မန္တလေးတိုင်း၊ မြင်းခြံမြို့နယ်၊ ကိုင်းကျေးရွာရှိ စခန်းစီးနင်းတိုက်ခိုက်ခံရပြီးနောက် စစ်ကောင်စီက လက်နက်ကြီးများဖြင့် ပစ်ခတ်နေ၍ကျေးရွာအချို့ ထွက်ပြေးတိမ်းရှောင်နေရကြောင်း သတင်းရရှိသည်။
နိုဝင်ဘာ ၁၆ ရက် နံနက်ပိုင်းက ကိုင်းရွာရှိ စစ်ကောင်စီတပ်စခန်း စီးနင်းတိုက်ခိုက်ခံရပြီးနောက် လက်နက်ကြီးများဖြင့် ရမ်းသမ်းပစ်ခတ်နေ၍ စစ်ကိုင်းတိုင်း၊ မြောင်မြို့နယ်ရှိ မြစ်ကမ်းနံဘေးကျေးရွာများမှ ပြည်သူ ၅၀၀ကျော်မှာ ထွက်ပြေးတိမ်းရှောင်နေရကြောင်း ဒေသခံများက ပြောသည်။
“အခုဆို မိုးက၂ရက်၂ည မိုးဆက်တိုက်ရွာနေလို့ စစ်ဘေးရှောင်တွေ နေထိုင်စားသောက်ရတာ အဆင်မပြေဘူး။”ဟု မြောင်နယ် ဒေသခံတစ်ဦးက ပြောသည်။
အဆိုပါ စစ်ဘေးရှောင် ၅၀၀ကျော်အား မြောင်လူငယ်ကွန်ရက်-YFCနှင့်အတူ တစ်အိမ်ထောင်လျှင် ဆန်တစ်ပြည် ငါးခြောက် ၃၀ကျပ်သားတို့လှုဒါန်းခဲ့ကြောင်း CDSOM အဖွဲ့မှ ကိုနွေဦး(မြောင်)က ပြောသည်။
အလားတူ ယနေ့ နိုဝင်ဘာ၁၉ ရက် နံနက်ပိုင်းက ကိုင်းရွာအနီးရှိ ဆီမီးခုံမြို့တွင်လည်း စစ်ကောင်စီတပ်က လက်ဖက်ရည်ဆိုင်များပါဝင်ရောက်ကာ ပြည်သူများ၏ လက်ကိုင်ဖုန်းများအား စစ်ဆေးနေကြောင်း ဒေသခံများက ပြောသည်။
Public Service Announcement
ကိုင်းရွာစခန်းအား မဟာမိတ် (၁၈)ဖွဲ့ပူးပေါင်းပြီး စီးနင်းတိုက်ခိုက်ခဲ့ခြင်း ဖြစ်ပြီး စခန်းများမီးရှို့ဖျက်ဆီးနိုင်ခဲ့သည်။ ထို့အပြင် စစ်ကောင်စီတပ် သားတစ်ဦး၏ ဇနီးအား ဖမ်းဆီးထိန်းသိမ်းထားပြီး သေနတ်တစ်လက်အပါအဝင် ကျည်နှင့် ခဲယမ်းများ၊ စစ်အသုံးအဆောင်ပစ္စည်းများနှင့် လက်ကိုင်ဖုန်းငါးလုံး သိမ်းဆည်းရရှိခဲ့သည်။
