စစ်အုပ်စု၏ အစုလိုက်၊အပြုံလိုက်သတ်ဖြတ်နေမှုများ ရပ်တန့်ရန်နှင့် မြန်မာပြည်သူလူထု၏ ဒီမိုကရေစီရေးရာ စိတ်ဆန္ဒကို ဖော်ဆောင်နိုင်မည့် နိုင်ငံရေးအဖြေထွက်ပေါ်လာရန် ကုလသမဂ္ဂအတွင်းရေးမှူးချုပ်ကိုယ်တိုင်ကိုယ်ကျဦးစားပေးဆောင်ရွက်ရန်လိုအပ်ကြောင်း NUG နိုင်ငံခြားရေးဝန်ကြီးဌာနက ထုတ်ပြန်သည်။
ဇွန်လ ၃ ရက်စွဲဖြင့် ယမန်နေ့တွင် ထုတ်ပြန်သော အမျိုးသားညီညွတ်ရေးအစိုးရ NUG နိုင်ငံခြားရေးဝန်ကြီးဌာနက မြန်မာ့အရေးနှင့်ပတ်သက်၍ ယခုအချိန်သည် ကုလအထွေထွေအတွင်းရေးမှူးချုပ် အန်တိုနီယိုဂူတားရက်စ် ဦးဆောင်လမ်းပြရမည့်အချိန်ဖြစ်ကြောင်း ဖော်ပြသည်။
မြန်မာနိုင်ငံ၏ လက်ရှိအခြေအနေကြီးလေးမှုနှင့် အထူးကိုယ်စားလှယ်၏ တာ၀န်ရပ်ဆိုင်းမှုမှဖြစ်ပေါ်လာမည့် လစ်ဟာမှုတို့ကြောင့် အတွင်းရေးမှူးချုပ်အနေဖြင့် ကုလသမဂ္ဂအဖွဲ့အစည်းများကို ကောင်းစွာအသုံးချရန်လိုအပ်ကြောင်း နိုင်ငံခြားရေးဝန်ကြီးဌာနက တိုက်တွန်းသည်။
NUG နိုင်ငံခြားရေးဝန်ကြီးဒေါ်ဇင်မာအောင်သည် မကြာမီတွင် မြန်မာနိုင်ငံဆိုင်ရာ ကုလသမဂ္ဂအထူးကိုယ်စားလှယ်အဖြစ် နုတ်ထွက်တော့မည့် ဒေါက်တာနိုလင်းဟေဇာနှင့် ဇွန်လ ၂ ရက်တွင် လူချင်းတွေ့ဆုံခဲ့ပြီး အမျိုးသားညီညွတ်ရေးအစိုးရအနေဖြင့် အထူးကိုယ်စားလှယ်၏လုပ်ငန်းတာ၀န်များနှင့်ပတ်သက်၍ ဒေါက်တာနိုလင်းဟေဇာ၏နှစ်မြှုပ်ဆောင်ရွက်ခဲ့မှုများကို အသိအမှတ်ပြုကြောင်း ထည့်သွင်းပြောကြားသည်။
Public Service Announcement
သို့သော် အထူးကိုယ်စားလှယ်ဒေါက်တာနိုလင်းဟေဇာပြောကြားခဲ့သည့်အတိုင်း မြန်မာ့အရေးအပေါ် နိုင်ငံတကာအသိုင်းအဝန်း၏ ဖြေရှင်းဆောင်ရွက်မှု ကင်းမဲ့ခြင်းသည် အထူးကိုယ်စားလှယ် ဆောင်ရွက်ရာတွင် ရင်ဆိုင်ကြုံတွေ့ခဲ့ရသည့် အခက်အခဲ၊အတားအဆီးများကို ပိုမိုခက်ခဲဆိုးရွားစေခဲ့ကြောင်း NUG နိုင်ငံခြားရေးက ဆိုသည်။
စင်ကာပူနိုင်ငံသူ ဒေါက်တာနိုလင်းဟေဇာသည် ကုလသမဂ္ဂအထွေထွေအတွင်းရေးမှူးချူပ်၏ အထူးကိုယ်စားလှယ်အဖြစ် လပေါင်း ၂၀ ခန့်ကြာ တာ၀န်ထမ်းဆောင်ခဲ့သည်။ ၎င်းတာ၀န်ထမ်းဆောင်စဥ်ကာလအတွင်း မြန်မာနိုင်ငံသို့ တစ်ကြိမ်လာရောက်ခဲ့ရာ အာဏာသိမ်းစစ်အုပ်စုနှင့်သာ တွေ့ဆုံခွင့်ရခဲ့ပြီး မတရားဖမ်းဆီးထိန်းသိမ်းခံထားရသည့် နိုင်ငံတော်သမ္မတဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်တို့နှင့် တွေ့ဆုံခွင့်မရခဲ့ပေ။
