မုန်တိုင်းဝင်ရောက်မယ့် ရခိုင်ပြည်နယ် ၊စစ်တွေမြို့မှာ လေဘေးရှောင်နေရာတွေဆီ ရောက်ရှိလာသူဦးရေ ဒီနေ့ညပိုင်းအထိ တစ်သောင်းခွဲခန့်ရှိနေပြီလို့ ကူညီကယ်ဆယ်ရေးလုပ်ဆောင်နေသူ စာရေးဆရာဝေဟင်အောင်က သူရဲ့ဖေ့ဘွတ်ခ်ကနေ အသိပေးပါတယ်။
အများစုဟာစစ်တွေမြို့က ကုန်းမြင့်အရပ်မှာရှိတဲ့ ဘုန်းတော်ကြီးကျောင်းတွေမှာသွားရောက်ခိုလှုံကြတာဖြစ်တယ်လို့သိရပါတယ်။
စစ်တွေမြို့က ဘုရားလေးဆူကျောင်း ၊ ရေပိုက်ဆုံကျောင်း ၊ အလိုတော်ပြည့်ကျောင်း ၊ အဓိဌာန်ကျောင်း၊ ဦးညာဏစက္ကကျောင်း၊ကန်တော်မင်္လာကျောင်း၊ဓမ္မစရိယ တက္ကသိုလ်နဲ့အာကျိတ်တော်ကုန်းမှာ လူအပြည့်နီးပါးခိုလှုံနေကြတယ်လို့ စာရေးဆရာဝေဟင်အောင်က သူရဲ့ဖေ့ဘွတ်ခ်မှာ စာရင်းဖော်ပြထားပါတယ်။
ရခိုင်ပြည်နယ် မြို့တော် စစ်တွေ မှာ မြို့ပေါ်နဲ့ကျေးလက်ဒေသ နေထိုင်ကြသူဦးရေဟာ စစ်ကောင်စီရဲ့ထွေအုပ်စာရင်းအရသုံးသိန်းကျော်ရှိပါတယ်။
Public Service Announcement
စစ်တွေမြို့ခံတွေထဲမှာ မြို့ကို စွန့်ခွာပြီးအခြားရပ်ရွာတွေဆီ တိမ်းရှောင်သွားကြသူတွေရှိသလို မပြောင်းမရွှေ့ဘဲ မြို့ထဲမှာ နေကြသူတွေလည်းရှိနေပါတယ်။
အချို့ကလည်း မြို့ပေါ်က လေးဘေးရှောင်နေရာတွေဆီ သွားရောက်တိမ်းရှောင်ကြတယ်လို့သိရပါတယ်။
လက်ရှိမှာတော့ မုန်တိုင်းဟာ စစ်တွေမြို့ရဲ့ အနောက်တောင်ဘက် မိုင် ၃၄၀ ကျော် ပင်လယ်ပြင်မှာရောက်ရှိနေတယ်လို့ အိန္ဒိယမိုးဇလက ခန့်မှန်းထားပါတယ်။
မုန်တိုင်းဟာ ရခိုင်ကမ်းရိုးတန်းကို စစ်တွေမြို့ အနီးကနေ မနက်ဖြန် နေ့လယ်ပိုင်းမှာ အမြင့်ဆုံး လေတိုက်နှုန်းတစ်နာရီကို ၁၁၅ မိုင်ကနေ ၁၂၅ မိုင်နဲ့ ဖြတ်သန်းမှာပါ။
မုန်တိုင်းဖြတ်ချိန်မှာ မုန်တိုင်းဒီရေဟာ စစ်တွေနဲ့မောင်တောမြို့တွေမှာ ၁၄ ပေကနေ ၁၈ ပေခန့်အထိ မြင့်တက်လာနိုင်တယ်လို့ မိုးဇလက ခန့်မှန်းထားပါတယ်။
