အမျိုးသားညီညွတ်ရေးအစိုးရ NUG လူ့အခွင့်အရေးဆိုင်ရာဝန်ကြီးဌာန အကြံပေး ဦးအောင်ကျော်မိုး၏ အစ်ကိုအကြီးဆုံးကို ပျူစောထီးများက ဇွန်လ ၇ ရက် ည ၁၁ နာရီခန့်တွင် သတ်ဖြတ်ခဲ့ကြောင်းသတင်းရရှိသည်။
ဦးအောင်ကျော်မိုး၏ အစ်ကိုအကြီးဆုံး အသက် ၄၅ နှစ်အရွယ် ဦးသန်းမြင့်(ခ)Sayedul Anwar ကို ရန်ကုန်မြို့ ဒေါပုံမြို့နယ် နွယ်အေးဗလီအနီးတွင် ပျူစောထီးများက ရည်ရွယ်ချက်ရှိရှိ သတ်ဖြတ်ခဲ့ခြင်းဖြစ်ပြီး ဦးသန်းမြင့်မှာ ဓားဒဏ်ရာ ၅ ချက်အပါအဝင် အခြားဒဏ်ရာများဖြင့် သွေးအိုင်ထဲ လဲကျသေဆုံးခဲ့ခြင်းဖြစ်ကြောင်း ဦးအောင်ကျော်မိုးက ပြောသည်။
“ဒီလိုလူစည်ကားတဲ့နေရာမှာ ရက်စက်စက်သတ်တာက အင်မတန်လူမဆန်တဲ့လုပ်ရပ်ဖြစ်ပါတယ်” ဟု ဦးအောင်ကျော်မိုးက People’s Spring သို့ပြောသည်။
အထက်ပါသတ်ဖြတ်ခံမှုအပေါ် ဘူးသီးတောင်မြို့နယ် ပြည်သူ့လွှတ်တော်ကိုယ်စားလှယ်ဟောင်း ဦးရွှေမောင်က ဦးသန်းမြင့်၏ မိသားစုနှင့်အတူ ထပ်တူထပ်မျှ ဝမ်းနည်းကြေကွဲရပါကြောင်းနှင့် မဂ်ဖိရာသ်ကင်းလွတ်ခွင့်ပါစေကြောင်း ဆုမွန်ကောင်းတောင်းထားသည်။
ဇွန်လ ၆ ရက် ညပိုင်းကလည်း အမျိုးသားရေးအစွန်းရောက်၊ စစ်တပ်ထောက်ခံသူ ၊အမျိုးသားရေးအစွန်းရောက်အဖွဲ့ မဘသအဖွဲ့ဝင်လီလီနိုင်ကျော် ပစ်သတ်ခံရမှုတွင် ကျူးလွန်ခဲ့သူများဟုဆိုကာစွပ်စွဲဖမ်းဆီးထားရသော ကိုကောင်းဇာနည်ဟိန်း(ခ)လပြည့် ၏ မိခင်နှင့် အစ်မဖြစ်သူတို့ကို ပျူစောထီးများက နေအိမ်အတွင်းဝင်ရောက်သတ်ဖြတ်ခဲ့သည်။
ယင်းသို့ ပျူစောထီးများ၏ သတ်ဖြတ်မှုများကို အာဏာသိမ်းစစ်ကောင်စီက အရေးယူဖမ်းဆီးခြင်းမရှိဘဲအမျိုးသားရေးအစွန်းရောက်များ၊ စစ်တပ်ထောက်ခံသူအမာခံများ သတ်ဖြတ်ခံရပါက ၎င်းတို့ သံသယရှိသူများ အထူးသဖြင့် လူငယ်များကို နာရီပိုင်းအတွင်း ဖမ်းဆီးညှင်းပန်းနှိပ်စက်မှုများ ပြုလုပ်လေ့ရှိကြောင်း ပြည်သူအချို့က ပြောသည်။
