မြန်မာနိုင်ငံမှာ အမျိုးသား ရင်ကြားစေ့ရေးကိစ္စ လျင်လျင်မြန်မြန် ဆွေးနွေး အကောင်အထည်ဖော်ပြီး နိုင်ငံရေး ပြုပြင် ပြောင်းလဲမှုတွေ ရှေ့ဆက်နိုင်ဖို့ မျှော်လင့်ကြောင်း တရုတ်နိုင်ငံခြားရေးဝန်ကြီး ဝမ်ယိက ပြောတယ်လို့ ရိုက်တာသတင်းဌာနကဖော်ပြပါတယ်။
တရုတ် အာဏာရ ကွန်မြူနစ် ပါတီရဲ့ သံတမန်ရေးရာ ရာထူးအကြီးဆုံး ပုဂ္ဂိုလ်လည်းဖြစ်တဲ့ ဝမ်က အာဏာသိမ်းစစ်တပ်ရဲ့ ဒုတိယ ဝန်ကြီးချုပ်နဲ့ နိုင်ငံခြားရေး ဝန်ကြီးဖြစ်သူ သန်းဆွေကို ဘေဂျင်းမှာ လက်ခံတွေ့ဆုံပြီးတဲ့နောက် ဒီဇင်ဘာ ၆ ရက်မှာ အခုလိုသဘောထားမှတ်ချက်ပေးခဲ့တာလို့ဆိုပါတယ်။
အာဏာသိမ်း စစ်ခေါင်းဆောင်ရဲ့ နိုင်ငံခြားရေး ဝန်ကြီးနဲ့ တွေ့ဆုံချိန်မှာတရုတ်ကနှစ်နိုင်ငံပူးပေါင်းပြီးအွန်လိုင်း လိမ်လည်မှု လုပ်ငန်းတွေ အမြစ်ဖျက် ချိုးနှိမ်ရေး ကိစ္စကိုပါ ထည့်သွင်း ဆွေးနွေးခဲ့ကြောင်း ဝမ်က ပြောပါတယ်။
မြန်မာစစ်တပ်ဟာ အာဏာသိမ်းပြီးနောက်ပိုင်း အကြီးမားဆုံး စိန်ခေါ်မှုအဖြစ် နိုင်ငံအနှံ့မှာ ကွဲပြားတဲ့ တော်လှန်ရေး အင်အားစုတွေရဲ့ အလုံးအရင်း ထိုးစစ်ဆင်မှုတွေကို အသည်းအသန် ခုခံနေရပါတယ်။
Public Service Announcement
ဝမ်က တရုတ် အစိုးရ အနေနဲ့ မြန်မာနိုင်ငံက အမျိုးသား ရင်ကြားစေ့ရေးကို အောင်အောင်မြင်မြင် ဆောင်ကြဉ်းနိုင်ပြီး ဖွဲ့စည်းပုံ အခြေခံ ဥပဒေနဲ့ လျော်ညီတဲ့ နိုင်ငံရေး ပြုပြင် ပြောင်းလဲမှုတွေကို အမြန်ဆုံး ပြန်လည် အကောင်အထည်ဖော် ရှေ့ဆက်နိုင်ဖို့ မျှော်လင့်တယ်လို့ ပြောကြားသွားတယ်လို့ဆိုပါတယ်။
သူက နယ်စပ်ဒေသတွေမှာ အခြေစိုက် လှုပ်ရှားနေတဲ့ အွန်လိုင်း ငွေကြေး လိမ်လည်မှု ဒုစရိုက် ဂိုဏ်းတွေကို နှစ်နိုင်ငံ ပူးပေါင်း ဖြိုခွင်းမှုတွေနဲ့ ပတ်သက်လို့လည်း အသိအမှတ်ပြုသွားခဲ့ပါတယ်။
ပြီးခဲ့တဲ့လမှာ မြန်မာစစ်တပ် အာဏာပိုင်တွေက အွန်လိုင်းလိမ်လည်မှုတွေနဲ့ ဆက်နွှယ်တဲ့ သံသယ တရားခံ ၃၁၀၀၀ ကျော်ကို လက်လွှဲပေးခဲ့ကြောင်း တရုတ် အစိုးရက ထုတ်ပြန်ခဲ့ပါတယ်။ တရုတ် အစိုးရ မီဒီယာတွေရဲ့ ဖော်ပြချက်အရ နေ့စဉ် အွန်လိုင်း လိမ်လည်မှု လုပ်ငန်းတွေမှာ ပါဝင်လှုပ်ရှားနေသူ တစ်သိန်းလောက်ရှိပြီး မြန်မာပိုင်နက်ထဲမှာ အဲဒီလို ရာဇဝတ်မှုတွေ ကျူးလွန်နေတဲ့ စင်တာပေါင်း ၁၀၀၀ ထက်မနည်း ရှိမယ်လို့ သိရပါတယ်။
တရုတ်နိုင်ငံဟာ ညီနောင်မဟာမိတ် ၃ ဖွဲ့က ရှမ်းပြည်နယ်မြောက်ပိုင်းမှာစစ်ကောင်စီတပ်ကို ထိုးစစ်ဆင်တိုက်ခိုက်တဲ့ ၁၀၂၇ စစ်ဆင်ရေး စတင်ချိန်ကတည်းက အပစ်အခတ်ရပ်ပြီး တွေနွေးအဖြေရှာကြဖို့ မကြာခဏ ပြောနေတာဖြစ်ပါတယ် ။
