▪︎စစ်အုပ်စုအာဏာသိမ်းပြီးမှထွက်ပြေးတိမ်းရှောင်နေရသူ ၁ ဒသမ ၄ သန်းနီးပါရှိဟုဆို
မြန်မာနိုင်ငံတွင် နေရပ်စွန့်ခွာ ထွက်ပြေးရသူ ၁ဒသမ ၇သန်းကျော်( ၁၇သိန်းကျော်) ရှိသည့်အနက် တိမ်းရှောင်ရသူဦးရေ ၁ ဒသမ ၄ သန်းနီးပါးသည် စစ်ကောင်စီတပ် အာဏာသိမ်းပြီးနောက်ပိုင်းတိမ်းရှောင်ရသူများဖြစ်ကြောင်း ကုလသမဂ္ဂ လူသားချင်းစာနာမှုဆိုင်ရာ ညှိနှိုင်းရေးရုံး-မြန်မာ(UN OCHA – Myanmar) ကယနေ့ ထုတ်ပြန်သည်။
တိမ်းရှောင်သူ အများဆုံးမှာ နိုင်ငံ၏ အနောက်မြောက်ပိုင်းနှင့် အရှေ့တောင်ပိုင်းက ဖြစ်ပြီး အနောက်မြောက်ပိုင်းတွင် ၉၄၃၁၀၀ဦး ၊ အရှေ့တောင်ပိုင်းတွင်၄၀၉၄၀၀ဦးရှိသည်ဟုဆိုသည်။
ပြီးခဲ့တဲ့ရက်သတ္တပတ်တွေအတွင်းကချင်ပြည်နယ်၊ ကယားပြည်နယ်၊ ရှမ်းပြည်နယ်နဲ့ ပဲခူးတိုင်းဒေသကြီးအရှေ့ပိုင်းက မြို့နယ်အများအပြားမှာ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများအပါအဝင် တိုက်ပွဲများ ပြင်းထန်စွာ ဖြစ်ခဲ့၍ နေရပ်စွန့်ခွာရသူများ၊ အရပ်သားထိခိုက်သေဆုံးမှုများနှင့် အရပ်သားပိုင်ပစ္စည်းပျက်စီးဆုံးရှုံးမှုများ ဖြစ်ခဲ့ကြောင်း ဖော်ပြထားသည်။
UNOCHA ၊ UNHCR စသော ကုလ လက်အောက်ခံအဖွဲ့အစည်းများသည် တိုက်ပွဲများနှင့် မလုံခြုံမှုကြောင့်ထွက်ပြေးတိမ်းရှောင်နေရသောမြန်မာ ပြည်သူ အရေအတွက်ကို ၂၀၂၂ အောက်တိုဘလကုန်ပိုင်းအထိသာ တိုင်းနှင့်ပြည်နယ်အလိုက်ထုတ်ပြန်ပြီး ထိုနောက်ပိုင်း အသေးစိတ်မထုတ်ပြန်တော့ဘဲ စုစုပေါင်းအရေအတွက်သာထုတ်ပြန်သည်။ တိုင်းနှင့် ပြည်နယ်အလိုက်ထုတ်ပြန်ရာတွင်လည်း မြေပြင်တွင် စစ်ဘေးရှောင်များကို ကူညီပေးနေသောအဖွဲ့အစည်းများကစာရင်းထက်၎င်းတို့စာရင်းမှာ များစွာလျော့နည်းနေကြောင်းမြေပြင်တွင် အကူအညီပေးနေသောအဖွဲ့အစည်းများကပြောသည်။ဥပမာအားဖြင့် ကရင်နီ ပြည်နယ်တွင် ၂၀၂၂ နှစ်ကုန်ပိုင်း၌ စစ်ဘေးရှောင်ပြည်သူ နှစ်သိန်းဝန်းကျင်ရှိကြောင်းမြေပြင်တွင် အကူအညီပေးနေသော အဖွဲ့ အစည်းများက ပြောသော်လည်း UNOCHA ၏ စာရင်းတွင် တစ်သိန်းပင်မပြည့်ဟုဖော်ပြထားခြင်းဖြစ်သည်။
မြန်မာနိုင်ငံတစ်ဝန်း၌ ဆက်လက်ဖြစ်ပွားနေသည့် ပဋိပက္ခများကြောင့် လူသားချင်းစာနာမှုဆိုင်ရာ လိုအပ်ချက်တွေ မြင့်တက်နေကြောင်းလည်း ထုတ်ပြန်ခဲ့သည်။
စစ်ကောင်စီတပ်သည် ကရင်၊ ကရင်နီ၊ချင်းဒေသများ၊ စစ်ကိုင်း နှင့် မကွေးဒေသများ၌ စစ်အင်အားအလုံးအရင်းဖြင့် ထိုးစစ်ဆင်လျက်ရှိပြီး ဒေသခံပြည်သူများ နေထိုင်ရာသို့ လေကြောင်း တိုက်ခိုက်ခြင်း၊ လက်နက်ကြီးပစ်ခတ်ခြင်းများ လုပ်ဆောင်လျက်ရှိသည်။ထို့ပြင် ကျေးရွာများကို မီးရှို့ဖျက်ဆီးမှုများ ဆက်တိုက်လုပ်ဆောင်လျက်ရှိရာ အိမ်ခြေ ၆၀၀၀၀(ခြောက်သောင်း)ကျော်ကို စစ်ကောင်စီတပ်က မီးရှို့ဖျက်ဆီးခဲ့ကြောင်း Data for Myanmarက ထုတ်ပြန်သည်။
စစ်ကောင်စီတပ်၏ လက်နက်ကြီးနှင့် လေကြောင်း တိုက်ခိုက်မှု၊ အရပ်သားများကို လူသားဒိုင်းအဖြစ် ဖမ်းဆီးမှု၊ ဖမ်းဆီးသတ်ဖြတ်မှုများကြောင့် ပြည်သူလူထု သေဆုံးထိခိုက်မြင့်တက်လျက်ရှိကြောင်း၊ ထို့ပြင် အစုလိုက် အပြုံလိုက်သတ်ဖြတ်မှုများ စစ်ကောင်စီက ဆက်လက်ကျူးလွန်လျက်ရှိကြောင်း တိုင်းရင်းသားအဖွဲ့အစည်းများနှင့် အမျိုးသားညီညွတ်ရေးအစိုးရက ထုတ်ပြန်ထားသည်။