်စီတပ်ထောင်ထားသည့် မြေမြှပ်မိုင်းအား ဦးသန်းစိန်ဆိုသူမှ နင်းမိခဲ့ခြင်းဖြစ်ပြီး ၎င်းမှာ ခြေကျင်းဝက်ပြတ်သွားကာ ကျန်သူနှစ်ဦးမှာ မိုင်းစများထိမှန်၍ ထိခိုက်ဒဏ်ရာများရသွားသည်ဟု ဒေသခံများက ရှင်းပြသည်။
Public Service Announcement
အထက်ပါ သမန်းပြင်ကျေးရွာနှင့် တွင်းလည်ကျေးရွာသည် တဆက်တစပ်တည်းရှိနေသည့် ကပ်လျက်ရွာဖြစ်ပြီး ပြီးခဲ့သည့်နှစ်ကတည်းက တွင်းလည်ကျေးရွာတွင် စစ်ကောင်စီတပ်က အထိုင်ချတပ်စွဲထားကာ ကျေးရွာအနီးဝန်းကျင်တွင် မိုင်းများထောင်ထားခြင်းဖြစ်ကြောင်း ဒေသခံပြည်သူများထံမှ စုံစမ်းသိရသည်။
