တန့်ဆည်တွင်ယမန်နေ့(ဇူလိုင်လ ၁၅ ရက်)နံနက်က ဖြစ်ပွားသောတိုက်ပွဲ၌ စစ်ကောင်စီတပ်မှ လေးဦးသေဆုံးကာ ၁၇ဦးထက်မနည်း ဒဏ်ရာရရှိသွားပြီးယနေ့တွင်ကဒူးမရွာထဲ၌ တပ်စွဲနေကြောင်း Myanmar Defense Force -Taze -Tigerမှ တာဝန်ခံတစ်ဦးကပြောပြောသည်။
အင်အား ၁၀၀ ခန့်ရှိစစ်ကောင်စီစစ်ကြောင်းနှင့် ပြည်သူ့ကာကွယ်ရေးမဟာမိတ်များသည် တန့်ဆည်မြို့နယ် ပဲဇင်းကြီးရွာအနောက်ဘက်တွင် ဇူလိုင်လ ၁၅ ရက်နံနက် ၅နာရီ ၂၇ မိနစ်မှ နာရီ ခွဲအထိ ၁နာရီ ခန့်ကြာ တိုက်ပွဲဖြစ်ပွားခဲသည်။
“တိုက်ပွဲက တော်တော်လေးပြင်းထန်ခဲ့ပါတယ်။စစ်ကောင်စီဖက်က လေးဦးသေဆုံးပါတယ်။ ၁၇ဦးထက်မနည်း ဒဏ်ရာရသွားပါတယ်။ အတွင်းသတင်းပြန်ရပါတယ်”ဟုအထက်ပါတာဝန်ရှိသူကပြောသည်။
စစ်ကောင်စီတပ်သည် မြေပြင်တွင်အထိနာသဖြင့် နံနက် ၈ နာရီ ၁၅ မိနစ်ခန့်တွင် မုံရွာနမခ မှMI35 ရဟတ်ယာဥ်ဖြင့် လာရောက် တိုက်ခိုက်ခဲ့သည်။ တိုက်ပွဲဖြစ်ရာနေရာအနီးမှ သပြေရင်းရွာ၊ပဲဇင်းကြီးရွာနှင့်ခရမ်းခြံရွာတို့ကိုလေကြောင်းတိုက်ခိုက်မှုပြုလုပ်သွားပြီး အရပ်သားထိခိုက်မှုမရှိဟု၎င်းကဆက်ပြောသည်။
Public Service Announcement
စစ်ကောင်စီစစ်ကြောင်းသည် ယနေ့(ဇူလိုင်လ ၁၆ ရက်)နံနက်တွင် ကဒူးမရွာထဲ၌ တပ်စွဲထားဆဲဖြစ်ကြောင်းလဘ်းသိရသည်။
“ဒီနေ့တော့ မလှုပ်ရှားသေးဘူး။ ခါတိုင်းဆိုရင် တညနားပြီးတောက်လျှောက်ပြန်ထွက်တယ်။ အခုကတော့ ရွာထဲမှာပဲ ရှိနေတယ်။ မနေ့က တိုက်ပွဲမှာ ဒီကောင်တွေ အထိနာသွားပြီး ဆေးကုနေတာထင်တယ်”ဟု ပြည်သူ့ကာကွယ်ရေးရဲဘော်တစ်ဦးကပြောသည်။
လတ်တလောတွင် စစ်ကောင်စီစစ်ကြောင်းရှိရာ နေရာမှ နှစ်မိုင်ခန့်အတွင်း နေထိုင်သော ပြည်သူများဘေးလွတ်ရာ တိမ်းရှောင်နေရသည်ဟု ဒေသခံအချို့ကပြောသည်။
