ဓနုကိုယ်ပိုင်အုပ်ချုပ်ခွင့်ရဒေသ ရွာငံမြို့နယ်တွင် ချိတ်ပိတ်ခံထားရသည့်နေအိမ်၌ တပ်စွဲထားသည့် စစ်ကောင်စီတပ်ကို ပြည်သူ့ကာကွယ်ရေးတပ်ဖွဲ့ကတိုက်ခိုက်ရာ စစ်သား နှစ်ဦး သေဆုံးခဲ့သည်။
ရွာငံမြို့နယ်၊ နွားဘန်းကြီးကျေးရွာရှိ စစ်ကောင်စီတပ်ဖွဲ့အင်အား ၃၀ခန့်တပ်စွဲထားသော နေအိမ်ကိုရွာငံမြို့နယ်အခြေစိုက် မှော်ဘုရင်စစ်ကြောင်း (YMBY)က ဩဂုတ် ၁ရက်တွင် ဝင်ရောက်တိုက်ခိုက်ခဲ့ခြင်းဟု တော်လှန်ရေးအင်အားစုများကသတင်းထုတ်ပြန်သည်။
“ကျွန်တော်တို့ဒီဒေသမှာပြန်လှုပ်ရှားတဲ့ ပထမဆုံးမစ်ရှင်ဖြစ်တယ်။ နှစ်ကောင် သေတာ အတည်ပြုနိုင်ခဲ့တယ်။သုံးကောင်ကတော့ဒဏ်ရာရပြီးထွက်ပြေးသွားတယ်။ ကျွန်တော်တို့ဘက်က ထိခိုက်မှုမရှိပါဘူး”ဟု မှော်ဘုရင်စစ်ကြောင်းအဖွဲ့က ဆက်သွယ်ရေးနှင့်ပြန်ကြားရေးတာဝန်ခံ ကိုထွဋ်ခေါင်က ပြောသည်။
တိုက်ခိုက်မှုသတင်းကို ယနေ့မှ ထုတ်ပြန်ရခြင်းမှာ ပြည်သူ့ကာကွယ်ရေးတပ်ဖွဲ့ဝင်များ၏ လုံခြုံရေးအတွက်ဟု ဒေသတွင်း တော်လှန်ရေးသတင်းများကို ဖော်ပြပေးနေသည့် Voice Of Pindaya က ဆိုသည်။
Public Service Announcement
ဓနုကိုယ်ပိုင်အုပ်ချုပ်ခွင့်ရဒေသမှ လူငယ်များနှင့် စစ်အာဏာရှင်ဆန့်ကျင်ရေးလှုပ်ရှားသည့် တော်လှန်ရေးအင်အားစုများ ပူးပေါင်းဖွဲ့စည်းထားသော ဓနုပြည်သူ့လွတ်မြောက်ရေးတပ်ဦး (Danu People’s Liberation Front) က စစ်အာဏာရှင်အား အမြစ်ဖြတ်တိုက်ထုတ်ပြီး ဖက်ဒရယ်ဒီမိုကရေစီပြည်ထောင်စု ပေါ်ပေါက်ရန်အတွက်တိုက်ပွဲဝင်မည်ဟု ပြီးခဲ့သည့် ဇူလိုင် ၂၉ ရက်ကထုတ်ပြန်ခဲ့သည်။
ထိုနောက်ပိုင်းတွင် စစ်ကောင်စီက ပင်းတယနှင့် ရွာငံမြို့နယ်တို့ကို လုံခြုံရေးတင်းကြပ်ပြီးနောက် ဒေသခံများကို ဖမ်းဆီးနေသည်။ ထိုအခြေအနေများကြားမှ မှော်ဘုရင်စစ်ကြောင်းက တိုက်ပွဲဖော်ဆောင်ခဲ့ခြင်းဖြစ်သည်။
