ကချင်ပြည်နယ် ဖားကန့်မြို့နယ် ကသိုဏ်းတောင်စစ်ကောင်စီတပ်စခန်းကို ယနေ့မနက်အစောပိုင်းတွင် တိုက်ခိုက်သိမ်းပိုက်ခဲ့ကြောင်း ကချင်လွတ်လပ်ရေးတပ်မတော်(KIA) သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အတည်ပြုပြောကြားသည်။
ဩဂုတ် ၇ရက် နံနက်အစောပိုင်း၌ ဖားကန့်-တာမခန်လမ်းရှိ အဆိုပါ တပ်စခန်းကို KIAနှင့်ပြည်သူ့ကာကွယ်ရေးတပ်(PDF)ပူးပေါင်းတပ်က တိုက်ခိုက်သိမ်းပိုက်ခဲ့ခြင်းဖြစ်သည်။
“ဒီမနက် ၅နာရီ ဝန်းကျင်ကတည်းက ဒီဖားကန့် ကျနော်တို့ ကချင်အခေါ်နဲ့ကတော့ ကဆင့်ဘွမ်လို့ခေါ်တယ်ကသိုဏ်းတောင် စကစ တပ်စခန်းတွေကို ကျနော်တို့ တပ်မဟာ(၉) လက်အောက်ခံတပ်ရင်း(၆) စုပေါင်း အဖွဲ့တွေလာပြီးမှ ဝင်စီးတဲ့ တိုက်ပွဲရှိပါတယ်။ အခုထက်ထိတော့ စကစတွေထိုင်နေတဲ့ စခန်းတွေ အကုန်လုံး သိမ်းနိုင်ပြီးတော့ ကျနော်တို့ အဖွဲ့တွေ နယ်မြေရှင်းလင်းရေးလုပ်ပြီးတယ်ဆိုတဲ့ သတင်းရပါတယ်ဗျ” ဟု ဗိုလ်မှူးကြီးနော်ဘူကPeople’s Spring သို့ ပြောသည်။
KIA အနေဖြင့် တိုက်ပွဲ၌ ထိခိုက်သေဆုံး အခြေအနေများကို လိုအပ်မှသာ ထုတ်ပြန်အသိပေးလေ့ရှိသည်။
Public Service Announcement
ဒေသခံ သတင်းရင်းမြစ်ကမူ ကသိုဏ်းတောင်စခန်းသိမ်းတိုက်ပွဲ၌ စစ်ကောင်စီတပ်က သေဆုံးသူ၊ ထွက်ပြေးသူများ ရှိပြီး လက်နက်ခဲယမ်းများ သိမ်းဆည်းရရှိခဲ့သည်ဟု သိရကြောင်း ပြောသည်။
ထို့အပြင် ဖားကန့်မြို့နယ် ဆယ်ဇင်းဒေသ၌လည်း KIA/PDF ပူးပေါင်းတပ်နှင့်စစ်ကောင်စီ၊ရှမ်းနီတပ်ပူးပေါင်းတပ် တို့တိုက်ပွဲဖြစ်နေသည်ဟု ဒေသခံက ပြောသည်။
KIAသည် မြစ်ကြီးနား – ဗန်းမော်လမ်းရှိ စစ်ကောင်စီတပ်စခန်းအချို့ကိုလည်း ပြီးခဲ့သည့် ရက်ပိုင်းအတွင်းကတိုက်ခိုက်သိမ်းပိုက်ခဲ့သည်။
