ကြာအင်းဆိပ်ကြီးမြို့က ရဲစခန်းနဲ့ စစ်တပ်တပ်စွဲထားရာနေရာတွေတပြိုင်တည်း တိုက်ခိုက်ခံရ

ကရင်ပြည်နယ်၊ ကြာအင်းဆိပ်ကြီးမြို့နယ်ကို ဝင်ရောက်တိုက်ခိုက်ခဲ့တဲ့တိုက်ပွဲအတွင်း စစ်ကောင်စီဘက်က ၁၀ ဦးခန့်အကျဆုံး ရှိတယ်လို့ တိုက်ခိုက်မှုမှာပါဝင်တဲ့ အထူးစစ်ဆင်ရေးအဖွဲ့က ဒီနေ့မှာအသိပေးကြေညာပါတယ်။

မနေ့ မနက်ပိုင်းမှာ ကြာအင်းဆိပ်ကြီးမြို့နယ်ထဲက စစ်ကောင်စီတပ်ရင်း ၊ရဲစခန်းနဲ့ စစ်ကောင်စီတပ်ဖွဲ့ဝင်တွေ တပ်စွဲထားတဲ့ ဌာနဆိုင်ရာရုံးတွေကို KNU နဲ့ PDF ပူးပေါင်းတပ်တွေ ဝင်တိုက်ခဲ့တာပါ။

အဲဒီစစ်ရေးပစ်မှတ်နေရာတွေကို တပြိုင်တည်းဝင်တိုက်တာလို့ သိရပါတယ်။

ဝင်တိုက်မယ့်နေရာတွေကို လက်ဦးမူယူတဲ့အနေနဲ့ မနက် ၄ နာရီမှာ ဒရုန်းနဲ့ ဗုံးချပြီး စတင်တိုက်ခိုက်ခဲ့ပြီး တစ်နာရီအကြာ မနက် ၅ နာရီမှာတော့ မြေပြင်ကနေ ဝင်တိုက်တာလို့ အထူးစစ်ဆင်ရေးအဖွဲ့ပြန်ကြားရေးတာဝန်ခံက ပြောပါတယ်။

Public Service Announcement

“အလင်းရောင်ရတဲ့အချိန်မှာ စပြီး ပစ်မှတ်ကိုသဲသဲကွဲကွဲမြင်ရတဲ့အချိန်မှာ တပြိုင်နက်ထိုးစစ်ဆင်ပြီး တိုက်ခိုက်တာပေါ့နော်” လို့ အထူးစစ်ဆင်ရေးအဖွဲ့ပြန်ကြားရေးတာဝန်ခံက ဆိုပါတယ်။

တိုက်ပွဲအတွင်း မျက်မြင်အရ စစ်ကောင်စီတပ်ဖွဲ့ဝင်နဲ့ ရဲတပ်ဖွဲ့ဝင် ၁၀ ဦးခန့် သေဆုံးပြီး ၁၅ ဦးခန့် ဒဏ်ရာရသလို ပူးပေါင်းတပ်တွေဘက်ကလည်း ၃ ဦး ဒဏ်ရာရတယ်လို့ အထူးစစ်ဆင်ရေးအဖွဲ့က ထုတ်ပြန်ပါတယ်။

စစ်ကောင်စီဘက်ကတော့ တိုက်ပွဲမှာအကျအဆုံးနဲ့ပတ်သက်ပြီးထုတ်ပြန်လေ့မရှိဘဲ လျှို့ဝှက်ထားတာပါ။

မနေ့က တိုက်ခိုက်မှုမှာ စစ်ကောင်စီတပ်စွဲထားတဲ့ ရဲစခန်း နဲ့ တရားရုံးဟာ ပျက်စီးသွားသလို ဆက်သွယ်ရေးရုံးကိုလည်း မီးရှို့ဖျက်ဆီးနိုင်ခဲ့တယ်လို့ အထူးစစ်ဆင်ရေးအဖွဲ့က ဆိုပါတယ်။

ကြာအင်းဆိပ်ကြီးမြို့ တိုက်ပွဲအတွင်း အရပ်သား ထိခိုက်သေဆုံးမှုတွေလည်း ရှိခဲ့ပါတယ်။

အရပ်သားထိခိုက်သေဆုံးမှုနဲ့ပတ်သက်ပြီးတော်လှန်ရေးအင်အားစုတွေဘက်က စစ်ကောင်စီရဲ့ ပစ်ခတ်မှု ကြောင့်လို့ ဆိုထားသလို. စစ်ကောင်စီဘက်ကလည်း KNU နဲ့ PDF လက်ချက်လို့ အပြန်အလှန်စွပ်စွဲထားတာတွေ့ရပါတယ်။

စစ်ကောင်စီတပ်ဟာ တိုက်ပွဲအတွင်း တိုက်ခိုက်ရေးရဟတ်ယာဉ်နဲ့ လေကြောင်းပစ်ကူပေးခဲ့တယ်လို့ ဒေသခံအချို့ က ပြောထားပါတယ်။

ကြာအင်းဆိပ်ကြီးမြို့ပေါ်က စစ်ကောင်စီစခန်းတွေကို KNU နဲ့ PDF ပူးပေါင်းတပ်တွေဟာ ပြီးခဲ့တဲ့နှစ် ဇန်နဝါရီလအတွင်းကလည်း ဝင်ရောက်တိုက်ခိုက်ခဲ့တာရှိပါတယ်။