ကျေးရွာ မီးရှို့ဖျက်ဆီးသွား၍ နေအိမ် ၃၀ကျော် မီးလောင်ဆုံးရှုံး
မန္တလေးတိုင်း၊ မြင်းခြံမြို့နယ်ရှိ ပျားကျေးရွာတွင် စစ်ကောင်စီတပ်က (၃)နှစ်အရွယ် ကလေးငယ်အပါအဝင် ဒေသခံပြည်သူ ၆ဦးအား သတ်ဖြတ်သွားကြောင်း သတင်းရရှိသည်။
နိုဝင်ဘာ ၇ ရက် နံနက် ၅နာရီခန့်က မြင်းခြံမြို့နယ်၊ ပျားကျေးရွာအနီးတွင် စစ်ကောင်စီတပ်နှင့် ဒေသတွင်းတော်လှန်ရေးတပ်ဖွဲ့များ တိုက်ပွဲဖြစ်ပွားခဲ့သည်။
ထို့နောက် စစ်ကောင်စီတပ်က အနီးရှိ ပျားကျေးရွာကို ဝင်ရောက် စီးနင်းပစ်ခတ်ခဲ့ရာ (၃)နှစ်အရွယ် မိန်းခလေးငယ်တစ်ဦးအပါအဝင် ပြည်သူ ၆ဦးသတ်ဖြတ်ခံရကြောင်း ဒေသခံများက ပြောသည်။
(၃)နှစ်အရွယ် သမီးငယ်မှာ စစ်ကောင်စီတပ်က လက်နက်ကြီးဖြင့် ပစ်ခတ်ခဲ့၍ မိခင်ဖြစ်သူက ချီပိုးပြီးထွက်ပြေးချိန် ခေါင်းကျည်ထိမှန်သေဆုံးခဲ့ခြင်းဖြစ်ပြီး မိခင်ဖြစ်သူလည်း ပုခုံး၌ ဒဏ်ရာရခဲ့ကြောင်း မြင်းခြံလူထုလှုပ်ရှားမှုကော်မတီက အသိပေးသည်။
Public Service Announcement
ထို့အပြင် ကျေးရွာအပြင် ကွမ်းခြံအတွင်း ပုန်းအောင်နေသူများအနက်မှ ရွာသား ၅ဦးကို ရွာတွင်းခေါ်ဆောင်ကာ သတ်ဖြတ်ခဲ့ပြီး အလောင်းများကို နွားခြံအတွင်း မြှုပ်နှံသွားကြောင်း၊ သတ်ဖြတ်ခံရသူများထဲတွင် အသက်(၁၅)နှစ်အရွယ် တစ်ဦးပါဝင်ကြောင်း မြင်းခြံလူထုလှုပ်ရှားမှုကော်မတီက ထုတ်ပြန်သည်။
“မနက်၆နာရီလောက်မှာ ပျားရွာကိုစစ်ကြောင်းဝင်တယ်။ နေအိမ်တွေမီးရှို့တယ်။ ကလေးငယ်လေးအပါအဝင် လောလောဆယ် ၆ ယောက် အသတ်ခံထားရတယ်။ အသတ်ခံရတဲ့သူတွေက PDF တွေ လုံးဝမပါပါဘူး။ သူတို့ဘက်ကတော့ PDF တွေ သေတယ်ဆိုပြီး ဖြန့်ထားတာ။ ဒါကလုံးဝမဟုတ်ဘူး။”ဟု ဒေသခံအမျိုးသားတစ်ဦးက ပြောသည်။
စစ်ကောင်စီတပ်၏ မီးရှို့ဖျက်ဆီးမှုကြောင့် ပျားကျေးရွာရှိ နေအိမ် ၃၀ကျော် မီးလောင်ပျက်စီးခဲ့ရကြောင်း သိရသည်။
ထို့အပြင် ပျားကျေးရွာအား မီးရှို့ပြီးပြန်လာသော စစ်ကောင်စီတပ်၏ ယာဥ်တစ်စီးအား နံနက် ၉ နာရီခန့်တွင် မဟာမိတ်များနှင့်အတူ ခြောက်လုံးတွဲ ပဒေသာမိုင်းဖြင့် တိုက်ခိုက်ခဲ့ကြောင်း Myingyan Black Tiger (MBT)၏ ခေါင်းဆောင် ဗိုလ်မိုက်ခဲက ပြောသည်။
တိုက်ခိုက်မှုကြောင့် စစ်ကောင်စီတပ်သား နှစ်ဦးသေဆုံးပြီး တစ်ဦး ဒဏ်ရာရရှိခဲ့ကြောင်း ဗိုလ်မိုက်ခဲက ဆိုသည်။
“မီးရှို့ပြီးဖောကားတစ်စီးနဲ့ ပြန်လာတာ။ မီးရှို့တဲ့ကောင်ကလည်း ရှို့နေတုန်းပဲ။ တစ်စီးကပြန်လာတာ။အဲတစ်စီးကိုမိုင်းဆွဲလိုက်တာ။”ဟု ဗိုလ်မိုက်ခဲက ပြောသည်။
ယမန်နေ့က တနေကုန်နီးပါး ပျားရွာအနီး၌ စစ်ကောင်စီတပ်နှင့် ဒေသတွင်းPDFများ ထိတွေ့မှုဖြစ်ပွားခဲ့ပြီး တိုက်ပွဲနှင့်ပတ်သက်၍ ထုတ်ပြန်နိုင်ခြင်းမရှိသေးကြောင်း PDFအဖွဲ့အချို့က ပြောသည်။
