ရခိုင်ပြည်နယ် ပေါက်တောမြို့တွင် ယနေ့(နိုဝင်ဘာလ ၂၁ရက်) ညနေပိုင်း၌ တိုက်ပွဲပြင်းထန်နေပြီး စစ်ကောင်စီတပ်က လေကြောင်းရော၊ရေကြောင်းမှပါ ပစ်ခတ်တိုက်ခိုက်နေကြောင်း ဒေသခံများကပြောသည်။
“ပေါက်တောမှာနှစ်ဖက် တိုက်ပွဲ ပြင်းထန်နေပါတယ်။ စကစ ကရဟတ်ယဥ် နဲ့ရော နေဗီ(ရေတပ်)ကပါ ပစ်ခတ်နေပါတယ်” ဟုဒေသခံတစ်ဦးကပြောသည်။
စစ်ကောင်စီဝါဒဖြန့် တယ်လီဂရမ်ချန်နယ်များ၌ ပေါက်တောမြို့တွင် ယနေ့ နံနက်က ရက္ခိုင့်တပ်တော်(AA) က စတင်တိုက်ခိုက်၍ စစ်တပ်က လေကြောင်းရော ရေကြောင်းမှပါ ပစ်ကူပေးနေကြောင်း ဖော်ပြနေကြသည်။ တိုက်ပွဲအတွင်း ထိခိုက်မှုများကို မသိရှိရသေးပေ။
စစ်ကောင်စီတပ်သည် ပေါက်တောမို့၌ AAအား ထိပ်တိုက်ရင်ဆိုင်တိုက်ခိုက်ခြင်းမျိုးမပြုလုပ်ဘဲ အရပ်သားများကို ဦးတည်တိုက်ခိုက်နေကြောင်း ဒေသခံများကပြောသည်။ မြို့ပေါ်ရပ်ကွက်များမှဒေသခံအများအပြားသည် လက်တလောတွင် ဘေးလွှတ်ရာ၌ထွက်ပြေးတိမ်းရှောင်နေကြရသည်။
Public Service Announcement
ပေါက်တောမြို့ရဲစခန်းမှ ရဲတပ်ဖွဲ့ဝင်များအားလုံးသည်နိုဝင်ဘာလ ၁၆ ရက်နံနက်တွင် ရက္ခိုင့်တပ်တော်(AA) ထံလက်နက်ချ အလင်းဝင်ခဲ့သည်။ထိုနောက် စစ်တပ်က လေကြောင်းနှင့် ရေကြောင်းကပါ ပေါက်တော့မြို့ ဘက်လာ၍ ပစ်ခတ်သဖြင့်တိုက်ပွဲစတင်ဖြစ်ပွားခဲ့သည်။
နိုဝင်ဘာ ၁၆ ရက်က စစ်ကောင်စီက လေကြောင်းမှတိုက်ခိုက်ခဲ့ရာ ဒေသခံပြည်သူအချို့ သေဆုံးဒဏ်ရာရခဲ့သည်။ စစ် ကောင်စီလေကြောင်းမှတိုက်ခိုက်၍ ပြည်သူများသေဆုံးခဲ့ကြောင်း၊ ထိုလုပ်ရပ်သည် စစ်ရာဇဝတ်မှုကျူးလွန်ခြင်းဖြစ်ပြီး ” စစ်ကောင်စီပစ်သတ်၍ သေဆုံးခဲ့ရသော ပေါက်တောမြို့မှ အရပ်သားပြည်သူများအတွက် များစွာဝမ်းနည်းရပြီး အဆိုပါကိစ္စအား ကျူးလွန်သောသူများကို မိမိတို့ အနေဖြင့် လက်တုံ့ပြန် တိုက်ခိုက်သွားမည်ဖြစ်သည်” ဟု AA က နိုဝင်ဘာလ၁၆ရက် ညနေတွင်ထုတ်ပြန်ထားသည်။
နိူဝင်ဘာ ၁၆ ရက်နောက်ပိုင်းတိုက်ပွဲများ ငြိမ်သက်နေခဲ့ပြီး နောက် ၅ ရက်အကြာ ယနေ့ညနေတွင် တိုက်ပွဲများတကျော့ပြန် ဖြစ်ပွားခဲ့ခြင်းဖြစ်သည်ဟု ဒေသခံများကပြောသည်။
