ကရင်ပြည်နယ် မြ၀တီမြို့နယ်အတွင်းရှိ ကုန်သွယ်ရေးဇုန်နှင့် စစ်ကောင်စီလက်အောက်ခံ ရဲစခန်း၊ တပ်စခန်းများကို ယနေ့ မနက် အစောပိုင်း၌ တော်လှန်ရေးတပ်ပေါင်းစုများက ဝင်ရောက်တိုက်ခိုက်ခဲ့သည်။
တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီဘက်က လေကြောင်းပစ်ကူအသုံးပြုခဲ့သလို မြ၀တီ-ကော့ကရိတ် အာရှလမ်းပိုင်းတွင်လည်း ဗုံးပေါက်ကွဲမှုကြောင့် ကားလမ်းပျက်စီးသွားခဲ့ကြောင်း ဒေသခံများ၏ ပြောကြားချက်အရ သိရှိရသည်။
ယနေ့ နံနက်(၆)နာရီအချိန်ခန့်တွင် မြ၀တီမြို့နယ် သင်္ဃန်းညီနောင်အတွင်းရှိ စစ်ကောင်စီ၏ ခမရ(၃၅၅)တပ် ရင်း၊ ခမရ(၃၅၆)တပ်ရင်းများကို တော်လှန်ရေးတပ်ပေါင်းစုအဖွဲ့က ဒရုန်းဖြင့်ဗုံးချတိုက်ခိုက်ခဲ့ပြီး မြ၀တီကုန်သွယ်ရေးဇုန်နှင့် သင်္ဃန်းညီနောင်ရဲစခန်းကိုလည်း တပ်ပေါင်းစုအဖွဲ့မှ ဝင်ရောက်ပစ်ခတ်တိုက်ခိုက် မီးရှို့ခဲ့ကြောင်း မြေပြင်သတင်းအရ သိရှိရသည်။
“မြ၀တီကုန်သွယ်ရေးဇုန် ရဲကင်းဂိတ်မှာ ရဲ(၃)ဦးသေသွားတယ်။ စစ်ကောင်စီတပ်ဘက်က လက်နက်ကြီးတွေနဲ့ ပြန်လည်ပစ်ခတ်နေတယ်” ဟု မြေပြင်သတင်းရင်းမြစ်တစ်ဦးက ပြောသည်။
Public Service Announcement
ထို့အပြင် မြ၀တီ-ကော့ကရိတ်အာရှလမ်း ဆိတ်ဖူးတောင်နှင့် ဆိတ်ဖူးကုန်းအကြားတွင်လည်း ယနေ့နံနက်အစောပိုင်း တစ်နာရီခွဲအချိန်၌ ဗုံးပေါက်ကွဲမှုဖြစ်ပွားခဲ့ပြီး အာရှလမ်းပိုင်းပျက်စီးသွားခဲ့ကာ လက်ရှိတွင် အဆိုပါလမ်းပိုင်းတွင် သွားလာလို့မရတော့ကြောင်း ခရီးသွားလာသူများထံမှ သိရသည်။
“သွားလို့မရတော့ဘူး၊ ပြန်လှည့်လာပြီ။ အခု တံတားကျိုးဂိတ်(ကော့ကရိတ်)မှာ ပိတ်လိုက်ပြီ။ အပေါ်မှာ တိုက်ပွဲဖြစ်တယ်လို့ ပြောတယ်” ဟု ခရီးသွားလာသူတစ်ဦးက ပြောသည်။
ယနေ့ နံနက်(၉)နာရီအချိန်ခန့်၌ ကေအဲန်ယူ-ကရင်အမျိုးသားအစည်းအရုံး တပ်မဟာ(၆)နယ်မြေ မြ၀တီမြို့နယ် အတွင်းမဲကနယ်ဘက်တွင် စစ်ကောင်စီတပ်မှ ဂျက်တိုက်လေယာဉ်၊ ရဟတ်ယာဉ်များဖြင့် ပစ်ခတ်တိုက်ခိုက်မှုများ လုပ်ဆောင်နေပြီး ထိခိုက်မှုကို လတ်တလောတွင် မသိရှိရသေးဘူးလို့ ဒေသခံတစ်ဦး၏ ပြောဆိုချက်အရ သိရသည်။
