မောင်တောမြို့ဒေသခံ ၁၄၆ဦးအပါအဝင် ရခိုင်တစ်ပြည်နယ်လုံးမှ ဒေသခံ ၄၀၀ဦးကို ရက္ခိုင့်တပ်တော်(AA) နှင့်ဆက်စပ်သည်ဟုဆိုကာ စစ်ကောင်စီက ဖမ်းဝရမ်းထုတ်ပြန်သည်။
လူရာချီပါဝင်သော ဝရမ်းစာရင်းကို စစ်ကောင်စီက ယမန်နေ့(နိုဝင်လာ ၂၁ရက်)တွင် ထုတ်ပြန်ပြီး ၀ရမ်းပါ လူပုဂ္ဂိုလ်များ၏ ဓာတ်ပုံများကိုလည်း အများပြည်သူသွားလာရာနေရာများ၌ ချိတ်ဆွဲထားသည်ဟု သတင်းရရှိသည်။
” စုစုပေါင်း ၄၀၀။မောင်တောက ၁၄၆ ယောက်ပါတယ်။ ရှေ့နေတွေလည်းပါတယ်”ဟု AAနှင့်နီးစပ်သည့် သတင်းရင်းမြစ်တစ်ဦးက ပြောသည်။
စစ်ကောင်စီသည် နိုဝင်ဘာ ၁၃ရက်က ရခိုင်ပြည်နယ်၌ AAက စတင်လိုက်သည့် ၁၀၂၇ စစ်ဆင်ရေးကြောင့် အထိနာနေချိန်၌ အရပ်သားများကို ပစ်မှတ်ထားဖမ်းဆီးခြင်း၊ တိုက်ခိုက်ခြင်းများပြုလုပ်နေသည်ဟု AA က သတိပေးသည်။
Public Service Announcement
ယမန်နေ့ကကလည်း စစ်တွေမြို့မှဒေသခံ ခုနစ်ဦးကို စစ်ကောင်စီက ဖမ်းဆီးသွားပြီး နိုဝင်ဘာ ၁၄ရက်မှ ၂၁ရက်အတွင်း ကျောက်ဖြူနှင့် သံတွဲမြို့အပါအဝင် ရခိုင်ပြည်နယ်၌ အရပ်သား ၅၀ ဦးထက်မနည်းကို စစ်ကောင်စီက ဖမ်းဆီးထားကြောင်းသတင်းရရှိသည်။
လက်ရှိတွင် ရခိုင်ပြည်နယ်၌ တိုက်ပွဲများဆက်လက်ပြင်းထန်နေသည်။ စစ်ကောင်စီလက်အောက်ခံတပ်ဖွဲ့ဝင်များ လက်နက်ချအလင်းဝင်ရန်နှင့် လက်နက်မချပါက တိုက်ခိုက်ချေမှုန်းသွားမည်ဟု AAက ထုတ်ပြန်ထားသည်။
” ရက္ခိုင့်တပ်တော်သည် ရက္ခိုင်ပြည်သူလူထု၏ အသက်၊ အိုးအိမ်၊ စည်းစိမ်တို့ကို အမြဲတမ်းကာကွယ်ပေးလျက်ရှိပြီး ပြည်သူလူထုအားဒုက္ခရောက်ရန် ပြုလုပ်သော မည်သူ့ကိုမဆို တားဆီးတိုက်ဖျက်သွားမည်။ အာရက္ခပြည်သူလူထုများအား သတ်ဖြတ်နေသော စစ်ကောင်စီတပ်ဖွဲ့ ဝင်များကိုလည်း မိမိတို့ ထုတ်ပြန်ထားသည့်အတိုင်း လက်စားချေ တုံ့ပြန်သွားမည်ဖြစ်သည်”ဟု AA က ယမန်နေ့က ထုတ်ပြန်ထားသည်။
