ဒီးမော့ဆို – ဖရူဆိုလမ်းမကြီးတိုက်ပွဲ ပြန်လည်စတင်နေပြီဟု ဒီးမော့ဆိုမြို့နယ်ပြည်သူ့ကာကွယ်ရေးတပ်ဖွဲ့မှ တာဝန်ရှိသူက လူထုနွေဦးသို့ ပြောသည်။
ယနေ့(သြဂုတ် ၂၁ရက်)နံနက်ပိုင်းကစ၍ တိုက်ပွဲမှာ ပြင်းထန်နေဆဲဖြစ်ကာ စစ်ကောင်စီက လက်နက်ကြီးများ အဆမတန်အသုံးပြုနေကြောင်းလည်း ၎င်းက ဆိုသည်။
“တိုက်ပွဲကပြန်စနေပြီပေါ့။ အရင်ဖြစ်ခဲ့တဲ့နေရာတွေ တစ်ဝိုက်ပဲ။သူတို့ဘက်က ထိုးစစ်စလို့ ထိတွေ့မှုဖြစ်နေတာပေါ့”ဟု အထက်ပါတာဝန်ရှိသူက ရှင်းပြသည်။
ဩဂုတ် ၂ရက်ကစ၍ ဒီးမော့ဆို – ဖရူဆို ပြည် ထောင်စုလမ်းမကြီး ထိန်းချုပ်ရန် စစ်ကောင်စီက ထိုးစစ်ဆင်ခဲ့သည်။
Public Service Announcement
နှစ်ပတ်ကြာတိုက်ပွဲအတွင်း စစ်ကောင်စီ၏ တပ် ရင်းမှူး၊ဒုတပ်ရင်းမှူးများအပါအဝင် ၇၁ ဦး သေဆုံးပြီး လက်နက်ကြီး၊လက်နက်ငယ်၁၆ လက်ရရှိကြောင်း ကရင်နီအမျိုးသားများကာကွယ်ရေးတပ်(KNDF)က ထုတ်ပြန်ထားသည်။
ဒီးမော့ဆို – ဖရူဆို ပြည်ထောင်စုလမ်းမကြီးတစ် လျှောက် စစ်ကြောင်းအရ တပ်မ (၅၅)လက် အောက်ခံ ခမရ (၁၁၂)၊ ခလရ (၃)တပ်များဖြစ်သည်။
သြဂုတ် ၁၀ရက်မှ ၁၂ရက်အတွင်း ငွေတောင်ရွာသစ်နှင့် ထီးသော်ကူးရွာတို့တွင် တိုက်ပွဲများအထူးပြင်းထန်ခဲ့ကာ ခမရ(၁၁၂)မှ ၄၅ ဦးနီးပါး ထိခိုက်သေဆုံးပြီး၊ ခလရ(၃)မှ တပ်ရင်းမှူးနှင့် ဒုရင်းမှူးအပါအဝင် ၂၆ဦးခန့် ထိခိုက်သေဆုံးခဲ့သည်။
စစ်ကောင်စီထံမှ လက်နက်ငယ်အစုံ ၁၅ လက်၊ လက်နက်ကြီး တစ်လက်အပါအဝင် ဆက်စပ်ခဲယမ်း မီးကျောက်များ၊ ကျည်ဆံများနှင့် အသုံးအဆောင်ပစ္စည်းများအား သိမ်းဆည်းရရှိခဲ့သည်။
ထို့အတူ ကရင်နီတပ်မတော်(KA)မှ ဒုဗိုလ်တစ်ဦး၊ KNDF/B-04 မှ ရဲဘော်တစ်ဦး နှင့် KNDF/B-19 မှ ရဲဘော်တစ်ဦးတို့ ကျဆုံးခဲ့ရသည်။
ဒီးမော့ဆို – ဖရူဆိုလမ်းပိုင်းတိုက်ပွဲ၌ ကရင်နီတပ်မ တော်(KA)၊ ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး(ကလလတ)၊ အလယ်ပိုင်းတိုင်း -ကရင်နီ(ကယား)စစ်ဒေသခွဲတပ်ရင်းများပူးပေါင်းစစ်ကြောင်း၊ ဒီးမော့ဆိုပြည်သူ့ကာကွယ်ရေးတပ် (DMO Local PDF) ကရင်နီဝံပုလွေစစ်ကြောင်းနှင့် ကရင်နီအမျိုးသားများကာကွယ်ရေးတပ်(KNDF)တို့ပူးပေါင်းတိုက်ခိုက်နေဆဲဖြစ်သည်။
