စစ်​ကောင်စီတပ်ရှမ်း​မြောက်သို့စစ်ကူမပို့နိုင်​ရေး ရပ်စောက်

-နောင်ချိုလမ်းပိုင်းကိုဖြတ်သန်းခြင်းမပြုရန် DPLF ထုတ်ပြန်

ရှမ်းပြည်နယ်မြောက်ပိုင်းတိုက်ပွဲများသို့ စစ်ကူပို့ရန် စစ်ကောင်စီတပ်က ရပ်စောက်-နောင်ချိုလမ်းပိုင်းကို အသုံးပြုလာနိုင်သည့်အတွက် ယင်းလမ်းပိုင်းအား ယခုရက်ပိုင်း ဖြတ်သန်းသွားလာခြင်းမပြုရန် ဓနုပြည်သူ့ လွတ်မြောက်ရေးတပ်တော်DPLF ကကြေညာချက်ထုတ်ပြန်လိုက်သည်။

“ရှမ်းမြောက်ကို အင်အားဖြည့်ဖို့က ဒီတစ်လမ်းပဲ ကျန်တော့တာ။ စစ်ကားတွေနဲ့ မဟုတ်ဘဲ အရပ်သာကားတွေနဲ့ပါ လိုက်လာနိုင်တယ်။ ဒါကြောင့် ဒီရက်ထဲ ပြည်သူတွေ လမ်းအသုံးမပြုဖို့ ‌မေတ္တာရပ်ခံထားတာပါ” ဟု DPLF တာဝန်ရှိသူကပြောသည်။

ကားလမ်း​မိုင် ၁၀၀ ​ကျော်ရှည်သာရပ်စောက်-နောင်ချိုလမ်းပိုင်းအားအသုံးမပြုရန်DPLFက နိုဝင်ဘာ၁ရက်မှစတင်၍ သတိပေးခြင်းဖြစ်သည်။

DPLFသည် ဓနုကိုယ်ပိုင်အုပ်ချုပ်ခွင့်ရဒေသဖြစ်သော ရွာငံနှင့် ပင်းတယမြို့နယ်၊ ရပ်စောက်၊နောင်ချို မြို့နယ်တို့တွင် မဟာမိတ်များနှင့်ပူးပေါင်းပြီး စစ်ရေးလှုပ်ရှားနေသည်။

Public Service Announcement

မြောက်ပိုင်းမဟာမိတ်သုံးဖွဲ့ဦးဆောင်သည့် ၁၀၂၇ စစ်‌ဆင်ရေးတွင် အထိနာနေသည့် စစ်ကောင်စီတပ်သည် ၆ ရက်အတွင်း ရှမ်းပြည်နယ်မြောက်ပိုင်းဒေသမှ မြို့သုံးမြို့နှင့် စစ်စခန်း​ပေါင်း ၉၀ ကျော်ကို လက်လွတ်ခဲ့ရသည်။

ထိုအပြင်နောင်ချို ၊ကျောက်မဲ ၊ပန်းဆိုင်(ကြူကုတ်)စ​သောမြို့နယ်များကို ထိန်းချုပ်နိုင်ရေးအတွက် မဟာမိတ်တပ်ဖွဲ့များကထိုးစစ်ဆင်တိုက်ခိုက်နေသည်။ မူဆယ်နှင့် ချင်းရွှေဟော်မြို့နယ်ဘက်သို့ အထွက်လမ်းပိုင်း၌ အဓိကကျသည့် သိန္နီမြို့ကိုလည်း မဟာမိတ်တပ်ဖွဲ့များက ထိမ်းချုပ်ထားပြီး လမ်းပိုင်းကိုဖြတ်တောက်ထားသည်။

ပြင်ဦးလွင်မြို့ကိုဖြတ်၍ သွားသည် စစ်ကောင်စီထောက်ပို့ယာဉ်တန်းမှာလည်း နောင်ချိုနှင့်ပြင်ဦးလွင်မြို့နယ်အစပ်၌ မန္တ​လေး PDF နှင့် TNLA တို့၏ တိုက်ခိုက်မှု​ကြောင့် ​နိုဝင်ဘာ ၁ ရက်ည​နေမှစ၍ ​ရှေ့မတိုးနိုင်ဘဲ ​နောက်ပြန်ဆုတ်ထားရသည်။

ထို့ကြောင့် ရပ်စောက်-နောင်ချိုလမ်းပိုင်းကို အသုံးပြုလာနိုင်သည့် အခြေအနေကို တားဆီးရန်DPLFက ကြိုတင်ပြင်ဆင်နေခြင်းဖြစ်သည်။