နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို အဂတိအမှုနဲ့ တရားစွဲရာမှာ အဓိကသက်သေအဖြစ် ထွက်ဆိုရသူ စီးပွားရေးလုပ်ငန်းရှင် ဦးမောင်ဝိတ် ကို စစ်ကောင်စီက ဒီနေ့မှာ ပြန်လွှတ်ပေးလိုက်ပါတယ်။
ကာယကံရှင် ဦးမောင်ဝိတ်ကလည်း နေအိမ်ပြန်ရောက်ပြီလို့ သူရဲ့ဖေ့ဘွတ်ခ်စာမျက်နှာကနေ ဓာတ်ပုံနဲ့တကွအသိပေးထားတာတွေ့ရပါတယ်။
စစ်တပ်အာဏာသိမ်းပြီး ၃ ရက်အကြာ မှာ စစ်တပ်က ဦးမောင်ဝိတ်ကို ဖမ်းဆီးပါတယ်။
အဲဒီနောက် ဒေါ်ခင်ကြည်ဖောင်ဒေးရှင်းအတွက် အမေရိကန် ဒေါ်လာ ၅ သိန်းခွဲကို ဒေါ်အောင်ဆန်းစုကြည်ထံ ပေးအပ်ခဲ့တယ်လို့ ဦးမောင်ဝိတ်ထွက်ဆိုတဲ့ ရုပ်သံဖိုင်ကို စစ်ကောင်စီက ဖြန့်ဝေပါတယ်။
Public Service Announcement
အဲဒီ ထွက်ဆိုချက်ကိုအသုံးချပြီး စစ်ကောင်စီက ဒေါ်အောင်ဆန်းစုကြည် လာဘ်ယူတယ်ဆိုကာ အဂတိပုဒ်မနဲ့ တရားစွဲခဲ့ပါတယ်။
စစ်ကောင်စီရဲ့တရားရုံးမှာ အမှုစစ်ဆေးချိန် သက်သေအဖြစ် လာရောက်ထွက်ဆိုတဲ့ ဦးမောင်ဝိတ်ဟာ ဒေါ်အောင်ဆန်းစုကြည်ကို ထိုင်ရှိခိုးခဲ့တယ်ဆိုတဲ့သတင်းတွေလည်းကျယ်ကျယ်လောင်လောင်ထွက်ခဲ့ပါသေးတယ်။
ဦးမောင်ဝိတ်ကို ဖမ်းဆီးထားတဲ့ ၂ နှစ်ကျော်ကာလအတွင်း မည်သည့်နေရာမှာထားရှိတယ်ဆိုတာကိုတော့ ရှင်းရှင်းလင်းလင်းမသိရပါဘူး။
