ချင်းပြည်နယ်ရှိ မြို့ပေါ်နေရာများ၌သာ စစ်ကောင်စီက ထိန်းချုပ်ထားနိုင်ပြီး မြို့တစ်မြို့နှင့်တစ်မြို့အား ဆက်သွယ်သည့် ဆက်သွယ်ရေးလမ်းကြောင်းများအားလုံးကို ချင်းဒေသကာကွယ်ရေးတပ်(CDF)နှင့် CNA တပ်များကထိန်းချုပ်ထားကြောင်း CNF/CNA ပြောရေးဆိုခွင့်ရှိသူဆလိုင်းထက်နီက ပြောသည်။
ဆလိုင်းထက်နီ၏ပြောကြားချင်ကို CNFက ထုတ်ပြန်ခဲ့ရာ ချင်းပြည်နယ် ဧရိယာ၏ ၇၅ ရာခိုင်နှုန်းကျော်ကို ချင်းတော်လှန်ရေးတပ်များက ထိန်းချုပ်ထားနိုင်ပြီဟု ပြောသည်။
“မြို့ပေါ်ဆိုတဲ့နေရာတောင်ထန်တလန်ကတော့ပြည်သူလူထုလည်းမရှိတော့ဘူး။သူတို့နဲ့ကျနော်တို့နဲ့ နှစ်ဖွဲ့ အဲဒီလိုတပ်စွဲထားတဲ့အနေအထားပေါ့။ ဆိုတော့မြို့ပေါ်မှာလောက်ပဲ။ တစ်မြို့နဲ့တစ်မြို့ဆက်သွယ်ရေး လမ်းကြောင်း အားလုံးကကျနော်တို့က ဒီနေ့အထိ ထိန်းချုပ်ထားနိုင်တယ်”ဟု ဆလိုင်းထက်နီက ပြောသည်။
မြို့နှင့် (၅)မိုင်ပတ်လည်ဝန်းကျင်ကိုသာ စစ်ကောင်စီတပ်က ထိန်းချုပ်နိုင်သည့်ဟု ဆိုသည်။
Public Service Announcement
“ချင်းတောင်မှာ အရင်လို စစ်ယာဉ်တန်းကြီးနဲ့ ရိက္ခာပို့တာတို့ ဘာတို့တော့မရှိတော့ဘူး”ဟု ဆလိုင်းထက်နီက ပြောသည်။
လက်ရှိတွင် စစ်ကောင်စီတပ်က လေကြောင်းအသုံးပြု လက်နက်ရိက္ခာဖြည့်တင်းခြင်း၊ အရပ်ဘက်ယာဉ်များ သုံးခြင်း ပြုလုပ်နေသည်ဟု ဆိုသည်။
လက်ရှိတွင် စစ်ကောင်စီ အပြုတ်တိုက်ရေးသည် ချင်းတပ်ဖွဲ့များ၏ ပထမဆုံးဦးစားပေးဦးတည်ချက်ဖြစ်ကြောင်း ပြောပြသည်။ စစ်ရေးသာမက အုပ်ချုပ်ရေးတည်ဆောက်ရန် ချင်းပြည်ကောင်စီ ဖြစ်တည်လာရေး ကြိုးစားနေကြောင်း၊ တော်လှန်ရေးကာလ၌ ကျင့်သုံးမည့် ချင်းပြည်ဖွဲ့စည်းပုံအခြေခံဥပဒေ ရေးဆွဲမှု ပြီးသလောက်ရှိနေပြီး ၂၀၂၄ ဇန်နဝါရီတွင် လုပ်ငန်းလည်ပတ်မှုကောင်းစွာလုပ်ဆောင်နိုင်မည်ဖြစ်ကြောင်း ဆလိုင်းထက်နီက ရှင်းပြသည်။
ယခုအခါ ချင်းတော်လှန်ရေးတပ်ဖွဲ့တွေက ရိဒ်ခေါဒါရ်မြို့၊ လိုင်လဲန်းပီမြို့တို့ကို သိမ်းယူထားပြီ ၊ကနေဒီတောင်ရှိစစ်တပ်စခန်းကိုလည်းတိုက်ခိုက်သိမ်းပိုက်ထားသည်။
