▪︎ကော့ကရိတ်မြို့အနီးတွင်လည်းတိုက်ပွဲဖြစ်
ကရင်ပြည်နယ် မြ၀တီမြို့နယ်ရှိ စစ်ကောင်စီဂိတ်နှင့် တပ်စွဲရာနေရာကို ကရင်အမျိုးသားအစည်းအရုံး(KNU) ဦးဆောင်သည့် ပူးပေါင်းတပ်ဖွဲ့က ယနေ့မတ်လ ၂၅ရက်မနက်တွင် ဝင်ရောက်စီးနင်းတိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုရှိပြီး လက်နက်ခဲယမ်းများ သိမ်းဆည်းရရှိခဲ့ကြောင်း KNU သတင်းရင်းမြစ်က ပြောသည်။
“သင်္ဃန်းညီနောင် သူတို့စခန်း တစ်ခု၊ ကားလမ်းနားမှာပဲထင်တယ်။ အဲဒီမှာ ဝင်ပစ်တာ။ ပစ်တော့ သူတို့(စစ်ကောင်စီ)လူ ၂၀လောက်သေတယ်ပြောတယ်။ နောက်ပြီးတော့ လက်နက်လည်းရတယ်။ လက်နက်က အလက် ၂၀လောက်ရတယ်ပြောတယ်” ဟု KNU သတင်းရင်းမြစ်က ပြောသည်။
အဆိုပါ နေရာသည် ဂိတ်ဟုဆိုသော်လည်း ငွေကြေးကောက်ခံမှု ပြုလုပ်နေသည့် နေရာဖြစ်ကြောင်း ၎င်းကဆက်ပြောသည်။
“ကျနော်တို့လူတွေက ဝင်ပစ်၊ ပစ်ပြီး မီးရှို့၊ လက်နက်ပစ္စည်းတွေ သိမ်းပြီး ပြန်ထွက်တာပေါ့။သင်္ဃန်းညီနောင်နဲ့ မြ၀တီ တလျှောက်လုံးကတော့ ဖြစ်မှာပဲ။အာရှလမ်းနေရာတွေပေါ့” ဟု KNU သတင်းရင်းမြစ်က ပြောသည်။
ယနေ့ မနက် ၉နာရီကျော်အချိန်ထိ မြ၀တီ၌ ပစ်ခတ်မှုဖြစ်နေကြောင်း ကရင်တိုင်းရင်းသားလက်နက်ကိုင်တပ်ဖွဲ့ တာဝန်ရှိသူတစ်ဦးက ပြောသည်။
“သင်္ဃန်းညီနောင်နဲ့ ကုန်သွယ်ဇုန်ကို ကျုံးလိုက်ပြီတဲ။ ဟိုကောင်တွေ(စစ်ကောင်စီတပ်သားများ)သေတာ မနည်းဘူးတဲ့”ဟု သတင်းရင်းမြစ်တစ်ဦးကလည်းပြောသည်။
မြေပြင်တွင်စစ်ကောင်စီသေဆုံးမှုများပြားသဖြင့် စစ်ကောင်စီက ရဟတ်ယာဉ်ဖြင့် ပစ်ခတ်နေကြောင်း ဒေသခံများကပြောသည်။
မြ၀တီ ၊ ကော့ကရိတ်၊ ကျုံဒိုး၊ အာရှလမ်း နေရာလေးခုတွင် တော်လှန်ရေးအဖွဲ့များက ပူးပေါင်းတိုက်ခိုက်လျက်ရှိကြောင်း သတင်းရင်းမြစ်တစ်ဦးက ပြောကြားသည်။ သတင်းအသေးစိပ်ကိုထပ်မံစုံစမ်းလျှက်ရှိပါသည်။
“ကော့ကရိတ်မြို့နားတင်ဖြစ်နေတာ။အတိအကျပြောရရင် တမိုင်ကုန်းမှာ။စစ်တပ်က လက်နက်ကြီးတွေနဲ့ ပစ်နေပြီး အရပ်သားတွေ ထိခိုက်တယ်ကြားနေရတယ်” ဟု တမိုင်ကုန်းရွာဒေသခံတစ်ဦးကပြောသည်။
ယနေ့ နံနက် ၉နာရီခွဲခန့်နောက်ဆုံးရရှိသောသတင်းများအရမြဝတီကုန်သွယ်ရေးဇုံအနီးတွင် တိုက်ပွဲဆက်ဖြစ်နေပြီး ကော့ကရိတ်မြို့တွင်ပစ်ခတ်မှုသံများ မကြားရတော့ကြောင်း သတင်းရရှိသည်။