စစ်ကောင်စီ၏ အပေါ့စားတိုက်ခိုက်ရေးလေယာဉ်ကို ကရင်နီပြည်လူမျိုးပေါင်းစုံလွတ်မြောက်ရေးတပ်ဦး(ကလလတ) ရဲဘော်များက ပျက်ကျအောင်ပစ်ခတ်နိုင်ခဲ့သည့် အထောက်အထားများရရှိပါက ဆုကြေးငွေပေးအပ်သွားရမည်ဟု ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က ပြောသည်။
ယနေ့(ဇူလိုင် ၃ရက်) ကျင်းပခဲ့သည် အစိုးရအဖွဲ့အစည်းအဝေးတွင် ပြီးခဲ့သည့် ဧပြီက ဟားခါးမြို့နယ် ချွန်ကျုံးရွာတွင် စစ်ကောင်စီ၏ သံချပ်ကာယာဉ် နှစ်စီးကို တိုက်ခိုက်ချေမှုန်း ဖျက်ဆီးနိုင်ခဲ့သည့် ချင်းအမျိုးသားတပ်မတော်(CNA)၊ ဒေသခံ ချင်းကာကွယ်ရေးတပ်(CDF)များကို ဆုကြေးငွေအဖြစ် သံချပ်ကာယာဉ် တစ်စီးလျင်ကျပ်သိန်း ၂,၀၀၀ ဖြင့် ကျပ်သိန်း ၄,၀၀၀ ဂုဏ်ပြု ချီးမြှင့်ခဲ့သည်။
အမျိုးသားညီညွတ်ရေးအစိုးရ ၏ ၂၀၂၂ ဧပြီ ၇ရက်ထုတ်ပြန်ကြေညာချက်တွင် တင့်ကား၊ သံချပ်ကာယာဉ်များအား လုံး၀ ပြန်လည်အသုံးပြု၍ မရသည်အထိ ပစ်ခတ်ချေမှုန်းနိုင်လျင် တစ်စီးလျင် ဆုငွေ အမေရိကန်ဒေါ်လာ ၁သိန်း သို့မဟုတ် ကျပ်ငွေ သိန်း ၂,၀၀၀ ဆုချီးမြှင့်မည်ဟု အသိပေးထားသည်။
ယင်းသို့ချီးမြှင့်မှုနှင့်ဆက်စပ်ပြီး ကရင်နီဒေသ၊ဘောလခဲမြို့နယ် ၊ရွာသစ် မြို့နယ်ခွဲအတွင်းတိုက်ပွဲတွင် ဇွန် ၃၀ရက်ကစစ်ကောင်စီ လေယာဉ်ပျက်ကျအောင် တိုက်ခိုက်နိုင်ခဲ့သည့် ကရင်နီရဲဘော်များအား ဆုကြေးငွေ ပေးအပ်ရန်ရှိ၊မရှိ မေးမြန်းချက်အပေါ် ဦးနေဘုန်းလတ်က ယခုကဲ့သို့ ဖြေကြားခဲ့ခြင်းဖြစ်သည်။
Public Service Announcement
“အဲဒါက ပစ်ချတဲ့အဖွဲ့က အထောက်အထားနဲ့တကွ ဖြစ်စဉ်နဲ့တကွပေါ့နော် တင်ဖို့လိုတယ်။ ဒီအတိုင်း သတင်းကြားရုံနဲ့တော့ ပေးလို့မရဘူးပေါ့နော်။ ဘာဖြစ်လို့လဲဆိုရင် အဲဒီမှာ စိစစ်ရေးအဖွဲ့ဆိုပြီး ကျနော်တို့က ဖွဲ့ပြီး သူတို့တင်ပြတဲ့ အချက်အလက်တွေ ဗွီဒီယိုဖိုင်တွေလည်းပါတယ် နောက်ပြီး ဓာတ်ပုံတွေလည်းပါတယ်။ နောက်ဖြစ်စဉ်တွေလည်း ပါတယ်။ အဲဒီလိုမျိုး အပေါ်မှာ မူတည်ပြီး တကယ် လုံး၀ သုံးစားမရအောင် တကယ်ဖျက်ဆီးလိုက်နိုင်တယ်ဆိုမှ ပေးတာပေါ့။ အခုဟာလည်း အထောက်အထားတွေနဲ့ ခုနကလိုမျိုး အထောက်အထားတွေနဲ့ တင်ပြလာရင် ပေးရမှာပေါ့” ဟု ဦးနေဘုန်းလတ်က ပြောသည်။
အမျိုးသားညီညွတ်ရေးအစိုးရ၏ ၂၀၂၂ ဧပြီ ၇ရက် ကြေညာချက်တွင် တိုက်လေယာဉ်၊ ရဟတ်ယာဉ်၊ ထောက်ပို့လေယာဉ်၊ တိုက်ရေယာဉ်များအား အကြီးစားပျက်စီးသည်အထိ ပစ်ခတ်ချေမှုန်းနိုင်လျင် တစ်စီးလျင် ဆုငွေ အမေရိကန်ဒေါ်လာ ၃သိန်း သို့မဟုတ် ကျပ်သိန်း ၆,၀၀၀ဆုချီးမြှင့်မည်ဟု အသိပေးဖော်ပြထားသည်။
ဆုချီးမြှင့်ငွေများအား အချက်အလက် ခိုင်လုံစွာတင်ပြနိုင်သည့် အစုအဖွဲ့လိုက်ဖြစ်စေ တစ်ဦးချင်းဖြစ်စေ ခံစားခွင့်ရှိကြောင်း ထုတ်ပြန်ထားသည်။
