ခရိုင်မြို့ဖြစ်သော ကောလင်းမြို့ကို သိမ်းပိုက်ပြီး၊ လက်နက်ခဲယမ်း အများအပြားရရှိကြောင်းအမျိုးသားညီညွတ်ရေးအစိုးရ၊ကာကွယ်ရေးဝန်ကြီးဌာန၊ပြည်သူ့ကာကွယ်ရေးတပ်မတော် (PDF)၊ (စစ်ရုံးချုပ်) ကအတည်ပြုထုတ်ပြန်လိုက်သည်။
“ကောလင်းမြို့ရှိ ရန်သူ့တပ်ဖွဲ့ဝင်များ အခြေပြုတပ်စွဲထားသည့် ကောလင်းရဲစခန်း၊ အထွေထွေ အုပ်ချုပ်ရေးရုံး၊ အထက်တန်းကျောင်း၊ မြေစာရင်းရုံး၊ မြန်မာ့စီးပွားရေးဘဏ်တို့ကို အောင်မြင်စွာ တိုက်ခိုက်သိမ်းပိုက်ပြီးနောက် ရန်သူ့အုပ်ချုပ်ရေး ယန္တရားရပ်တန့်သွားခဲ့ကာ ကောလင်းမြို့ကို အောင်မြင်စွာ သိမ်းပိုက်နိုင်ခဲ့ခြင်း ဖြစ်သည်။ ခရိုင်အဆင့်မြို့ကို ပထမဆုံးအကြိမ် တိုက်ခိုက်သိမ်းပိုက်နိုင်ခဲ့ခြင်းဖြစ်သည်”ဟု ဖော်ပြထားသည်။
ယမန်နေ့ (နိုဝင်ဘာ ၅ )ညနေထိ လက်နက် မျိုးစုံ (၅၄)လက်နှင့် ခဲယမ်းများ သိမ်းဆည်းရမိပြီး စစ်ဆင်ရေးဆိုင်ရာ အချက်အလက်များကို မကြာခင် အသေးစိတ်ဆက်လက် ထုတ်ပြန်သွားပါမည်ဟုလည်းအသိပေးသည်။
အမှတ်(၁) စစ်ဒေသ၊ ကောလင်းခရိုင်ကွပ်ကဲရေး အစီအစဥ်ဖြင့် ပြည်သူ့ ကာကွယ်ရေးတပ်မတော်(PDF)နှင့်မဟာမိတ် ပူးပေါင်း တပ်ဖွဲ့များက နိုဝင်ဘာ ၃ ရက်မနက်မှစ၍ မြို့သိမ်းတိုက်ပွဲဆင်နွဲခဲ့ရာ နိုဝင်ဘာလ (၆) ရက်နေ့တွင် အောင်မြင်စွာ တိုက်ခိုက် သိမ်းပိုက်နိုင် ခဲ့ခြင်းဖြစ်သည်။
Public Service Announcement
ကောလင်းခရိုင် တွင်ပင်လယ်ဘူးမြို့ ၊ဝန်းသို ၊ကောလင်းမြို့သုံးမြို့ပါဝင်သည်။ ကောလင်းမြို့မှာ လူဦးရေ နှစ်သောင်းခွဲကျော်နေထိုင်သောမြို့ဖြစ်သည်။
“ဘယ်တော့မှ နောက်မဆုတ်ဘူး။ မရရအောင် တိုက်သွားမှာ။ အုပ်ချုပ်ရေးအတွက် အကုန်ပြင်ဆင်ပြီးသား”ဟု ပြည်သူ့ကာကွယ်ရေးတပ်ဖွဲ့ဝင်တစ်ဦးကပြောသည်။
