မုန်တိုင်းသင့်ဒေသတွေအတွက် ဒေါ်လာ ၁၇ သန်း အမေရိကန် ထပ်တိုးကူညီ

မုန်တိုင်းကြောင့် လူသားချင်းစာနာထောက်ထားမှုဆိုင်ရာအကူအညီတွေပေးဖို့ ဒေါ်လာ ၁၇ သန်း နီးပါးမြန်မာနိုင်ငံကို ထပ်တိုး ကူညီပေးသွားမယ်လို့ ရန်ကုန်မြို့မှာရှိတဲ့ အမေရိကန်သံရုံးကကြေညာအသိပေးပါတယ်။

ကနဦးက ကယ်ဆယ်ရေးလုပ်ငန်းတွေအတွက် ဒေါ်လာ ၂ သိန်းကို အမေရိကန် နိုင်ငံတကာဖွံ့ဖြိုးရေးအေဂျင်စီ (USAID) ထံကတဆင့် အမေရိကန်အစိုးရက မုန်တိုင်းအပြီးရက်ပိုင်းအတွင်းမှာတင် ထောက်ပံ့ဖူးပါတယ်။

အခုထပ်တိုးကူညီမယ့် ဒေါ်လာ ၁၇ သန်းကိုလည်း USAID ကတဆင့် မုန်တိုင်းသင့်ဒေသတွေမှာ ဆောင်ရွက်နေတဲ့ မိတ်ဖက်အဖွဲ့အစည်းတွေကို ပေးအပ်သွားမယ်လို့ အမေရိကန်သံရုံးက ဆိုပါတယ်။

ဒီထောက်ပံ့မှုတွေဟာ မုန်တိုင်းသင့်လူထုအတွက် အရေးပေါ် နားခိုစရာ ၊ သန့်ရှင်းတဲ့ရေ၊ ပတ်ဝန်းကျင်သန့်ရှင်းရေး နဲ့ ကယ်ဆယ်ရေးပစ္စည်းတွေ ပေးအပ်ရာမှာ အထောက်အပံ့ဖြစ်စေမယ်လို့ သိရပါတယ်။

Public Service Announcement