စစ်ကိုင်းတိုင်း၊ ဒီပဲယင်းမြို့နယ်တွင် စစ်ကြောင်းထိုးနေသော စစ်ကောင်စီတပ်၏ ပစ်ခတ်သတ်ဖြတ်မှုကြောင့် အမျိုးသားတစ်ဦးသေဆုံးကာ တစ်ဦးဒဏ်ရာရရှိကြောင်း ဒေသတွင်းသတင်းရင်းမြစ်များက ပြောသည်။
ယနေ့(စက်တင်ဘာ ၃၀ရက်)နံနက်ပိုင်းမှစတင်ကာ ဒီပဲယင်းမြို့နယ်အနောက်ခြမ်းသို့ စစ်ကြောင်းထိုးနေသော စစ်ကောင်စီတပ်သည် လပ်တီးကျေးရွာမှ ဒေသခံပြည်သူ ဦးအား ဖမ်းဆီးပြီး အသက်(၄၅)နှစ်အရွယ် အမျိုးသားအား သတ်ဖြတ်ခဲ့ကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
ထို့အပြင် ပျံကျကျေးရွာသို့ ဝင်ရောက်စဉ် လက်နက်ကြီးများဖြင့် အကြောင်းမဲ့ ပစ်ခတ်ခဲ့၍ (၄၀)အရွယ် အမျိုးသားတစ်ဦး လက်နက်ကြီးထိမှန်ဒဏ်ရာရရှိခဲ့ကြောင်း အထက်ပါအဖွဲ့က ပြောသည်။
ထို့အပြင် ညနေ ၅နာရီ ၄၅မိနစ်ခန့်က မုံရွာအနောက်မြောက်တိုင်း စစ်ဌာနချုပ်(နမခ)မှ တက်လာသည့် Mi-35 ရဟတ်ယာဥ် တစ်စီးသည် ဒီပဲယင်းမြို့နယ်၊ အနောက်ခြမ်းရှိ စစ်ကောင်စီစစ်ကြောင်းဝင်နေသော အေးသာယာ(ပျံကျရွာ)အနီးဝန်းကျင်ကို လေကြောင်းပစ်ခတ်တိုက်ခိုက်ခဲ့ကြောင်း People’s Defense Comrade အဖွဲ့ ပြန်ကြားရေးတာဝန်ခံ ကိုထူးခန့်ဇော်(အမေ့သား)က ပြောသည်။
Public Service Announcement
သို့သော် လေကြောင်းပစ်ခတ်မှုကြောင့် ထိခိုက်မှုအခြေအနေများကိုမူ မသိရသေးပေ။
ထို့အပြင် တော်လှန်ရေးအင်အားစုများနှင့် စစ်ကောင်စီစစ်ကြောင်း ထိတွေ့ပစ်ခတ်မှုများလည်းရှိပြီး စစ်ကောင်စီတပ် ထိခိုက်မှုများကြောင်း ဒေသတွင်းသတင်းရင်းမြစ်များက ပြောသည်။
“လေကြောင်းပစ်တာ ထိခိုက်မှုတော့မရှိဘူး ။ ပြည်သူတစ်ဦးပဲ လပ်တီးရွာမှာ ခေါင်းဖြတ်အသတ်ခံလိုက်ရတယ်။ စစ်ခွေးအသေအပျောက်လည်းရှိထားပါတယ်။”ဟု ကိုထူးခန့်ဇော်က ပြောသည်။
ယခုလက်ရှိတွင် အဆိုပါစစ်ကောင်စီတပ်သည် ပျံကျ(အေးသာယာ) ရွာ၌ တပ်စွဲထားကြောင်း သိရသည်။
စစ်ကောင်စီတပ်သည် စက်တင်ဘာနောက်ဆုံးပတ်အတွင်း ဒီပဲယင်းမြို့နယ်အရှေ့ခြမ်းကို စစ်ကြောင်းထိုးခဲ့ပြီး စက်တင်ဘာ ၂၇ ရက်နတွင် ဒီပဲယင်းမြို့ပေါ် ဝင်ရောက်ခဲ့သည်။
ထို့နောက် ယနေ့(စက်တင်ဘာလ ၃၀ ရက်) နံနက်ပိုင်းတွင် ဒီပဲယင်းမြို့ပေါ်မှ အင်အား ၁၀၀ ခန့်ဖြင့် မြို့နယ်အနောက်ခြမ်းသို့ စစ်ကြောင်းထိုးလာသောကြောင့် ဒီပဲယင်းမြို့နယ်အနောက်ခြမ်းရှိ ကျေးရွာများမှ ဒေသခံပြည်သူ ၅၀၀၀ ကျော်မှာ ထွက်ပြေးတိမ်းရှောင်နေရကြောင်း ဒီပဲယင်းမြို့နယ်စစ်ရှောင်ထောက်ပံ့ရေးအဖွဲ့က ပြောသည်။
