မြိုင်မှပခုက္ကူသို့ ရိက္ခာသယ်သည့် ပျူကားမိုင်းဆွဲတိုက်ခိုက်ခံရပြီး ကားတစ်စီးလုံးပျက်စီး

မြိုင်မှ ပခုက္ကူသို့ ရိက္ခာယူရန်ထွက်လာသည့်ပျူစောထီးကားကို မိုင်းဆွဲတိုက်ခိုက်ရာ ကားတစ်လုံးပျက်စီးပြီး ပျူစောထီး အနည်းဆုံးတစ်ဦးသေဆုံးခဲ့ကြောင်း မြိုင်ပကဖ ကသတင်းထုတ်ပြန်သည်။

သရက်ကန်ပျူစောထီးစခန်းမှ ပခုက္ကူကို မေ ၁၁ ရက်မနက် ၇နာရီခွဲ ရိက္ခာယူရန် ထွက်လာသည့်ကားနှင့် ကင်းပုန်းယူရန်လာသည့် ပျူစောထီးများကို ဒေသခံကာကွယ်ရေးတပ်များက မိုင်းဆွဲတိုက်ခိုက်ခဲ့ခြင်းဖြစ်သည်။

ကင်းပုန်းယူရန် လာသည့် ပျူစောထီးများကို မိုင်းဆွဲတိုက်ခိုက်ခဲ့ရာတွင် ပျူစောထီး ကိုလတ်မှာ ထိုနေရာတွင်ပွဲချင်းပြီးသေဆုံးခဲ့သည်ဟု​ဖော်ပြထားသည်။

ထိုနောက် ရိက္ခာယူရန်ထွက်လာသည့်ပျူကားကို သရက်ကန်နှင့် တွင်းမရွာကြားတွင် မိုင်းဆွဲတိုက်ခိုက်ခဲ့ခြင်းဖြစ်သည်။ ပျူကားမှလုံးဝပျက်စီးသွားပြီး ပျူစောထီးများ အများအပြား ဒဏ်ရာရရှိခဲ့သည်ဟု သိရသည်။ ကားကို မီးရှို့ဖျက်ဆီးခဲ့​ကြောင်းမြိုင်ပကဖက သတင်းထုတ်ပြန်ထားသည်။

Public Service Announcement

“မြိုင်၊ပေါက်နဲ့ ပခုက္ကူတစ်ကြောမှာစစ်ကောင်စီနဲ့သူ့လက်အောက်ခံတွေရိက္ခာသယ်နေတဲ့အချိန်ဖြစ်လို့မိုင်းဆွဲတာ၊ထိတွေ့တိုက်ပွဲဖြစ်တာတွေဖြစ်လာတာ”ဟုပခုက္ကူအခြေစိုက် ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။

ထို့အပြင်ဒရုန်းဖြင့်အီနာဂါ ၅ လုံးချတိုက်ခိုက်ခဲ့ပြီး သေဆုံးထိခိုက်ဒဏ်ရာရမှုစာရင်းကိုမူ မသိရ​သေး​​ပေ။

ထိုတိုက်ခိုက်မှုကို မြိုင်မြို့နယ် ပြည်သူ့ကာကွယ်ရေးတပ်ဖွဲ့၊ တပ်ရင်း ၁ မှ တပ်ခွဲနှစ်ခွဲ၊ ကမ္မဒေသ ကာကွယ်ရေးတပ်ဖွဲ့၊ အလင်းတန်း ပြောက်ကျားတပ်ဖွဲ့၊ ဘီးလုံးငှက်တပ်ဖွဲ့၊ TYK ပြောက်ကျားတပ်ဖွဲ့နှင့် ဧရာအနောက်တပ်ဖွဲ့စသည့် ပကဖများ ပူးပေါင်းတိုက်ခိုက်ခဲ့ခြင်းဖြစ်သည်။

ထို့အပြင်မေလ ၉ရက် နံနက်ပိုင်း ကလည်းအိုရင်းရွာမှထွက်လာသော စစ်တပ်စစ်ကြောင်းကို အိုရင်းရွာမြောက်ဖက်တွင် မြိုင်ပကဖ တပ်ခွဲ ၂ ၊ ဘီလုံးငှက်တပ်ဖွဲ့တို့ကပစ်ခတ်တိုက်ခိုက်ခဲ့​သေးသည်ဟုသိရသည်။