ထိုင်းနိုင်ငံအရှေ့ပိုင်း ချွန်ဘူရီပြည်နယ်တွင် မြန်မာနှင့် ကမ္ဘောဒီယားရွှေ့ပြောင်းလုပ်သား ၁၂ဦးလိုက်ပါလာသည့်ယာဥ် တိုက်မှုဖြစ်ပွားရာ ကိုယ်ဝန်ဆောင်အမျိုးသမီးအပါအဝင် ၈ဦးသေဆုံးကြောင်း မဲဆောက်မြို့အခြေစိုက် မြန်မာပြည်သားများအရေးပူးတွဲလှုပ်ရှားမှုကော်မတီ (JACBA)ဥက္ကဌ ဦးမိုးကြိုးက ပြောသည်။
ယနေ့(ဧပြီ ၈ရက်) နံနက် ၅နာရီခန့်က ချွန်ဘူရီခရိုင် နောင်ခမ့်ခေါ့ကျေးရွာအုပ်စု၊ ၇ ဖတ်ထရာအဝင် အဝေးပြေးလမ်းမကြီးပေါ်တွင် ယာဥ်တိုက်မှုဖြစ်ပွားခဲ့ခြင်း ဖြစ်သည်။
ဘန်ကောက်မြို့တွင် အလုပ်လုပ်ကိုင်ကြသော အဆိုပါ မြန်မာနှင့် ကမ္ဘောဒီယားရွှေ့ပြောင်းလုပ်သားများသည် အလုပ်သမားကတ်သက်တမ်းတိုးရန် ကျန်ထဘူရီပြည်နယ်သို့ သွားရောက်ရာတွင် ယာဥ်တိုက်မှုကြုံခဲ့ရခြင်း ဖြစ်သည်။
၎င်းတို့လိုက်ပါလာသောမှန်လုံယာဉ်က ဖတ်ထယာအဝင် အဝေးပြေးလမ်းမကြီးပေါ်တွင် အရှိန်မထိန်းနိုင်ဘဲ ရှေ့မှမောင်းနှင်နေသည့်တွဲကားအား ဝင်တိုက်မိခဲ့ခြင်းဖြစ်သည်။
Public Service Announcement
အခင်းဖြစ်နေရာတွင် ကိုယ်ဝန်ဆောင်အမျိုးသမီးအပါအဝင် လေးဦးသေဆုံးပြီး ပြင်းထန်ဒဏ်ရာရရှိသော အမျိုးသမီးငါးဦးအား ချွန်ဘူရီဆေးရုံသို့ ပို့ဆောင်ပေးခဲ့ပြီး အဆိုပါ ဆေးရုံး၌ လေးဦးထပ်မံသေဆုံးခဲ့ကြောင်း ထိုင်းသတင်းဌာန ခေါင်းစွတ်က ဖော်ပြထားသည်။ သို့သော် သေဆုံးသူများတွင် မြန်မာလုပ်သားများပါဝင်ခြင်းရှိ၊မရှိနှင့် အရေအတွက်မည်မျှပါဝင်နေသည်ကို ဖော်ပြမထားပေ။
“ဘတ်သက်တမ်းတို့ဖို့ သွားကြတာလို့ သိရတယ်။သူတို့က မူလပြည်နယ်မှာ သက်တမ်းတို့ဖို့ သွားကြတာပေါ့။ စိတ်မကောင်းစရာကတော့ ကိုယ်ဝန်ဆောင်အမျိုးသမီးတစ်ဦး ပါတာပဲ။ “ဟု မဲဆောက်မြို့အခြေစိုက် မြန်မာပြည်သားများအရေးပူးတွဲလှုပ်ရှားမှုကော်မတီ(JACBA)ဥက္ကဌ ဦးမိုးကြိုးက ပြောသည်။
သေဆုံးသူများသည် အထောက်အထားပြည့်စုံစွာရှိပါက သဂြိုလ်စရိတ်အဖြစ် ဦးစွာ ဘတ်နှစ်သောင်းရရှမည်ဖြစ်ပြီး အသက်အာမခံကြေး နစ်နာကြေးအဖြစ် ဘတ်ငါးသိန်းမှ ၁၅သိန်းအထိ ရရှိနိုင်သည်ဟု ထိုင်းဥပဒေတွင် ပြဌာန်းထားကြောင်း ဦးမိုးကြိုးက ပြောသည်။
