အကြမ်းဖက်စစ်ကောင်စီက လက်နက်မဲ့ အရပ်သားပြည်သူလူထုအပေါ် ရက်စက်ယုတ်မာစွာ တိုက်လေယာဉ်များ အသုံးပြုပြီး ဗုံးကြဲမှုနှင့် နေအိမ်များ မီးရှို့မှု၊ လက်နက်ကြီးဖြင့် ပစ်ခတ်မှု၊ ဖောက်ထွန်းလုယက်ခိုယူမှု စသည့် တို့ကို ကျူးလွန်နေခြင်းကြောင့် နိုင်ငံတကာအနေဖြင့် လက်တွေ့ကျကျ အရေးယူပေးရန် တောင်းဆိုကြောင်း ချင်းအမျိုးသားကာကွယ်ရေးတပ် (CNDF)က ထုတ်ပြန်သည်။
စစ်ကောင်စီတပ်က ယမန်နေ့ (ဧပြီ ၁၀ရက်)တွင် ဖလမ်းမြို့နယ် ဝေဘူလမြို့ကို စစ်ရေးနှင့် မသက်ဆိုင်ဘဲ လေကြောင်းမှ ဗုံးကြဲခဲ့ရာ ပြည်သူ ၉ဦး သေဆုံးပြီး လေးဦး ဒဏ်ရာရခဲ့သည်။ နေအိမ် ငါးလုံးလည်း မီးလောင်ပျက်စီးခဲ့သည်။ ဖလမ်း မြို့နယ် ရမ်ထလိုရွာကိုလည်း ဧပြီ ၁၀ရက်တွင် ၆ကြိမ်ထက်မနည်း ဗုံးကြဲတိုက်ခိုက်ခဲ့သည်။
ထို့ပြင် ရမ်ထလိုရွာမှ နေအိမ် ၁၉လုံး အပါ အဝင် ဖလမ်းမြို့နယ်အတွင်းမှ ပြည်သူလူထုနေအိမ်များကို မီးရှို့ခြင်း၊ လက်နက်ကြီးဖြင့် ပစ်ခတ်ခြင်းများ လုပ်ဆောင်ခဲ့သည်။
ယင်းသို့ အကြမ်းဖက်စစ်ကောင်စီ၏ လူမဆန် သောလုပ်ရပ်များကြောင့် အသက်အိုးအိမ် ဆုံးရှုံးမှု အပေါ် ပြည်သူများနှင့်အတူ ဝမ်းနည်းရကြောင်း ဖလမ်းနယ်အတွင်း လှုပ်ရှားသည့် CNDFက ထုတ်ပြန်သည်။
Public Service Announcement
လူမျိုးတုံးသတ်ဖြတ်မှု၊ စစ်ရာဇဝတ်မှု နှင့် မြောက်များစွာသော ပြစ်မှုများ အကြိမ်ကြိမ်ကျူးလွန်နေသည့် စစ်ခေါင်းဆောင် အဆင့်ဆင့်နှင့် အာဏာရှင်များအား ဆက်လက် ချေမှုန်း သွားမည်ဖြစ်ကြောင်း CNDFက အသိပေးသည်။
CNDFသည် ဧပြီ ၁၀ရက် နံနက်ပိုင်းတွင် ဖလမ်း မြို့နယ် ဗားရ်ကျေးရွာရှိ စစ်ကောင်စီတပ်စခန်းကို တိုက်ခိုက်သိမ်းပိုက်ခဲ့ရာ စစ်ကောင်စီတပ်သား ၁၄ဦးသေဆုံးပြီး ၁၁ဦး အရှင်ဖမ်းမိခဲ့ကြောင်း၊ လက်နက် ၂၀ကျော် ရရှိခဲ့ကြောင်း ထုတ်ပြန်ထားသည်။
