မန္တလေးတိုင်း၊ မြင်းခြံမြို့နယ်တွင် မင်္ဂလာဆောင်တစ်ခုအား လုံခြုံရေးယူပေးပြီး ပြန်လာသည့် စစ်ကောင်စီတပ်အား မိုင်းဆွဲတိုက်ခိုက်ရာ စစ်အုပ်စုထိခိုက်သေဆုံးမှုများရှိကြောင်း ဒေသတွင်းတော်လှန်ရေးအင်အားစုများက ပြောသည်။
ယနေ့(နိုဝင်ဘာ ၂၄ ရက်)နံနက် ၆ နာရီခွဲခန့်က မြင်းခြံမြို့နယ်၊ ချေဆေးရွာရှိ မင်္ဂလာဆောင်တစ်ခုအား လုံခြုံရေးယူပေးပြီး ပြန်လာသည့် စစ်ကောင်စီတပ်အားချေဆေးနှင့် ကွမ်းစိုက်ကျေးရွာကြား၌ မိုင်းဆွဲတိုက်ခိုက်ခဲ့ကြောင်း Natogyi Regional Defence Force တပ်ဖွဲ့၏ တာဝန်ရှိသူက ပြောသည်။
“မင်္ဂလာဆောင်က သူတို့ကို(စစ်သားတွေကို)ပိုက်ဆံပေးပြီးခေါ်ထားတာ။ ဆောင်တဲ့သူတွေက စစ်တပ်အနွယ်ဝင်တော့မဟုတ်ဘူး။ မိုင်းထိပြီး ကားကထိုးရပ်သွားတယ်။ ပြန်မပစ်နိုင်ဘူး။ သူတို့က ဗျူဟာ၊ ကွမ်းစိုက်၊ ချေဆေး သုံးရွာပတ်နေနေတဲ့ ကောင်တွေပါ။”ဟု အထက်ပါတာဝန်ရှိသူက ပြောသည်။
တိုက်ခိုက်မှုကြောင့် စစ်ကောင်စီတပ်သားနှင့်ပျူစောထီး ၆ ဦးခန့်သေဆုံးနိုင်ကြောင်း ကင်းထောက်များ၏ ပြောပြချက်အရ သိရသည်။
နိုဝင်ဘာ ၂၂ ရက် နေ့လယ် ၁၂ နာရီခွဲခန့်ကလည်း မြင်းခြံမြို့နယ်၊ ကိုင်းကျေးရွာအနီး စစ်ကောင်စီတပ်အား မိုင်းဆွဲတိုက်ခိုက်ရာ စစ်ကောင်စီတပ်သားလေးဦး သေဆုံးကြောင်း မြင်းခြံခရိုင် အမှတ်(၆)တပ်ရင်း တပ်ခွဲ(၁)နောင်ရိုးအထူးပြောက်ကျားတပ် NYSGF၏ တာဝန်ခံက ပြောသည်။
“ကိုင်းရွာဘက်ကနေ ခြေလျင်တက်လာတဲ့ စစ်ကြောင်းကို အမိအရဖောက်ခွဲတိုက်ခိုက်နိုင်ခဲ့တာပါ။”ဟု NYSGF၏ တာဝန်ခံက ပြောသည်။
ထိခိုက်သေဆုံးသူများအား Faw ကားတစ်စီးဖြင့် လာရောက်သယ်ဆောင်သွားသည်ဟု ၎င်းကဆိုသည်။
အဆိုပါ စစ်ဆင်ရေးအား “မြိုင်မြိုင်ဆိုင်ဆိုင်လတန်ဆောင်တိုင်”ဟုအမည်ပေးထားပြီး မြင်းခြံခရိုင် အမှတ်(၆)တပ်ရင်း တပ်ခွဲ(၁)နောင်ရိုးအထူးပြောက်ကျားတပ် NYSGF နှင့် မြင်းခြံခရိုင် အမှတ်(၂)တပ်ရင်း Taloke PDF၊ Myingyan MP9၊ ရွှေဂျိုးဖြူမဟာမိတ်အဖွဲ့များ ပူးပေါင်းတိုက်ခိုက်ခဲ့သည်။